ޣައްޒާ ސިޓީގެ ޝުޖާޔާ އަވަށުގެ މީހުން ދިރިއުޅޭ ބްލޮކަކަށް އިސްރާއީލުން ދިން ހަމަލާއެއްގައި 35 މީހުން ޝަހީދުވެ އެތައް ބަޔަކު ޒަހަމްވެފައިވާ ކަމަށް މެޑިކަލް އޮފިޝަލުން ބުނެފި އެވެ.

ޣައްޒާގެ ޞިއްޙަތާބެހޭ ވުޒާރާއިން ބުނީ، ޣައްޒާގެ އުތުރުގައި ބުދަ ދުވަހު ދިން ޙަމަލާގައި މަރުވި މީހުންގެ ޢަދަދު އިތުރުވާނެކަމަށް ލަފާކުރެވޭކަމަށާއި، މަދަނީ ދިފާޢީ ޓީމްތަކާއި ރައްޔިތުން ވަނީ، ގެއްލުނު އެތައް ބަޔަކާއި އިމާރާތްތަކުގެ ދަށުގައި ތާށިވެފައިވާކަމަށް ބެލެވޭ އެތައް ބަޔަކު ހޯދުމުގެ މަސައްކަތް ކުރަމުންދާކަމަށް ބުނެފަ އެވެ.

އިސްރާއީލުގެ އަސްކަރިއްޔާއިން ބުނީ މި ހަމަލާ އަމާޒުކޮށްފައިވަނީ ހަމާސްގެ އިސް ހަނގުރާމަވެރިއަކަށް ކަމަށެވެ. ނަމަވެސް އޭނާގެ ނަން ހާމަކޮށްފައި ނުވާ އިރު އާންމުންނަށް ލިބޭ ގެއްލުން ކުޑަކުރުމަށް ގިނަ ފިޔަވަޅުތަކެއް އަޅާފައިވާ ކަމަށް އިސްރާއިލުން ވަނީ ބުނެފަ އެވެ.

ޝުޖާޔާއަށް ނިސްބަތްވާ އައްޔޫބް ސަލީމް، 26، އަލްޖަޒީރާއަށް މައުލޫމާތު ދެމުން ބުނީ މި ހަމަލާގައި މަރުވި ބައެއް މީހުންގެ ހަށިތައް ކުދިކުދިވެފައިވާ ކަމަށާއި، އެމީހުންނަށް އެތައް މިސައިލެއް އަމާޒުވި ކަމަށެވެ.

ޝުޖާޔާއިން ރިޕޯޓް ކުރަމުން އަލްޖަޒީރާގެ އިބްރާހިމް އަލް ޚަލީލީ ބުނީ މަދަނީ ދިފާއީ ބާރުތަކާއި އެސަރަހައްދުގެ ރައްޔިތުން ގުޅިގެން ތާށިވެފައި ތިބި އާންމުން ވެއްޓިފައިވާ އިމާރާތްތަކުގެ ދަށުން ނެރުމުގެ މަސައްކަތް ކުރަމުންދާ ކަމަށެވެ. އޭނާ ބުނިގޮތުގައި އަނިޔާ ލިބުނު ގިނަ މީހުން ނަކީ ގަދަކަމުން ގެދޮރުން ނެރުމުން އެ ބްލޮކްގައި ދިރިއުޅެން އައި މީހުންނެވެ.

މަދަނީ ދިފާއީ ތަރުޖަމާނު މަހްމޫދު ބާސަލް ވިދާޅުވީ އިސްރާއިލުން ފަލަސްތީނުގެ ސަރަހައްދު ބަންދުކުރުމުގެ ސަބަބުން އެކަށީގެންވާ ވަސީލަތްތައް ނެތުމުގެ ސަބަބުން އިމާރާތްތަކުގެ ދަށުގައި ތާށިވެފައި ތިބި "އެތައް ބަޔަކަށް" ވާސިލުވުމަކީ ވަރަށް އުނދަގޫ ކަމެއް ކަމަށެވެ. އަދި މި ހަމަލާގައި 60 އަށް ވުރެ ގިނަ މީހުން ޒަހަމްވެފައިވާ ކަމަށެވެ.

