ޕްރިމިއަރ ލީގުގައި ސެމީ އޮޓޮމޭޓެޑް އޮފްސައިޑް ޓެކްނޮލޮޖީ ބޭނުންކުރަން ފަށަނީ

އިނގިރޭސި ޕްރިމިއަރ ލީގުން ސެމީ އޮޓެމޭޓެޑް އޮފްސައިޑް ޓެކްނޮލޮޖީ ބޭނުންކުރަން ނިންމާފައިވާ ކަމަށް މީޑިއާ ރިޕޯޓުތައް ބުނެފިއެވެ.

ރިޕޯޓުތައް ބުނާ ގޮތުން މި ޓެކްނޮލޮޖީ ބޭނުން ކުރަން ފަށާނީ މި މަހުގެ 12 ވަނަ ދުވަހުން މެންޗެސްޓާ ސިޓީ އާއި ކްރިސްޓަލް ޕެލަސް ބައްދަލުކުރާ މެޗުންނެވެ.

މީގެ ކުރިން ވަނީ މިދިޔަ މަހު ކުޅުނު އެފްއޭކަޕް ފަސް ވަނަ ބުރުގެ މެޗުތަކުގައި މި ސެމީ އޮޓެމޭޓެޑް އޮފްސައިޑް ޓެކްނޮލޮޖީ ޓެސްޓްކޮށްފަ އެވެ. މިއަށްފަހު ޕްރެމިއާ ލީގުން ވަނީ މި ޓެކްނޮލޮޖީ ލީގުގައި ބޭނުން ކުރުމުގެ ރަސްމީ ހުއްދަ ދީފަ އެވެ.

ސެމީ އޮޓެމޭޓެޑް އޮފްސައިޑް ޓެކްނޮލޮޖީ އަކީ އޮފްސައިޑް ދެނެގަތުމުގައި އަވަސް އަދި ވަރަށް އެކިއުރޭޓް ސޮފްޓްވެއާއެކެވެ. ވާޗުއަލް އޮފްސައިޑް ލައިންތަކާއި ގްރެފިކްސްއާއެކު ކުޅުންތެރިޔާގެ އަސްލު ޕޮޒިޝަނާއި މޫވްމަންޓް މި ޓެކްނޮލޮޖީގެ އެހީގައި މާ ރަނގަޅަށް އަވަހަށް ހޯދައިގަނެވެ އެވެ.

ވީއޭއާރު ރެފްރީން މި ޕްރޮސެސް ކުރިއަށް ގެންދިއުމަށްފަހު ރެފްރީ އަށް އަދި ރެފްރީން ކުޅުންތެރިންނަށް ފަހުގެ ނިންމުން އަންގާނެ އެވެ. މި ޓެކްނޮލޖީ އެންމެ ފުރަތަމަ ބޭނުންކުރީ 2022 ވަނަ އަހަރު ގަތަރުގައި ބޭއްވި ވޯލްޑްކަޕް ފުޓްބޯޅަ މުބާރާތުގަ އެވެ. މިއަށްފަހު ޗެމްޕިއަންސް ލީގާއި ސްޕެނިޝް ލީގު އަދި އިޓާލިއަން ލީގުގައި ވެސް ދަނީ މި ޓެކްނޮލޮޖީ ބޭނުން ކުރަމުންނެވެ.

މި ޓެކްނޮލިޖީ ބޭނުން ކުރާއިރު ދަނޑުގައި 30 ކެމެރާ ބޭނުންކުރާނެ ކަމަށް ރިޕޯޓުތައް ބުނެއެ އެވެ.

ސެމީ އޮޓެމޭޓެޑް އޮފްސައިޑް ޓެކްނޮލޮޖީ އަކީ ޕީޖީއެމްއޯއެލް އާއި ސްޕޯޓްސް ޑޭޓާ އެންޑް ޓެކްނޮލޮޖީ ކުންފުނި ޖީނިއަސް ސްޕޯޓްސްއާ ގުޅިގެން ތަރައްގީކުރި ސިސްޓަމެކެވެ.