ހައި ކޯޓުގެ އިސްފަނޑިޔާރުކަމަށް ދެ ބޭފުޅަކު ކުރިމަތިލައްވައިފި އެވެ.

ހައިކޯޓުގެ އިސް ފަނޑިޔާރުކަމަށް ކުރިމަތިލައްވާފައިވަނީ މިހާރު ހައި ކޯޓުގައި މަސައްކަތް ކުރައްވަމުން ގެންދަވާ ފަނޑިޔާރު މުހައްމަދު ނިޔާޒާއި ފަނޑިޔާރު މުހައްމަދު ފައިސަލެވެ. މި ދެ ބޭފުޅުންނަކީ ވެސް މިހާރު ހައި ކޯޓުގައި މަސައްކަތްކުރައްވާ 10 ފަނޑިޔާރުންގެ ތެރެއިން އެންމެ ސީނިއަރ ދެ ފަނޑިޔާރުންކަން ފާހަގަކޮށްލެވެ އެވެ.

ފަނޑިޔާރު މުހައްމަދު ނިޔާޒް ވަނީ މެލޭޝިއާގެ އިންޓަނޭޝަނަލް އިސްލާމިކް ޔުނިވަސިޓީން މަތީ ތައުލީމު ހާސިލުކުރައްވާފައިވާފަ އެވެ. އޭނާ ހައި ކޯޓުގެ ފަނޑިޔާރުކަމަށް އައްޔަންކުރައްވާފައި ވަނީ ޖެނުއަރީ 25، 2018 ގައެވެ. ހަމައެހެންމެ، ނިޔާޒަކީ މިހާރު ޖުޑީޝަލް ސާވިސް ކޮމިޝަން (ޖޭއެސްސީ) ގެ ނައިބު ރައީސްކަން އަދާކުރައްވާ ބޭފުޅާ އެވެ.

ހައިކޯޓުގެ އިސް ފަނޑިޔާރުކަމަށް ކުރިމަތިލައްވާފައިވާ ފައިސަލްއަކީ ކުއްލިއްޔަތުއް ދިރާސާތިލް އިސްލާމިއްޔާއިން މަތީ ތައުލީމު ހާސިލުކުރައްވާފައިވާ ބޭފުޅެކެވެ. އަދި އޭނާ ހައި ކޯޓުގެ ފަނޑިޔާރުކަމުގެ ހުވާކުރައްވާފައި ވަނީ ޖުލައި 24، 2018 ގައެވެ. ފައިސަލަކީ ކުރީގައި ޖޭއެސްސީގެ ނައިބު ރައީސްކަމުގެ މަގާމު އާދަކުރައްވާފައިވާ ބޭފުޅެކެވެ.

ހައިކޯޓުގެ ފަނޑިޔާރުކަމަށް ކުރިމަތިލާން ޖުޑީޝަލް ސާވިސް ކޮމިޝަން (ޖޭއެސްސީ) އިން ފުރުސަތު ހުޅުވާލީ 21 މާރޗްގައެވެ. ހައިކޯޓުގެ ފަނޑިޔާރުގެ މަގާމު ހުސްވެފައި ވަނީ އެ ކޯޓުގެ އިސް ފަނޑިޔާރުގެ މަޤާމް އަދާކުރައްވަމުން ގެންދެވި ހުސައިން ޝަހީދު ސުޕްރީމް ކޯޓުގެ ފަނޑީޔާރު ކަމަށް މި މަހު މެދު ތެރޭގައި އައްޔަނު ކުރައްވާފައި ވާތީ އެވެ.

ޖޭއެސްސީން ވަނީ ހައިކޯޓުގެ ފަނޑިޔާރުކަމާއި، އިސް ފަނޑިޔާރުގެ މަޤާމަށް ކުރިމަތިލުމަށް ހުޅުވާލައްވާފަ އެވެ. ހައިކޯޓުގެ ފަނޑިޔާރުކަމަށް ކުތިމަތިލުމުގެ ފުރުސަތު އަންނަ އެޕްރިލް މަހުގެ 10 ވަނަ ދުވަހުގެ ހެނދުނު 10:00 އާއި ހަމައަށް ވަނީ ހުޅުވާލާފައެވެ. އަދި އިސް ފަނޑިޔާރު ކަމުގެ މަގާމަށް ކުރިމަތިލުމަށް ފުރުސަތު ހުޅުވާލައިފައިވަނީ މި ހިނގާ މާރޗް މަހުގެ 29 ވަނަ ދުވަހުގެ މެންދުރު 12:33 ޖެހުމާއި ހަމައަށެވެ.

ހައި ކޯޓުގެ ފަނޑިޔާރު ކަމަށް ކުރިމަތިލުމުގެ ޝަރުތުތަކުގެ ތެރޭގައި އުމުރު 25 އަހަރު ފުރުމާއި، އިސްލާމީ ޝަރީއާ، ނުވަތަ ގާނޫނުގެ ރޮނގުން ފުރަތަމަ ޑިގްރީ ހާސިލުކޮށްފައިވުމާއި، ފަނޑިޔާރު ކަމުގައި ނުވަތަ ގާނޫނީ ވަކީލު ކަން ކުރުމުގައި ނުވަތަ މި ދެ ކަމުގައި މަދުވެގެން ފަސް އަހަރު ދުވަހުގެ ތަޖުރިބާ ލިބިފައިވުން ހިމެނެ އެވެ.

ހަމައެހެންމެ ހައި ކޯޓުގެ ހިންގުން ވަގުތީ ގޮތުން ފަނޑިޔާރު މުހައްމަދު ފައިސަލް އާއި ވަނީ ހަވާލުކޮށްފަ އެވެ. ހައި ކޯޓުގެ އިސް ފަނޑިޔާރު ޝަހީދު ސުޕްރީމް ކޯޓުގެ ފަނޑިޔާރު ކަމަށް އައްޔަންކުރައްވާފައި ވަނީ ކުރިން ސުޕްރީމް ކޯޓުގެ ފަނޑިޔާރު ކަމުގައި ހުންނެވި ހުސްނުއްސުއޫދު ފަނޑިޔާރުކަމުގެ މަގާމުން އިސްތިއުފާ ދެއްވާފައިވާތީ އެވެ. ސުއޫދު އިސްތިއުފާދެއްވީ އޭނާގެ ސުލޫކީ މައްސަލަ އެއް ބަލާ ޖޭއެސްސީން އޭނާ ސަސްޕެންޑްކުރުމުންނެވެ.