ދީރް އަލް ބާލާއިން ރިޕޯޓްކުރަމުން އަލްޖަޒީރާގެ ހިންދު ޚުދަރީ ބުނީ ޣައްޒާ ސިޓީގެ އަލްއަހްލީ އަރަބް ހޮސްޕިޓަލްގެ ޑޮކްޓަރަކު ވިދާޅުވެފައިވަނީ "އަނދާފައިވާ" މީހުންނަށް ފަރުވާ ދެވޭނެ ގޮތެއް ނެތް ކަމަށެވެ. އަދި ހޮސްޕިޓަލަށް ވަރަށް އަވަހަށް ލޭ ބޭނުންވާ ކަމަށެވެ.

ތެލާއި ބޭސްފަރުވާއަށް ބޭނުންވާ ސާމާނު ނުލިބުމުގެ ދަތިކަން މިހާރުވެސް ކުރިމަތިވެފައިވާ ޕެރަމެޑިކްސް މީހުންނަށް ޝުޖާޔާގެ ރައްޔިތުންނާ ހަމައަށް ނުދެވެނީ އެ ސަރަހައްދު ސުންނާފަތިކޮށްފައި އޮތުމުންނެވެ. އަދި މަގުތަކުގައި ހުރި ގައުކުނޑިތަކުގެ ސަބަބުން ފަރުވާ ބޭނުންވާ މީހުންނާ ހަމައަށް ވާސިލުވުމަށް ހުރަސްއެޅޭކަމަށް ރިޕޯޓްކޮށްފައިވެއެވެ.

ހަމާސް ޖަމާއަތާ އެކު ގާތްގަނޑަކަށް ހަނގުރާ ހުއްޓާލުމުގެ އެއްބަސްވުމަކަށް ދެ މަހެއްހާ ދުވަހުގެ މެދުކެނޑުމަކަށް ފަހު އިސްރާއިލުން ޣައްޒާއަށް ވައިގެ މަގުން ބޮމުގެ ހަމަލާތައް ދޭން ފެށީ މާޗް މަހުގެ 18 ވަނަ ދުވަހު އެވެ. އިޒްރޭލުން އަލުން ހަމަލާދޭން ފެށި ފަހުން މިހާތަނަށް 1400 އަށް ވުރެ ގިނަ މީހުން ޝަހީދުކޮށްލާފައިވާ ކަމަށް ފަލަސްތީނުގެ ސިއްހީ އިދާރާތަކުން ބުނެ އެވެ.

މެދުވެރިއެއްގެ ގޮތުގައި ހަރަކާތްތެރިވާ މިސްރާއި ގަތަރު އަދި އެމެރިކާއިން ވަނީ ހަނގުރާމަ ހުއްޓާލުމުގެ މުއްދަތު އިތުރުކުރުމާ ގުޅޭ މަޝްވަރާތައް އަލުން ފަށަން މަސައްކަތް ކުރި ނަމަވެސް ކާމިޔާބެއް ލިބިފައިނުވެއެވެ.

އިސްރާއީލުގެ އަސްކަރިއްޔާގެ ތަރުޖަމާނު އަވިޗޭ އަދުރައި ބުނީ ޣައްޒާގައި އެންމެ ފަހުން ހިންގި އޮޕަރޭޝަންތަކުގެ ސަބަބުން "ހަތިޔާރު އެޅި މީހުން" ނައްތާލައި ޝުޖާޔާގައި ހަތިޔާރު ނައްތާލައި، ރަފާގެ ބިމު އަޑީގައި ހުރި ތަންތަނަށް ވަދެވެން އޮތް މަގުތައް ބަންދުކުރެވިފައިވާ ކަމަށެވެ.

