ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުގައި އޭޝިއަން ޑިވަލަޕްމަންޓް ބޭންކް (އޭޑީބީ) މެދުވެރިކޮށް ހޯދި ގްރާންޓުން ސޭފް ހޯމް އަޅަން ހުޅުމާލެއިން ބިން ގަނެ ފައިސާ ދައްކާ ހަލާސްކޮށްފި އެވެ.

ސިވިލް ކޯޓުން ބުރާސްފަތި ދުވަހު ނިންމި ގަޒިއްޔާގައިވާގޮތުން، މިއީ ހައުސިންގ ޑިވަލަޕްމަންޓް ކޯޕަރޭޝަން (އެޗްޑީސީ) ގެ ނަމުގައި ރަޖިސްޓްރީކޮށްފައިވާ ހުޅުމާލެ އަމިއްލަ ބިމުގައި "ސޭފް ހޯމް" ފެސިލިޓީއެއް ތަރައްގީ ކުރުމަށްޓަކައި އެޗްޑީސީއާއި، މިނިސްޓްރީ އޮފް ފިނޭންސް އަދި މިނިސްޓްރީ އޮފް ސޯޝަލް ފެމިލީ ޑިވަލަޕްމަންޓާއި ދެމެދު ވެފައިވާ އެއްބަސްވުމުގެ ދަށުން ހުޅުމާލެ ލޮޓް ނަންބަރު 11707 (A2-1) އަމިއްލަ ބިން 31،500،000 ރުފިޔާގެ އަގަށް މިނިސްޓްރީ އޮފް ފިނޭންސް އަށް ވިއްކުމަށް އެޗްޑީސީގެ ފަރާތުން ހުށަހެޅުމުން ބެލުނު މައްސަލައެއް ކަމަށެވެ.

މި ގަޒިއްޔާގައިވާ ގޮތުން ސޭފް ހޯމް ފެސިލިޓީ ތަރައްގީ ކުރުމަށްޓަކައި އެޗްޑީސީއާއި ފިނޭންސް އަދި ފެމިލީ މިނިސްޓްރީއާއި ދެމެދުވެފައިވާ އެއްބަސްވުމުގެ ދަށުން ފިނޭންސް މިނިސްޓްރީއަށް ވިއްކާފައިވާ ބިމަކީ 10،000 އަކަ ފޫޓުގެ ބިމެކެވެ. އަދި މި ބިމުގެ އަގު ކަމުގައިވާ 31،500،000 ރުފިޔާ އެޗްޑީސީއަށް ދައްކާ ހަލާސްކޮށްފައިވާ ކަމަށް ގަޒިއްޔާގައި ބުނެފައިވެއެވެ.

އަދި ވިއްކާފައިވާ ބިމުގެ މިލްކުވެރިކަމާ މެދު ދައުވާކުރާ ފަރާތެއްވާނަމަ އެކަން 7 ދުވަހުގެ ތެރޭގައި ލިޔުމުން ކޯޓަށް އެންގުމަށް ކުރެވުނު އިއުލާނާއި ގުޅިގެން އެއްވެސް ފަރާތަކުން ދައުވާއެއް ނުވަތަ ޝަކުވާއެއްވިޔަސް ހުށަހަޅާފައި ނުވާ ކަމަށް ގަޒިއްޔާގައި ބުނެފައިވެއެވެ.

މައްސަލަ ނިންމާ ނެރުނު ހުކުމުގައި ބުނެފައިވަނީ 10،000 އަކަ ފޫޓުގެ ނަންބަރު 11707 (A2-1) ބިން 31،500،000 ރުފިޔާގެ އަފަށް އެޗްޑީސީން ފިނޭންސަށް ވިއްކުމުން، އެ ބިން ގަނެ ވުޔަފާރީގެ އަގުދު ފުރިހަމަ ކޮށް ފައިސާ ދައްކާ ހަލާސްކޮށްފައިވާތީ އެ ބިމުގެ މިލްކުވެރި ފަރާތަކީ މިނިސްޓްރީ އޮފް ފިނޭންސް ކަމުގައި ކަނޑައަޅާ ހުކުމްކޮށްފައިވާ ކަމަށެވެ.

ހުޅުމާލެއިން ގަތް ބިމަކީ ބިން ކަނޑައަޅައި ބިން ގަންނަން ސަރުކާރު ނިމުނު އިރު އޮތީ ފޮނުވާފައެވެ. ހުޅުމާލެ ބިމުގެ އިތުރުން އައްޑޫ ސިޓީ އަދި ރ. އަތޮޅުގައި ވެސް ސޭފް ހޯމް ގާއިމް ކުރުމަށް ބިން ގަތުމަށް ނިންމާ އެކަންވެސް އޮތީ ހަމަޖައްސާފައެވެ.

