އީރާނުގެ ނިއުކްލިއާ މަޝްވަރާތައް ނާކާމިޔާބުވެއްޖެނަމަ އަސްކަރީ ހަމަނުޖެހުން އުފެދުން ގާތް ކަމަށް ފްރާންސުން ބުނެފި އެވެ.

އީރާނުގެ ނިއުކްލިއާ ޕްރޮގްރާމާ ބެހޭ ގޮތުން އާ އެއްބަސްވުމަކަށް ނާދެވިއްޖެ ނަމަ އަސްކަރީ ކުރިމަތިލުންތަކެއް ހިނގައިދާނެ ކަމުގެ އިންޒާރު ފްރާންސްގެ ފޮރިން މިނިސްޓަރު ޖީން ނޯއެލް ބެރޮޓް ދެއްވާފައި ވަނީ ބުދަ ދުވަހުއެވެ.

އެގޮތުން ރައީސް އިމަނުއެލް މެކްރޮންގެ ރިޔާސަތުގައި އީރާނާ ބެހޭ މަތީ ފެންވަރުގެ ބައްދަލުވުމަކަށް ފަހު ވާހަކަ ދައްކަވަމުން ފްރާންސްގެ ފޮރިން މިނިސްޓަރު ޖީން ނޯއެލް ބެރޮޓް ވިދާޅުވީ މި މަޝްވަރާތައް ކާމިޔާބުކުރުމަށް އޮތް ޑިޕްލޮމެސީގެ "ފުރުސަތުގެ ކުޑަދޮރު" ތެހެރާނާ އެކު ކުރިއަށްދާ މަސައކްަތްތަކަށް ބަލާ ނަމަ ހަނިވެފައިވާ ކަމަށެވެ.

"އިރާނާއި މެދު އެޅި ފިޔަވަޅުތަކުގެ (2015) އެއްބަސްވުމުގެ މުއްދަތު ހަމަވާން އަޅުގަނޑުމެންނަށް އޮތީ މަދު މަސްކޮޅެއް. ނާކާމިޔާބުވެއްޖެ ހާލަތެއްގައި އަސްކަރީ ކުރިމަތިލުމަކީ ގާތްގަނޑަކަށް ކޮންމެހެން ނުކޮށް ވާން ނެތް ކަމެއް ކަމަށް ބެލުމުގެ ފުރުސަތު އެބައޮތް." ބެރޮޓް ވިދާޅުވި އެވެ.

މި މައްސަލަ ހައްލުކުރުމަށް، ޔޫރަޕްގެ ބާރުތަކުން ދަނީ އެއްބަސްވުމަކަށް އައުމުގެ ވިސްނުމުގައި ޑިޕްލޮމެޓިކް މަގެއް އުފެއްދުމަށް މަސައްކަތް ކުރަމުންނެވެ. މިކަމުގެ މަގްސަދަކީ އަހަރުގެ މެދުތެރޭގައި އީރާނުގެ ޔޫރޭނިއަމް މުއްސަނދިކުރުމުގެ ހަރަކާތް ހުއްޓުވުމަށް އެއްބަސްވުމަކަށް އައުން ކަމަށް ބައިނަލްއަޤުވާމީ މީޑިއާތަކުން ވަނީ ރިޕޯޓްކޮށްފަ އެވެ.

އަނެއްކޮޅުން ތެހެރާނުން ދަނީ ނިއުކްލިއާ ހަތިޔާރު އުފެއްދުމަށް މަސައްކަތް ކުރާ ކަމަށް ތުހުމަތު ތަކުރާރުކޮށް ދޮގުކޮށް، އެގައުމުގެ ޕްރޮގްރާމަކީ ސުލްހަވެރި ޕްރޮގްރާމެއް ކަމަށް ބުނަމުންނެވެ. ޔޫރަޕްގެ ބާރުތަކުން ވަނީ އީރާނަށް އަލުން ނިއުކްލިއާ މަޝްވަރާތަކަށް ބާރުއެޅުމަށް ޕްރެޝަރު ކުރަން މަސައްކަތްކޮށްފަ އެވެ.

އެގޮތުން، އީރާނާއެކު ޓެކްނިކަލް ފެންވަރުގެ މީހުން ހިމެނޭ ގޮތަށް މިދިޔަ ހަފްތާގައި ގިނަ މަޝްވަރާތަކެއް ބާއްވާ މި މައްސަލަ އަށް ހައްލު ހޯދުމަށް ގައުމުތަކުން ވަނީ މަސައްކަތްކޮށްފަ އެވެ.

އެމެރިކާގެ ރައީސް ޓްރަމްޕް ވަނީ އީރާންގެ ސުޕްރީމް ލީޑަރު އާޔަތުالله އަލީ ޚާމަނާއީއަށް ވަގުތުން މަޝްވަރާތަކުގައި ބައިވެރިވުމަށް ގޮވާލާފައެވެ. އަދި ޓްރަމްޕް ވަނީ އީރާނުގެ ނިއުކްލިއާ ޕްރޮގްރާމާ ގުޅޭ ގޮތުން އެއްބަސްވުމަކަށް ނާދެވިއްޖެ ނަމަ ބޮން ގޮއްވާލުމާއި ސެކަންޑަރީ ޓެރިފް ނަގާނެ ކަމުގެ އިންޒާރު ހުކުރު ދުވަހު ދެއްވާފަ އެވެ. ހަމައެއާއި އެކު ޚާމަނާއީ ވަނީ އެއްވެސް ހަމަލާ އެއް ދީފި ނަމަ، އެ ހަމަލާ އަށް ބަދަލު ހިފުމަށް ވައުދުވެފަ އެވެ.