އިސްރާއީލުން ދިން ހަމަލާތަކުގައި ގެދޮރު ގެއްލުނު މީހުންގެ ތެރެއިން 40 މީހުން މަރުވެފައިވާ ކަމަށް ޣައްޒާގައި މީހުން ސަލާމަތްކުރާ ފަރާތްތަކުން ބުނެފިއެވެ.

ޣައްޒާގެ މަދަނީ ދިފާއީ އިދާރާއިން ބުރާސްފަތި ދުވަހު ބުނީ އިސްރާއީލުން ފަލަސްތީނުގެ ސަރަހައްދަށް ދިން ހަމަލާތަކުގައި 40 މީހުން ޝަހީދުވެފައިވާ ކަމަށާއި އޭގެ ތެރެއިން ގިނަ މީހުން ޝަހީދުވީ ހަނގުރާމައިގައި ގެދޮރު ގެއްލިފައިވާ އާންމުންގެ ދިރިއުޅެމުން ދިޔަ ކޭމްޕް ތަކުން ކަމަށެވެ.

އިސްރާއީލުގެ އަސްކަރިއްޔާއިން ބުނީ ހަމަލާތައް ދިން ކަމުގެ ރިޕޯޓްތައް ބަލަމުން އަންނަ ކަމަށެވެ. މި ހަމަލާ ދީފައިވަނީ އިސްރާއީލުގެ އެންމެ ފަހުގެ ހަނގުރާމައިގެ ހުށަހެޅުންތަކާ ގުޅޭ އެތެރޭގެ މަޝްވަރާތައް ގާތްގަނޑަކަށް ނިމިފައިވާ ކަމަށް ހަމާސްގެ އޮފިޝަލުން ރިޕޯޓް ކޮށްފައި ވަނިކޮށެވެ.

މަދަނީ ދިފާއީ ތަރުޖަމާނު މަހްމޫދު ބަސަލް ވިދާޅުވީ ދެކުނުގެ ސިޓީއެއް ކަމަށްވާ ޚާން ޔުނިސްގެ އަލްމަވާސީ ސަރަހައްދުގައި އިޒްރޭލުގެ ދެ މިސައިލް ބައެއް ޓެންޓުތަކަށް އަމާޒުވެ 16 މީހުން ޝަހީދުވެފައިވާ ކަމަށާއި އޭގެ ތެރޭގައި ގިނައީ އަންހެނުންނާއި ކުޑަކުދިން ކަމަށާއި 23 މީހުން ޒަހަމްވެފައިވާ ކަމަށެވެ.

2023 ވަނަ އަހަރުގެ ޑިސެމްބަރު މަހު އިސްރާއީލުން އަލްމަވާސީ އަކީ ރައްކާތެރި ސަރަހައްދެއްގެ ގޮތުގައި ކަނޑައެޅުމާ އެކު، ބޮމުގެ ހަމަލާތަކުން ހިމާޔަތް ހޯދުމަށް ފަލަސްތީނުގެ އެތައް ހާސް ބަޔަކު އެތަނަށް ޖަމާވި ނަމަވެސް، އޭގެ ފަހުން އެ ސަރަހައްދަށް ވަނީ ތަކުރާރުކޮށް އިޒްރޭލުން ހަމަލާތައް ދީފަ އެވެ.

ސަލާމަތްވި މީހުން ސިފަކުރި ގޮތުގައި ގިނަ ޓެންޓުތަކެއްގައި އަލިފާން ރޯކޮށްލި ޓެންޓްތައް ހުރި ސަރަހައްދުގައި ބޮޑު ގޮވުމެއް ގޮވި ކަމަށެވެ.

އިސްރާ އަބޫ އަލް-ރުސް އޭއެފްޕީއަށް ވިދާޅުވީ ޓެންޓުތަކުގައި ސުލްހަވެރިކަމާއެކު ތިއްބާ ކުއްލިއަކަށް ރަތް ކުލައިގެ އެއްޗެއް އަލިވެގެން ދިޔަތަން ފެނުނު ކަމަށާއި އެއަށްފަހު ޓެންޓުތައް ގޮވާ ވަށައިގެންވާ ޓެންޓުތަކުގައި އަލިފާން ރޯވި ކަމަށެވެ.

ބަސަލް ވިދާޅުވީ ގެދޮރު ގެއްލިފައިވާ ޣައްޒާގެ ރައްޔިތުން ދިރިއުޅެމުން އަންނަ އިތުރު ދެ ތަނަކަށް އިސްރާއީލުން ދިން ހަމަލާތަކުގައި އިތުރު 9 މީހަކު ޝަހީދުވެފައިވާ ކަމަށާއި އޭގެ ތެރޭގައި އުތުރުގެ އަވަށެއް ކަމަށްވާ ބައިތް ލަހިޔާގައި 7 މީހުން އަދި އަލްމަވާސީ ކައިރިން ބައްޕައަކާއި އޭނާގެ ފިރިހެން ދަރިއެއް ހިމެނޭ ކަމަށެވެ.

މީގެ އިތުރުން ޖަބާލިއާގައި ގެދޮރު ގެއްލިފައިވާ މީހުންނަށް ދިން އިތުރު ދެ ހަމަލާއެއްގައި އަސްލިޔާ އާއިލާގެ 7 މީހަކު ޝަހިދުވި އިރު، ވަގުތީ ބޯހިޔާވަހިކަން ހޯދަމުން ދިޔަ ސްކޫލަކަށް ދިން ހަމަލާގައި އިތުރު 6 މީހަކާއި، ޣައްޒާ ސިޓީގައި ދެ މީހަކު ޝަހީދުވެފައިވާ ކަމަށް ވެސް މަދަނީ ދިފާއީ އިދާރާއިން ވަނީ ބުނެފަ އެވެ.

އިސްރާއިލުގެ އަސްކަރިއްޔާއިން ފަހުން ވަނީ ހަމަލާދީފައިވަނީ ޖަބާލިޔާގައި ހުންނަ ހަމާސްގެ "ކޮމާންޑް އެންޑް ކޮންޓްރޯލް" ސެންޓަރަ ކަމަށް ބުނެފަ އެވެ.