ފަލަސްތީނުގެ ސިއްހީ މަސްދަރުތަކުން ބުނި ގޮތުގައި ބަނޑުހައިހޫނުކަމުގެ މައްސަލަ އިތުރަށް ގޯސްވެފައިވާ ދަނޑިވަޅެއްގައި އިސްރާއީލުން ޣައްޒާއަށް ފޯރުކޮށްދޭ އެހީގެ ސާމާނު ހުއްޓުވައި، ގެތަކާއި ހިޔާތަކާއި ވަގުތީ ކޭމްޕްތަކަށް އަމާޒުކޮށް ހަމަލާތައް ދީފައިވެ އެވެ.

މެޑިކަލް މަސްދަރުތަކުން އަލްޖަޒީރާއަށް މައުލޫމާތު ދިން ގޮތުގައި ބުދަ ދުވަހު ޣައްޒާގެ އެކި ހިސާބުތަކުގައި ދިން ހަމަލާތަކުގައި އިތުރު 10 މީހަކު ޝަހީދުވެފައިވާ އިރު، ދުވާލެއްގެ މައްޗަށް މަރުވާ މީހުންގެ އަދަދު ވަނީ 45 އަށް އަރާފައެވެ.

ޣައްޒާގެ ވެރިކަން ކުރާ ހަމާސް އިން ބުނީ އެމެރިކާގެ ތާއީދާއެކު ޣައްޒާގެ ރައްޔިތުންނާ ދެކޮޅަށް މިހާރު ހިންގަމުންދާ ޖަރީމާތަކަކީ ބައިނަލްއަގްވާމީ މުޖުތަމައުގެ މޫނުމަތީގައި ޖެހިފައިވާ ހުތުރު ލަކުނެއް ކަމަށާއި، އަރަބި އަދި މުސްލިމް ގައުމުތަކުން ދޭ އިޖާބަކީ އެއްވެސް އެއްޗެއް ނޫން ކަމަށް ބުނެފައެވެ.

އަލްޖަޒީރާގެ ސީނިއާ ޕޮލިޓިކަލް އެނަލިސްޓް މަރުވާން ބިޝާރާ ވަނީ މި ހަމަލާތަކަކީ އަނިޔާވެރި ހަމަލާތަކެއްގެ ގޮތުގައި ސިފަކޮށްފައެވެ. އަދި މި ހަމަލާތައް ދެމުންދާ ގޮތަކުން ދޭހަވަނީ އިސްރާއީލުން ޣައްޒާގެ ނަސްލު އެއްކޮށް ނައްތާލަން ބޭނުންވާ ކަން ކަމަށް އޭނާ ވަނީ ބުނެފައެވެ.

މިދިޔަ މާޗް މަހުގެ ފަހުކޮޅުން ފެށިގެން އިސްރާއީލުން ވަނީ ޣައްޒާގެ އައްސޭރިފަށުން ދުރުގައި ތިބި މީހުން "ސެކިއުރިޓީ ޒޯނެއް" ގެ ގޮތުގައި ސިފަކުރާ ސަރަހައްދެއް އުފައްދަން އަންގައިފަ އެވެ. އަމާޒަކީ ދާއިމީ ގޮތެއްގައި ބައެއް ސަރަހައްދުތަކުން އާބާދީ ހުސްކުރުމެވެ.

އިސްރާއީލުން ޣައްޒާއާ ދެކޮޅަށް ހަނގުރާމަ ފެށީ 2023 ވަނަ އަހަރުގެ އޮކްޓޫބަރު މަހުގެ ތެރޭގައި އިސްރާއީލުން ޣައްޒާއަށް ދިން ހަމަލާތަކުގައި ފަލަސްތީނުގެ 50،800 އަށްވުރެ ގިނަ މީހުން ޝަހީދުވެފައިވާ ކަމަށް ފަލަސްތީނުގެ ކަމާބެހޭ ފަރާތްތަކުން ބުނެއެވެ.