ލުބުނާނުގެ ސިޑޯން އަށް އިސްރާއީލުން ދިން ވައިގެ ހަމަލާއެއްގައި ހަމާސްގެ ކޮމާންޑަރަކާއި، އޭނާގެ ދެ ދަރިން ޝަހީދުކޮށްލައިފި އެވެ.

ލުބުނާނުގެ ބޮޑުވަޒީރު ނަވާފް ސަލާމް ވަނީ މި ހަމަލާއަކީ "ލުބުނާނުގެ އިސްތިގުލާލަށް ފާޅުގައި ދިން ހަމަލާއެއް" ކަމަށާއި އިސްރާއީލާ އެކު ނޮވެމްބަރު 27 ގައި ވެފައިވާ ހަނގުރާމަ ހުއްޓާލުމާ ހިލާފު އަމަލެއް ކަމަށް ބުނެ އެކަން ކުށްވެރި ކުރައްވާފަ އެވެ.

އިސްރާއިލުން ނެރުނު ބަޔާނެއްގައި ބުނެފައިވަނީ ރޭގަނޑުގެ ވަގުތެއްގައި (ސިފައިންނާއި ޑޮމެސްޓިކް ސެކިއުރިޓީ އެޖެންސީ ޝިން ބެޓް) ސިޑޯން ސަރަހައްދަށް އަމާޒުކޮށްގެން ހަމަލާދީ، ލުބުނާނުގައި ހަމާސްގެ ހުޅަނގު މައިދާނުގެ ކޮމާންޑަރު ހަސަން ފަރުހަތު އަވަހާރަކޮށްލާފައިވާ ކަމަށެވެ.

ބަޔާނުގައި އިތުރަށް ބުނެފައިވަނީ ފަރުހަތަކީ 2023 ވަނަ އަހަރުގެ އޮކްޓޯބަރު މަހު އިސްރާއިލުން މީހުން ރަހީނުކޮށް ގެންދިޔަ މައްސަލައާއި ގުޅިގެން ޣައްޒާގައި ހަނގުރާމަ ފެށި، އެ ހަނގުރާމައިގެ ތެރޭގައި އިސްރާއީލުގެ ސިފައިންނާއި އާންމުންނަށް އެތައް ހަމަލާތަކެއް ފަރުހަތު ރާވާފައިވާ ކަމަށެވެ.

އޭގެ ތެރޭގައި 2024 ވަނަ އަހަރުގެ ފެބްރުއަރީ މަހުގެ 14 ވަނަ ދުވަހު އިސްރާއީލުގެ ސަފާދު ޓައުން އަށް ރޮކެޓު ހަމަލާދީ އިސްރާއީލުގެ ސިފައިންގެ މީހަކު މަރުވި ކަމަށް ވެސް އަސްކަރިއްޔާއިން އިތުރަށް ބުނެފައިވެ އެވެ.

ހަމާސްގެ އަސްކަރީ ވިންގް، އެޒެޑިނޭ އަލް ގައްސާމް ބްރިގޭޑްސް އިން ނެރުނު ބަޔާނެއްގައި ކަށަވަރުކޮށްދީފައިވާ ގޮތުގައި ފަރުހަތު ޝަހީދުވެފައިވާ އޮރި. އިސްރާއިލުން ދިން ހަމަލާގައި އޭނާގެ ދަރިފުޅު ހަމްޒާ އަދި އޭނާގެ ބޮޑު އަންހެން ދަރިފުޅު ޖެނާން ވެސް ޝަހީދުވެފައިވެ އެވެ.

އޭއެފްޕީގެ ނޫސްވެރިއަކު ކިޔައިދިން ގޮތުގައި ހަތަރު ވަނަ ފަންގިފިލާގެ ފްލެޓުގައި އަލިފާން ރޯވެ، އެޕާޓްމަންޓް ބްލޮކާއި ޖެހިގެން ހުރި އިމާރާތްތަކަށް ބޮޑެތި ގެއްލުންތަކެއް ލިބި އާބާދީ ބޮޑު ސަރަހައްދުގައި ބިރުވެރިކަން އުފެދިގެން ދިޔައެވެ.

ލުބުނާނުގެ ދައުލަތުގެ މީޑިއާތަކުން ވަނީ ފަތިހު 3:45 ގައި ސިޑޯނަށް ހަމަލާދީ، މަދުވެގެން ތިން މީހަކު މަރުވެފައިވާ ކަމަށް ބުނެފަ އެވެ. އެމަޖެންސީގައި މަސައްކަތް ކުރާ މީހުން ވަނީ ހަމަލާދިން އިމާރާތުން 3 މީހެއްގެ ހަށިގަނޑު ހޯދާފައި ކަމަށް އެންއެންއޭ އިން ބުނެފައިވެއެވެ.

ލުބުނާނުގެ ބޮޑުވަޒީރު ވަނީ އިސްރާއީލަށް އެންމެ ބޮޑު ޕްރެޝަރެއް ދިނުމަށާއި، އެކި ސަރަހައްދުތަކަށް އަމާޒުކޮށްގެން ދޭ ހަމަލާތައް ހުއްޓުވުމަށް މަޖުބޫރުކުރުމަށް ގޮވާލާފައެވެ.

މި ހަފްތާގެ ކުރީކޮޅު އިސްރާއީލުން ބެއިރޫތުގެ ދެކުނަށް ހަމަލާދީ، ހިޒްބުﷲ ގެ ފަލަސްތީނުގެ ލިއޭޝަން އޮފިސަރަކު މަރާލާފައިވެއެވެ. އަދި ފަރުހަތު ޝަހީދުވި ހަމަލާއަކީ އެފަހުން ދިން އެފަދަ ދެވަނަ ހަމަލާކަމަށް ރިޕޯޓްތައް ބުނެއެވެ.

އެ ހަމަލާފައި ހަތަރު މީހަކު މަރުވެފައިވާ ކަމަށް ލުބުނާނުގެ ހެލްތު މިނިސްޓްރީން ރިޕޯޓްކޮށްފައިވާއިރު އޭގެ ތެރޭގައި އަންހެނަކު ވެސް ހިމެނެ އެވެ. ލުބުނާނުގެ ލީޑަރުން އެ ހަމަލާ ކުށްވެރިކުރި ނަމަވެސް އިސްރާއީލުން ބުނީ މިއީ ދާދި ފަހުން ހިޒްބުﷲ އިން ދިން ރޮކެޓް ހަމަލާތަކުގެ ރައްދުގައި ދިން ހަމަލާއެއް ކަމަށެވެ.