އެންޓި ކޮރަޕްޝަން ކޮމިޝަން (އޭސީސީ)ގެ ރައީސް އާދަމް ޝާމިލްގެ މައްޗަށް ޖިނާއީ ތަހުގީގެއް ހިންގައިދިނުމަށް އެދި ސުޕްރީމް ކޯޓުގެ ފަނޑިޔާރު ޑރ. އަޒްމިރާލްދާ ޒާހިރު ފުލުހަށް މައްސަލަ ހުށަހަޅައިފި އެވެ.

ރާއްޖެއެމްވީއަށް ފަނޑިޔާރު އަޒްމިރާލްދާގެ ގާނޫނީ ވަކީލް އިބްރާހިމް ޝަމީލް ވިދާޅުވީ ފަނޑިޔާރު ޑރ.އަޒްމިރާލްދާ މައްޗަށް ޖިނާއީ ތަހުގީގެއް އޭސީސީން ފަށާފައިނުވަނީސް ފަނޑިޔާރުގެ މައްޗަށް ޖިނާއީ ތަހުގީގެއް ކުރަމުންދާ ކަމަށް ބުނެ ކޮމިޝަނުގެ ރައީސް ޝާމިލް ޖުޑީޝަލް ސަރވިސް ކޮމިޝަން (ޖޭއެސްސީ)ން ސިޓީއެއް ފޮނުވައި ދޮގު މައުލޫމާތު ދީފައިވާ ކަމަށް ތުހުމަތު ކުރެވޭތީ އެ މައްސަލާގައި އޭނާގެ މައްޗަށް ޖިނާއީ ތަހުގީގެއް ހިންގައި ދިނުމަށް އެދި އާދިއްތަ ދުވަހު ފުލުހުންގެ ޚިދުމަތަށް ހުށަހަޅާފައިވާ ކަމަށެވެ. އަދި ފަނޑިޔާރު އަޒްމިރާލްދާއަށް ނުފޫޒު ފޯރުވުމަށް މަސައްކަތްކުރި މައްސަލާގައި ވެސް ޖިނާއީ ތަހުގީގެއް ކޮށްދިނުމަށް އެދި ހުށަހަޅާފައިވާ ކަމަށް ޝަމީލް ވިދާޅުވިއެވެ.

މީގެ އިތުރުން ޝަމީލް ވިދާޅުވީ, ފަނޑިޔާރު އަޒްމިރާލްދާގެ މައްޗަށް ޖޭއެސްސީން ތަހުގީގު ކުރާ ސުލޫކީ މައްސަލަތަކުގެ ތެރެއިން ކްރިމިނަލް ކޯޓުގެ ފަނޑިޔާރުންނަށް ނުފޫޒު ފޯރުވިކަމަށް ބުނާ މައްސަލައިގެ ތަހުގީގީ ރިޕޯޓަށް ލިޔުމުން ޖަވާބު ހުށަހަޅާފައިވާ ކަމަށެވެ.

ފަނޑިޔާރުންގެ ފަރާތުން ހުށަހެޅި ޖަވާބުގައި މައިގަނޑު ގޮތެއްގައި ފާހަގަކޮށްފައިވަނީ

ރައްޔިތުންގެ މަޖިލީހުގެ މެންބަރުން ޕާޓީން ވަކިވެއްޖެ ނަމަ ނުވަތަ ވަކިކޮށްފި ނަމަ ގޮނޑި ގެއްލޭ ގޮތަށް ގެނައި އިސްލާހުގެ މައްސަލަ ސުޕްރީމް ކޯޓުގައި ކުރިއަށް ދަނިކޮށް ކުއްލި ގޮތަކަށް ޖޭއެސްސީން، ސުޕްރީމް ކޯޓުގެ ތިން ފަނޑިޔާރުން 26 ފެބްރުއަރީ 2025 ގައި ސަސްޕެންޑް ކުރިއެވެ.