5 ޑިސެމްބަރު 2022 ގައި އޭޑީބީން އެއިރު ބުނެފައިވަނީ އޭޝިއަން ޑިވެލޮޕްމަންޓް ބޭންކް (އޭޑީބީ) އިން ރާއްޖެއަށް 7.51 މިލިއަން ޑޮލަރުގެ ހިލޭ އެހީއެއް ދޭން ފާސްކޮށްފައިވާ ކަމަށެވެ. އޭޑީބީގެ ވެބްސައިޓުގައިވާ ގޮތުން މި ހިލޭ އެހީގެ ދަށުން އިނޮވޭޓިވް ޖެންޑަރ އެޕްރޯޗްތަކަށް އެހީތެރިކަން ލިބިގެންދާނެ ކަމަށާއި، މިއީ އިޖުތިމާއީ ހަމަތަކާއި ތަފާތުކުރުމުގެ އަމަލުތައް ބަދަލުކުރުމުގައި ކެޓަލިޓިކް ދައުރެއް އަދާކުރާ އެއްޗެކެވެ.

މީގެ އިތުރުން، ނޭޝަނަލް ސްޓެޓިސްޓިކަލް ޑޭޓާ ސިސްޓަމްގައި ހިމެނޭ ކްރިޓިކަލް ޖެންޑަރ އިކުއަލިޓީ އެންޑް ސޯޝަލް އިންކްލޫޝަން ޑޭޓާގެ ފަރަގުތައް ޙައްލުކުރުމުގައި ރާއްޖޭގެ ބިއުރޯ އޮފް ސްޓެޓިސްޓިކްސްއާއި، ޖެންޑަރ ރެސްޕޮންސިވް ބަޖެޓިންގ ޤައުމީ ބަޖެޓް ސިސްޓަމްގެ ތެރެއަށް އިންޓަގްރޭޓް ކުރުމުގައި ފިނޭންސް މިނިސްޓްރީއަށް އެހީތެރިކަން ލިބިގެންދާނެއެވެ. މީގެ ސަބަބުން އައްޑޫ، ހުޅުމާލެ އަދި ރ. އުނގޫފާރުގައި ގެވެށި އަނިޔާއާއި ޖިންސީ އަނިޔާގެ ޝިކާރައަކަށްވެފައިވާ މީހުންނަށް ކްލައިމެޓް ރެޒިލިއަންޓް ޝެލްޓާތައް އެޅުމަށް މަގުފަހިވެގެންދާނެއެވެ.

މީގެ އިތުރުން އުމުރުން ދުވަސްވީ މީހުންނަށް އަޅާލުމާއި ކުޑަކުދިން ބެލެހެއްޓުމާއި ގެވެށި އަނިޔާ އާއި ޖެންޑާ ބޭސްޑް ވަޔަލެންސް ސާވިސްގެ އިޖުތިމާއީ ހިދުމަތުގެ ނިޒާމު ހަރުދަނާކުރުމަށް ފަންނީ އެހީތެރިކަން ފޯރުކޮށްދިނުމަށް ހަމަޖެހިގެންދިޔައެވެ. މީގެ އިތުރުން ގެވެށި އަނިޔާ އާއި ޖެންޑާ ބޭސްޑް ވަޔަލެންސް ހުއްޓުވުމަށާއި ގެވެށި އަނިޔާ އާއި ޖެންޑާ ބޭސްޑް ވަޔަލެންސްގެ ހިދުމަތާއި އުމުރުން ދުވަސްވީ މީހުންނަށް އަޅާލުން ހަރުދަނާކުރުމަށް މަދަނީ ޖަމިއްޔާތަކާއި ސަރުކާރާ ދެމެދު ޕާޓްނާޝިޕްތަކެއް ގާއިމުކުރެވިގެންދާނެ އެވެ.

މި ފަންނީ އެހީއަށް 2.5 މިލިއަން ޑޮލަރު ޚަރަދުވާނެ ކަމަށް އަންދާޒާކޮށްފައިވާއިރު، އޭގެ ތެރެއިން 500،000 ޑޮލަރަކީ އޭޑީބީގެ ޓެކްނިކަލް އެސިސްޓެންސް ސްޕެޝަލް ފަންޑުން ހިލޭ އެހީގެ އުސޫލުން ފައިނޭންސް ކުރުމަށް ހަމަޖެހިފައިވާ އަދި ޖަޕާން ސްޕެޝަލް ފަންޑުން ހިލޭ އެހީގެ އުސޫލުން ދިން 2.0 މިލިއަން ޑޮލަރެވެ.

އޭޑީބީ އިން ދިން އެހީގެ އެއްބަސްވުމުގައި ސޮއިކުރީ 21 ޑިސެމްބަރު 2022 ގައި ސަރުކާރުގެ ފަރާތުން އެއިރުގެ ފިނޭންސް މިނިސްޓަރު އިބްރާހިމް އަމީރެވެ.