ޣައްޒާގެ ހޮސްޕިޓަލްތަކާއި މެޑިކަލް ސެންޓަރުތަކުގައި ހުރި ޒަރޫރީ ބޭހުގެ ސްޓޮކް "ނުރައްކާތެރި އަދި ހީވެސް ނުކުރާ މިންވަރަށް" ގޮސްފައިވާ ކަމަށް ހެލްތު މިނިސްޓްރީން ބުނެފި އެވެ.

އިޒްރޭލުން މަހަކަށް ވުރެ ގިނަ ދުވަސް ވަންދެން ޣައްޒާ ސްޓްރިޕް ބަންދުކޮށް، ވަށައިގެންވާ ސަރަހައްދުގައި ކާބޯތަކެއްޗާއި ތެލާއި ބޭހުގެ އިތުރުން އެހެނިހެން މުހިންމު ސާމާނު ވަނީ ކަނޑާލާފަ އެވެ.

މިނިސްޓްރީން ހިއްސާކޮށްފައިވާ ބައެއް ޑޭޓާ ޕޮއިންޓްތަކައް ބަލާއިރު، އެސެންޝަލް ޑްރަގް ލިސްޓުގެ 37 އިންސައްތަ ހުރީ ސުމެއްގައެވެ. އަދި މެޑިކަލް ސަޕްލައި ލިސްޓުގެ 59 އިންސައްތަ ހުރީ ސުމެއްގައެވެ. މީގެ އިތުރުން ކެންސަރާއި ލޭގެ ބަލިތަކުގެ ބޭހުގެ 54 އިންސައްތަ ބޭހުގެ ސްޓޮކް ހުރީ ސުމެއްގައެވެ. އަދި ސާޖަރީ އާއި އިންޓެންސިވް ކެއާ އަދި އިމަޖެންސީ ޑިޕާޓްމަންޓްތައް ހިންގަމުން ދަނީ ފުރާނަ ސަލާމަތްކޮށްދޭ ބޭހާއި ސަޕްލައިގެ ސްޓޮކް ހުސްވާން ކައިރިވެފައިވަނިކޮށެވެ.

ހަކުރު ބަލީގެ 80،000 މީހުންނާއި 110،000 ހައިޕަޓެންސިވް ޕޭޝަންޓުންނަށް ފަރުވާ ނުލިބޭ ކަމަށް ޣައްޒާގެ ހެލްތް މިނިސްޓްރީން ބުނެފައިވާއިރު، ބޭސްފަރުވާއަށް ބޭނުންވާ ސާމާނާއި ބޭސް އެތެރެކުރުން ބަންދުކުރުމުގެ ސަބަބުން މި މައްސަލަ އިތުރަށް ގޯސްވެ، ބަލިމީހުންނަށާއި ޒަހަމްވި މީހުންނަށް ސިއްހީ ހިދުމަތް ފޯރުކޮށްދިނުމުގައި ބޮޑެތި ގޮންޖެހުންތަކެއް ކުރިމަތިވެފައިވާ ކަމަށް ގައްޒާގެ ހެލްތް މިނިސްޓްރީން ބުނެ އެވެ.