ރައްޔިތުންގެ މަޖިލީހުގެ ޖަލްސާ އެއް މިއަދު ނުބާއްވަން ރައްޔިތުންގެ މަޖިލީހުން ނިންމައިފިއެވެ.

ހޯމަ ދުވަހު މަޖިލީހުގެ ޖަލްސާ ނިންމާލީ ދެން ޖަލްސާ ބާއްވާނެ ދުވަހެއް އިއުލާންކުރާނެ ކަމަށް ބުނުމަށް ފަހުގައެވެ.

ހޯމަ ދުވަހުގެ ޖަލްސާގެ ރިޔާސަތު ބެލެހެއްޓެވީ މަޖިލީހުގެ ނައިބު ރައީސް އަހުމަދު ނާޒިމެވެ.

މަޖިލީހުގެ ޖަލްސާއެއް އަންގާރަ ދުވަހު ނުބާއްވަން ނިންމާފައިވާ ސަބަބު އެ އިދާރާ އިން ސާފުކޮށްދީފަ އެއް ނުވެއެވެ. މަޖިލީހުގެ އިދާރާ އިން ވަނީ ޖަލްސާ ނުބާއްވާ ސަބަބު ރިޔާސަތުން ހިއްސާކޮށްފައި ނުވާ ކަމަށް ބުނެފައެވެ.

ޖަލްސާ ކުރިއަށް ނުދިޔަ ނަމަވެސް އަންގާރަ ދުވަހު ކޮމިޓީތަކުގެ މަސައްކަތް ވަނީ ތާވަލްކޮށްފައެވެ. އެގޮތުން 11 ޖަހާ އިރަށް މާލިއްޔަތު ކޮމިޓީގެ ބައްދަލުވުމެއް ވަނީ ތާވަލްކޮށްފައެވެ.

އާއްމުކޮށް މަޖިލީހުގެ ޖަލްސާ ބާއްވަނީ ހޯމަ، އަންގާރަ އަދި ބުދަ ދުވަހުއެވެ. މަޖިލީހުގެ ޖަލްސާއެއް މަދުވެގެން ހަފުތާއަކު ތިން ދުވަހު ބާއްވަން ވާނެ ކަމަށް މަޖިލީހުގެ ޤަވާއިދުގައި ވަނީ ބުނެފައެވެ.

ހޯމަ ދުވަހު ބޭއްވި މަޖިލީހުގެ ޖަލްސާ އަކީ ފަހު 10އަކަށް މަޖިލިސް މެދުކަނޑާލުމަށް ފަހު، އީދު ބަންދު ވެސް ނިންމާފައި ބޭއްވި ޖަލްސާއެކެވެ.