ޣައްޒާއަށް އެހީދޭނެ މަގުތައް ހުއްޓުމަކަށް

އިޒްރޭލުން މިމަހުގެ 2 ވަނަ ދުވަހުން ފެށިގެން ޣައްޒާއަށް އެހީ ވަންނަ މަގުތައް ބަންދުކުރުމާއެކު އިންސާނީ އެހީގެ ނިޒާމު "މުޅިން ފުނޑުފުނޑުވެފައިވާ" ކަމަށް 12 ޖަމިއްޔާއެއްގެ އިސްވެރިން އިންޒާރު ދެއްވައިފި އެވެ.

އިޒްރޭލުން ވަނީ ހަނގުރާމައިގެ ސަބަބުން ހާލުގައި ޖެހިފައިވާ ފަރާތްތަކަށް އެ ސަރަހައްދަށް އިންސާނީ އެހީތެރިކަން ފޯރުކޮށްދިނުމަށް ހުރަސް އެޅުން ދަމަހައްޓާނެ ކަމަށް ބުނެ، ހަމާސް އަށް އަދިވެސް ރަހީނުން ގޮތުގައި ތިބި 58 މީހުން ދޫކޮށްލަން މަޖުބޫރު ކުރުވަން އޮތް ހަމައެކަނި ގޮތަކީ އެއީ ކަމަށް ބުނެފަ އެވެ.

އޮކްސްފާމް އާއި ސޭވް ދަ ޗިލްޑްރަން ހިމެނޭ ގޮތަށް 12 އެންޖީއޯއެއްގެ ޗީފް އެގްޒެކެޓިވްސް ގުޅިގެން ނެރުނު ބަޔާނެއްގައި ބުނެފައި ވަނީ ޣައްޒާގެ ކޮންމެ މީހަކު ވެސް ދިރިހުރުމަށް އިންސާނީ އެހީއަށް ބަރޯސާވާ ކަމަށެވެ.

އިޒްރޭލުގެ ކަމާބެހޭ ފަރާތްތަކުން މިމަހުގެ 2 ވަނަ ދުވަހު އެހީގެ ހުރިހާ ސަޕްލައިއެއް ބްލޮކް ކުރި ފަހުން އެ ލައިފްލައިން މުޅިން ކަނޑާލާފައިވާ ކަމަށާއި މިއީ މި ޖީލުގެ އެންމެ ބޮޑު ނާކާމިޔާބީ ކަމަށް ވެސް އެ މީހުން ބުނެފައިވެ އެވެ.

ޣައްޒާގައި މަސައްކަތްކުރާ ބައިނަލްއަޤްވާމީ އަދި ފަލަސްޠީނުގެ 43 އެހީދޭ ޖަމްޢިއްޔާއަކުން ކުރި ސާވޭއަކުން ދައްކާގޮތުގައި މިދިޔަ މަހުގެ 18 ވަނަ ދުވަހު ހަނގުރާމަ ހުއްޓާލުމަށްފަހު އަލުން ފެށި ފަހުން ގާތްގަނޑަކަށް ހުރިހާ ޖަމްޢިއްޔާއަކުންވެސް ވަނީ ޚިދުމަތްތައް މެދުކަނޑާލާފައެވެ. އަދި ބޮމުގެ ހަމަލާތައް ދެމުންދާތީ ސަރަހައްދު ތެރެގައި ހަރަކާތްތެރިވުން ވެސް ނުރައްކާވެފައިވާ ކަމަށެވެ.

މުވައްޒަފުންގެ ސަލާމަތާއި ރައްކާތެރިކަން ކަށަވަރުކޮށްދިނުމަށާއި، ޣައްޒާއަށް އެތެރެވާ ހުރިހާ ތަނަކުން ރައްކާތެރިކަމާއެކު، ހުއްޓުމެއް ނެތި އެހީތެރިކަން ފޯރުކޮށްދިނުމުގެ ފުރުސަތު ދިނުމަށާއި، އިތުރު ފިޔަވަޅުތަކާ ދެކޮޅު ހެދުމަށް ދުނިޔޭގެ ލީޑަރުންނަށް ޖަމިއްޔާތަކުން ވަނީ ގޮވާލާފައެވެ.

ހަނގުރާމަ ހުއްޓާލުމުގެ އެއްބަސްވުން އުވި އިޒްރޭލުން އަނެއްކާވެސް ދޭން ފެށި ހަމަލާތަކުގައި ޣައްޒާގައި 1691 މީހުން ޝަހީދުވެފައިވާ އިރު، ހަނގުރާމަ ފެށުނު ފަހުން މަރުވި މީހުންގެ ޖުމުލަ އަދަދު 51،065 އަށް އަރާފައިވާ ކަމަށް އެ ސަރަހައްދުގެ ސިއްހަތާ ބެހޭ ވުޒާރާއިން ބުނެ އެވެ.

ޣައްޒާގެ މަދަނީ ދިފާއީ އިދާރާއިން ހުކުރު ދުވަހު ބުނީ އިޒްރޭލުން ރޭގަނޑު ދިން ދެ ހަމަލާއެއްގައި އެއް އާއިލާއެއްގެ 10 މީހުންނާއެކު 15 މީހުން ޝަހީދުވެފައިވާ ކަމަށެވެ.

ސިވިލް ޑިފެންސްގެ ތަރުޖަމާނު މަހްމޫދު ބަސަލް ޓެލެގްރާމްގައި ވިދާޅުވީ ޣައްޒާގެ ދެކުނުގައި އޮންނަ ޚާން ޔުނިސްގެ އިރުމަތީގައި އޮންނަ ބަނީ ސުހައިލާ ސަރަހައްދުގައި އިޒްރޭލު ސިފައިން އަމާޒުކުރި ބާރަކާ އާއިލާގެ ގެއާއި އަވަށްޓެރި ގެތަކުން 10 ޝަހީދުންނާއި ޒަހަމްވި ގިނަ އަދަދެއްގެ މީހުންގެ ހަށިގަނޑު މީހުން ސަލާމަތްކުރުމުގައި ހަރަކާތްތެރިވަމުން ދިޔަ މީހުންނަށް ފެނިފައިވާ ކަމަށެވެ.

އޭގެ ފަހުން ބަސަލް ވަނީ ޣައްޒާގެ އުތުރުގެ ތަލް އަލް ޒަތާރުގެ ދެ ގެއަކަށް ވަކިން ހަމަލާ ދީފައިވާ ކަން އިއުލާން ކޮށްފަ އެވެ.

އިޒްރޭލުގެ އަސްކަރިއްޔާއިން މިކަމާ ބެހޭ ގޮތުން އަދި ވަކި އެއްޗެއް ނުބުނެއެވެ. މިދިޔަ މަހުގެ 18 ވަނަ ދުވަހު އަލުން ހަމަލާތައް ދޭން ފެށި ފަހުން، ވައިގެ މަގުންދޭ ބޮމުގެ ހަމަލާތައް ވަރުގަދަކޮށް، ޣައްޒާގެ އެއްގަމު އޮޕަރޭޝަންތައް ވަނީ ފުޅާކޮށްފަ އެވެ.

މިދިޔަ ބުރާސްފަތި ދުވަހު މަދަނީ ދިފާއީ އިދާރާއިން ވަނީ އިސްރާއީލުން ދިން ހަމަލާތަކުގައި 40 މީހުން ޝަހީދުވެފައިވާ ކަމަށް ރިޕޯޓްކޮށްފަ އެވެ.