ރަހީނުންގެ ދެބައިކުޅަ އެއްބައި މީހުންގެ ބަދަލުގައި 45 ދުވަހަށް ހަނގުރާމަ ހުއްޓާލަން އިޒްރޭލުން ހުށަހަޅައިފި

ހަމާސްގެ ބެލުމުގައި ދަށުގައި ތިބި އިޒްރޭލުގެ ރަހީނުންގެ ތެރެއިން ދެބައިކުޅަ އެއްބައި މީހުން ދޫކޮށްލާނަމަ އޭގެ ބަދަލުގައި 45 ދުވަހަށް ހަނގުރާމަ ހުއްޓާލަނެ ކަމަށް ހުށަހަޅާފައިވާ ކަމަށް ހަމާސް ޖަމާއަތުން ބުނެފިއެވެ.

ހަމާސްގެ އޮފިޝަލަކު އޭއެފްޕީއަށް ވިދާޅުވީ ޣައްޒާގެ ހަނގުރާމަ ނިމުމަކަށް ގެނައުމަށް ފަލަސްތީނުގެ ހަނގުރާމަވެރިން ހަތިޔާރު ބެހެއްޓުމަށް ވެސް އިސްރާއީލުން އެދުނު ކަމަށާއި ނަމަވެސް އެއީ "ރަތް ރޮނގު" ފަހަނައަޅައި ގޮސްފައިވާ ކަމެއް ކަމަށް އޮފިޝަލު ވިދާޅުވިއެވެ.

އޮފިޝަލް ވިދާޅުވި ގޮތުގައި މެދުވެރިއެއްގެ ގޮތުގައި މަސައްކަތް ކުރާ މިސްރުން އިސްރާއީލުގެ ހުށަހެޅުމަކަށް ފާސްކުރީ އެއްބަސްވުމުގެ ފުރަތަމަ ހަފުތާގައި ރަހީނުކޮށްފައިވާ މީހުންގެ ދެބައިކުޅަ އެއްބައި ދޫކޮށްލުމާއި، ހަނގުރާމައިގެ މުއްދަތު މަދުވެގެން 45 ދުވަހަށް އިތުރުކުރުމާއި، އެހީގެ ސާމާނު އެތެރެވެކުރެވޭނެ މަގު ފަހިކޮށްދިނުމަށެވެ.

2023 ވަނަ އަހަރުގެ އޮކްޓޯބަރު މަހުގެ ހަތްވަނަ ދުވަހު ހަނގުރާމަ ފެށި ހަމަލާތަކުގައި ހަމާސް އިން ވަނީ 251 މީހުން ރަހީނުކޮށްފައެވެ. ޣައްޒާގައި އަދިވެސް 58 މީހުން ހައްޔަރުކޮށްފައިވާއިރު، އޭގެ ތެރެއިން 34 މީހުން މަރުވެފައިވާ ކަމަށް އިޒްރޭލުގެ އަސްކަރިއްޔާއިން ބުނެއެވެ.

ހަނގުރާމަ ދާއިމީ ކޮށް ނިމުމަކަށް ގެނައުމުގެ ޝަރުތެއްގެ ގޮތުން ޣައްޒާގައި ހަމާސް ޖަމާއަތާއި ފަލަސްތީނުގެ ހުރިހާ ހަތިޔާރު އެޅި ފެކްޝަންތައް ހަތިޔާރު ބަހައްޓަން މި ހުށަހެޅުމުގައިވާ ކަމަށް އޮފިޝަލް ވިދާޅުވިއެވެ. ހަމާސްގެ ލީޑަރުން ހަނގުރާމަ ހުއްޓާލުމުގެ ހުށަހެޅުން މުރާޖައާ ކުރަމުން ދިޔަ ނަމަވެސް އޮފިޝަލް ވިދާޅުވީ ހަމާސް އާއި ހަނގުރާމަވެރިންގެ ސްޓޭންޑަކީ ހަތިޔާރު ބަހައްޓަން ޖެހޭ ހިސާބަކީ ރަތް ރޮނގު ކަމަށާއި، އެއީ މަޝްވަރާކުރެވޭނެ ކަމެއް ނޫން ކަމަށެވެ.

އޮފިޝަލް ވިދާޅުވީ ހަމާސް އިން މަޝްވަރާތަކަށް ދާ މީހުން ދަނީ ގަތަރަށް ކަމަށާއި އެ ޖަމާއަތުގެ އޮފީހެއް ގަތަރުގައި ހުންނާނެ ކަމަށާއި އިސްރާއީލާ އެކު މައިގަނޑު މަޝްވަރާތައް ކޮށްފައިވަނީ ވެސް އެތަނުގައި ކަމަށެވެ. ހަމާސްގެ ބަޔާނާ ގުޅޭ ގޮތުން އިޒްރޭލުން ވަކި އެއްޗެއް ބުނެފައި ނުވެއެވެ.

