ގާސިމްގެ ފުރާނަ ނުރައްކަލުގައި:ޑޮކްޓަރު
ޓެސްޓްތައް ރާއްޖޭން ހެދެން ނެތް
ގާސިމް އިބްރާހިމް ވެއްޓުމުން ކްރިމިނަލް ކޯޓުން ނެރެގެން އެމްބިއުލަންސަށް އަރުވަނީ
ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމްގެ ހިތުގެ ޓެސްޓްތައް ރާއްޖޭން ހެދެން ނެތް ކަމަށާއި ފަރުވާ ދެއްވުން ލަސްކޮށްފި ނަމަ ފުރާނައަށް ނުރައްކާ ވެދާނެ ކަމަށް އައިޖީއެމްއެޗްގައި ގާސިމަށް ފަރުވާ ދެއްވާ ޑޮކްޓަރު ވިދާޅުވި އެވެ.
ގާސިމްގެ މައްޗަށް ކުރާ ދައުވާގެ އަޑުއެހުމަކަށް ކޯޓުގައި މިއަދު ހުންނަވަނިކޮށް އަނބުރައިގެނެގެން ގާސިމް ވެއްޓުމާ ގުޅިގެން، ސަރުކާރުގެ މައި ހޮސްޕިޓަލް، އައިޖީއެމްއެޗްގައި އެޑްމިޓްކޮށް ގާސިމަށް ގެންދަވަނީ ފަރުވާ ދެއްވަމުންނެވެ.
ހިތުގެ އާލާސްކަންފުޅު ހުންނަ ގާސިމްގެ ސިއްހީ ހާލަތާ ގުޅޭ ގޮތުން، އޭނާ ބެއްލެވި އައިޖީއެމްއެޗްގެ ހިތުގެ ހާއްސަ ޑޮކްޓަރު އަލީ ޝަފީގު ދެއްވާފައިވާ ލިޔުމުގައިވާ ގޮތުން ރާއްޖޭން ހެދެން ނެތް ހިތުގެ ދެ ޓެސްޓެއް ހެދުމަށްޓަކައި ގާސިމް ވީހާ ވެސް އަވަހަކަށް ރާއްޖޭން ބޭރަށް ގެންދަވަންޖެހެ އެވެ.
ޑޮކްޓަރު ވިދާޅުވެފައިވާ ދެ ޓެސްޓަކީ އިލެކްޓްރޮފިޒިއޮލޮޖީ ސްޓަޑީޒް (އީޕީއެސް) އާއި ރޭޑިއޯފްރެކްއެންސީ އެބްލޭޝަން (އާރުއެފްއޭ) އެވެ. މި ދެ ޓެސްޓް ނުހަދައި އެކަށީގެންވާ ފަރުވާއެއް ނުދެވޭއިރު، ފަރުވާ ދެއްވުން ލަސްކޮށްފި ނަމަ ގާސިމްގެ ހިތުގެ ވިންދު ގޯސްވެ، ފުރާނައަށް ނުރައްކާ ވެދާނެ ކަމަށް ޑޮކްޓަރުގެ ލިޔުމުގައި ބުނެފައިވެ އެވެ.
މަޖިލީހުގެ މެމްބަރުންނަށް ރިޝްވަތު ދޭން އުޅުނު ކަމަށް ބުނެ ގާސިމަށް ދައުވާކޮށް ޝަރީއަތް ފެށި ފަހުން ހިތުގެ އާލާސްކަންފުޅުގައި މީގެ ކުރިން ދެ ފަހަރެއްގައި އެޑްމިޓްކޮށް ފަރުވާ ދީފައިވެ އެވެ. އޭރު ވެސް ގާސިމް ރާއްޖެއިން ބޭރަށް ގެންދަން ޑޮކްޓަރުން ލަފާ ދެއްވި އެވެ. ނަމަވެސް އޭނާގެ ޕާސްޕޯޓް އަދި ވެސް ދުލެއް ނުކުރެ އެވެ.
ގާސިމްގެ ޕާސްޕޯޓް ހިފެހެއްޓީ ބޭސްފަރުވާ އަށް ރާއްޖޭން ބޭރަށް ވަޑައިގަތުމަށް އެއާޕޯޓަށް ވަޑައިގެން ހުންނަވަނިކޮށެވެ.
ގާސިމްގެ ފުރާނަ އަށް ނުރައްކާ ވެދާނެ ކަމަށް ޑޮކްޓަރު ވިދާޅުވެފައިވާއިރު، އައިޖީއެމްއެޗުން ނެރުނު ބަޔާނެއްގައި ބުނެފައި ވަނީ ގާސިމް ގެނެވުނީ ހިތުގެ ވިންދު އަވަސްވުމުގެ ސަބަބުން އަނބުރައިގަނެގެން ކަމަށާއި ގާސިމްގެ ހާލުކޮޅު މިވަގުތު ރަނގަޅު ކަމަށެވެ. އަދި ގާސިމް އެޑްމިޓްކުރެވިފައިވަނީ އޮބްޒަވޭޝަނަށް ކަމަށް ވެސް ބަޔާނުގައި ބުނެފައިވެ އެވެ.