އޭސީސީން ބަލަމުން އަންނަ މައްސަލައަކާ ގުޅިގެން ކަމަށް ބުނެ ސަސްޕެންޑް ކުރީ ހުސްނުއްސުއޫދާއި މަހާޒު އަލީ ޒާހިރު އަދި ޑރ. އަޒްމިރާލްދާ އެވެ. އަދި 4 މާރިޗް 2025ގައި ރައީސް ޑރ.މުހައްމަދު މުއިއްޒު ގާނޫނު އަސާސީ އާ ޚިލާފުވެފައިވާ ކަމަށް ވިދާޅުވެ، ސުޕްރީމް ކޯޓުގެ ފަނޑިޔާރު ހުސްނުއްސުއޫދު އިސްތިއުފާ ދެއްވިއެވެ. އޭގެފަހުން 19 މާރޗް 2025 ގައި ސުޕްރީމް ކޯޓުގެ ފަނޑިޔާރުކަމުގެ މަގާމަށް، ހައި ކޯޓުގެ އިސް ފަނޑިޔާރު ހުސައިން ޝަހީދު ވަނީ އައްޔަން ކުރައްވާފަ އެވެ.

ފަނޑިޔާރު މަހާޒު، ޑރ. އަޒްމިރާލްދާ ސަސްޕެންޑް ކޮށްފައިވަނީ ސުޕްރީމް ކޯޓަށް ނުފޫޒު ފޯރުވުމުގެ ގޮތުން ކަމަށް ގިނަ ބަޔަކު ދަނީ ތުހުމަތު ކުރަމުންނެވެ. އެއީ ރައްޔިތުންގެ މަޖިލީހުގެ މެންބަރުން ސިޔާސީ ޕާޓީ ބަދަލުކުރުމުން ގޮނޑިގެއްލޭގޮތަށް ގާނޫނުއަސާސީ އަށް ގެނައި ބަދަލު ބާތިލުކުރުމަށް ސްޕްރީމް ކޯޓަށް ހުށަހެޅުއްވި މައްސަލަ ހުއްޓުވުމުގެ ގޮތުން ކަމަށް ތުހުމަތު ކޮށްފައިވެ އެވެ.

މިމައްސަލަ ހުށަހެޅުއްވި ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަދި ގާނޫނީ ވަކީލު އަލީ ހުސެއިން ވެސް ވަނީ ކަންބޮޑުވުން ފާޅުކުރައްވާފައެވެ. އަދި އަލީ ހުސެއިން ހުށަހެޅުއްވި މި މައްސަލައިގެ ތެރެއަށް ރާއްޖޭގެ އެންމެ ބޮޑު އިދިކޮޅު ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި ދަ ޑެމޮކްރަޓްސް ވެސް ވަނީ ތަދައްހުލު ވެފައެވެ.

އެ މައްސަލައިގައި ބުނެފައި ވަނީ ޕާޓީ ބަދަލުކުރުމުން ގޮނޑި ގެއްލޭ އިސްލާހު ގާނޫނުއަސާސީ އަށް ގެނެސްފައިވަނީ ގާނޫނު އަސާސީގެ 4 ވަނަ، 8 ވަނަ، 26، 75، އަދި 90 ވަނަ މާއްސާއާ ހިލާފަށް ކަމަށެވެ. އަދި އެ ބަދަލަކީ ސީދާ ގާނޫނުއަސާސީގެ އޮނިގަނޑާ ހިލާފަށް ގެނެސްފައިވާ ބަދަލެއް ކަމަށެވެ.

ގާނޫނުއަސާސީއަށް އިސްލާހު ގެނައި މައްސަލަ ސުޕްރީމް ކޯޓުގައި އެއް އަޑުއެހުން 17 ފެބްރުއަރީ 2025 ގައި ކުރިއަށް ގެންދެވުނު ނަމަވެސް އޭގެފަހުން މި މައްސަލާގެ އެއްވެސް އަޑު އެހުމެއް ކުރިއަށް ގެންދެވިފައިނުވެއެވެ.

މި މައްސަލަ ބައްލަވާނީ ހަތް ފަނޑިޔާރުންގެ ބެންޗުން ކަމަށްވާއިރު، ދެ ފަނޑިޔާރުން ސަސްޕެންޑްކޮށްފައިވާތީ މައްސަލަ ވަނީ ކުރިއަށް ގެންދެވޭ ގޮތް ނުވެފަ އެވެ.