"ހަމާސް އިން މަޝްވަރާގެ މެދުވެރިންގެ ދައުރު އަދާކުރާ ފަރާތްތަކަށް އަންގާފައި ވަނީ ދާއިމީކޮށް ހަނގުރާމަ ހުއްޓާލުމާއި ޣައްޒާއިން އިސްރާއީލުން މުޅިން ފޭބުމާއި އެހީ އަށް ވަނުން ފަދަ ކޮންމެ ހުށަހެޅުމަކަށް އެއްބަސްވާން ތައްޔާރަށް އޮތް ކަމަށް އޮފިޝަލް ވިދާޅުވި އެވެ.

މީގެ ކުރިން އދ އިން ވަނީ ޣައްޒާގެ އިންސާނީ ކާރިސާ ކޮންޓްރޯލުން ނެއްޓި، ހަފުތާއެއްހާ ދުވަސް ވަންދެން އެ ސަރަހައްދަށް އެއްވެސް އެހީއެއް ނުވަދެ، ހާލަތު ވަރަށް ބޮޑަށް ގޯސްވަމުންދާ ކަމުގެ އިންޒާރު ދީފަ އެވެ.

އޮކްޓޯބަރު 7، 2023 ގައި ހަމާސް ޖަމާއަތުން ދިން ހަމަލާއަށް ފަހު ޣައްޒާގައި ހަނގުރާމަ ކުރަމުން އަންނަ އިސްރާއީލުން ފަލަސްތީނުގެ ސަރަހައްދުގައި އޮޕަރޭޝަންތައް ފަށާފައި ވަނީ ހަނގުރާ ހުއްޓާލުމާ ގުޅޭ ކުރިއަށް އޮތް މަރުހަލާއާ މެދު ހިޔާލު ތަފާތުވުންތަކެއް އުފެދި، ދެ މަސް ދުވަސް ވީ ހަނގުރާމަ ހުއްޓާލުމަށް ފަހު މިދިޔަ މާޗް މަހުގެ ތެރޭގަ އެވެ.

ހަނގުރާމައިގެ އެއްބަސްވުން ރޫޅުމުގެ ކުރިން، މާޗް މަހުގެ 2 ވަނަ ދުވަހުން ފެށިގެން އިސްރާއީލުން އިންސާނީ އެހީއަށް ހުރަސް އަޅާފައިވެއެވެ. ބޭސްފަރުވާއަށް ބޭނުންވާ ސާމާނާއި ތެލާއި ފެނާއި އެހެނިހެން ޒަރޫރީ ތަކެތި މަދުކަމަށް އދ. އިން ވަނީ އިންޒާރު ދީފައެވެ.

އދ.ގެ އޮފީސް ފޯ ދަ ކޯޑިނޭޝަން އޮފް ހިއުމެނިޓޭރިއަން އެފެއާޒް (އޯސީއެޗްއޭ) އިން ބުނީ، ހަނގުރާމަ ފެށުނު ފަހުން ފާއިތުވި 18 މަސް ދުވަހުގެ ތެރޭގައި އިންސާނީ ހާލަތު އެންމެ ގޯސްވެފައިވަނީ މިހާރުއެވެ. އޯސީއެޗްއޭ އިން ބުނީ އެހީދޭ ފަރާތްތަކަށް މަޖުބޫރުވެފައިވަނީ ބާކީ ހުރި ސްޓޮކްތަކުގެ ބޭނުން އެންމެ ފުރިހަމަ ގޮތުގައި ހިފުމަށް ޓަކައި ކާޑު ގެނައުމަށާއި ޑެލިވަރީ މަދުކުރުން ކަމަށެވެ.

އެހީތައް މެދުކެނޑި ސިއްހީ ވަސީލަތްތައް މަދުވެ ބޭހަށް ހޮސްޕިޓަލްތަކުން ސަލާން ޖަހަމުންދާ މި ދަނޑިވަޅުގައި ދެކުނުގެ ސިޓީއެއް ކަމަށްވާ ޚާން ޔުނިސްގެ ނާސިރު ހޮސްޕިޓަލުގެ ޑޮކްޓަރެއް ކަމަށްވާ އަހުމަދު އަލް ފަރާ ވިދާޅުވީ ހުރިހާ ކަމެއްގައި ވެސް ދަތިތަކެއް ހުރި ނަމަވެސް މެޑިކަލް ޓީމުން ހުއްޓުމެއް ނެތި މަސައްކަތް ކުރަމުން އަންނަ ކަމަށެވެ.

އިޒްރޭލުގެ ނޫސް ވެބްސައިޓް ޔެނެޓުން ރިޕޯޓްކޮށްފައިވާ ގޮތުގައި ހަނގުރާމަ ހުއްޓާލުމުގެ އާ ހުށަހެޅުމެއްގެ ދަށުން ހަމާސް އިން ދިރިތިބި 10 މީހުން ދޫކޮށްލާނެ ކަމަށާއި އޭގެ ބަދަލުގައި އިޒްރޭލުން ދެވަނަ ފިޔަވަހީގެ ހަނގުރާމަ ހުއްޓާލުމުގެ މަޝްވަރާތަކަށް ނުކުންނާނެ ކަމުގެ ޔަގީންކަން ދޭނެ ކަމަށެވެ.