އިސްލާމީ ގައުމެއްގައި އޮންނަ ވެރިކަމެއްގައި ހަލާލު ސްޓިކާ އިންނަން ޖެހޭނޭ ކަމަށާއި ނަމަވެސް ރައީސް ޑރ. މުޙައްމަދު މުއިއްޒުގެ މި ވެރިކަމުގައި ހަލާލު އިސްޓިކާ އެއް ނެތް ކަމަށް މާފަންނު މެދު ދާއިރާގެ ކުރީގެ މަޖިލިސް މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.

ބޮންޑާ މިފަދައިން ވިދާޅުވެފައި ވަނީ ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުންނެވެ.

ރައީސް ޑރ.މުހައްމަދު މުއިއްޒު ވެރިކަމަށް އައުމަށް ޓަކައި ވެވަޑައިގެންނެވި ރިޔާސީ އެންމެ ބޮޑު އެއް ވައުދަކީ ރައްޔިތުންގެ ދިރިއުޅުމާއި، ރައްޔިތުންގެ ކުރިއެރުމާއި، ފައިދާވާ ހުރިހާ ކަމެއް ކޮށްދެއްވާނެ ކަމަށް ވެވަޑައިގަތް ވައުދެވެ. ވެރިކަމަށް އައުމަށް ޓަކައި އެމަނިކުފާނު ރައްޔިތުންނަށް ބޯހިޔާވަހިކަން ދެއްވާނެ ކަމުގެ ފުރިހަމަ ޔަގީން ދެއްވި އެވެ. އެހެން ނަމަވެސް މިއަދާއި ހަމައަށް ވެސް މި ވައުދު ރައީސް ފުއްދަވަމުން ގެންދަވާތަން ނުފެނެ އެވެ.

މިކަމާއި ގުޅުވައި އިބްރާހީމް ރަޝީދު ވިދާޅުވީ މުޅި ގައުމު ދަރަނިވެރިވެ، ހަނާވަމުން އަންނަ ކަމަށާއި ރައީސް މުއިއްޒު ރައްޔިތުންނަށް ދެއްވަން ވައުދުވެވަދައިގެންނެވި ބޯހިޔާވަހިކަމުގެ ވައުދުވެސް އަދި ނުފުއްދަވާ ކަމަށެވެ. އެކަމުގެ ސަބަބުން ގައުމުގެ ރައްޔިތުން ވަރަށް ބޮޑަށް ހާލުގައި ޖެހިފައިވާ ކަން ބޮންޑާ ފާހަގަ ކުރެއްވި އެވެ.

ބޮންޑާ ވިދާޅުވީ މި ގައުމުން މިހާރު މި ފެންނަނީ މުޅިން އެހެން މައްޒަރެއް ކަމަށާއި އެއީ ރައީސް މުއިއްޒުގެ ވެރިކަމަށް ވަޑައިގަތުމަށް ވެވަޑައިގަތް ވައުދުތަކާއި މުޅިން ޚިލާފަށް ކަންކަން ހިނގަމުން ދާތަން ކަމަށެވެ. އެހެން ކަމުން މިއަދު މި މުޅި ގައުމުވެސް ގޮވާލަމުން އެ ގެންދަނީ ރައީސް މުއިއްޒުގެ މި ވެރިކަމަކީ ހަލާލު ވެރިކަމެއް ނޫން ކަމުގައެވެ. އެގޮތުން މި ވެރިކަމުގައި ހަލާލު ސްޓިކާއެއް ވެސް ނެތް ކަމަށް ރައްޔިތުން ބުނަމުން އެބަ ގެންދާ ކަމަށް ބޮންޑާ ވިދާޅުވި އެވެ.

ބޮންޑާ ވިދާޅުވީ މިއީ އިސްލާމީ ދައުލަތެއް ކަމަށާއި އެހެން ކަމުން އިސްލާމީ ދައުލަތެއްގައި ހަލާލު ސްޓިކާއަކީ ހަމަ ކޮންމެ ހެންވެސް ހުންނަން ޖެހޭނޭ އެއްޗެއް ކަމަށެވެ.

ބޮންޑާ ވިދާޅުވީ ރައީސް މުއިއްޒު ވެރިކަމަށް ވަޑައިގަތުމުގެ ކުރިން ލޭ އަޅާ ތެލަސީމިއާ ކުދިން ބަލަހައްޓާ އެ ކުދިންގެ ބެލެނިވެރިންނަށް ފްލެޓުތައް ދޭނެކަމަށް ވިދާޅުވެ، މާތް ﷲ ގަންދީ ހުވާކުރި ކަމަށާއި އަދި ހާއްސަ އެހީއަށް ބޭނުންވާ ކުދިންނަށް ވެސް އެ އޮންނަ އުސޫލުގެ މަތިން ފްލެޓު ދޭނެ ކަމަށް ވައުދުވެ ރައީސް މުއިއްޒު މާތް ﷲ ގަންދީ ހުވާކުރައްވަވާފައިވާ ކަމަށެވެ. އެހެން ނަމަވެސް ވެރިކަމަށް ވަޑައިގަތުމާއި އެކު އޭރު ކުރެއްވި ހުރިހާ ހުވައެއްގެ މަތިން ރައީސް މިއަދު ހަނދުމަފުޅުނެއް ކަމަށް އޭނާ ވިދާޅުވި އެވެ.

ބޮންޑާ ވިދާޅުވީ ރައީސްގެ މިފަދަ އަމަލުފުޅާއި އެކު މި ވެރިކަމުގައި ހަލާލު ސްޓިކާއެއް ނެތް ކަމަށް ރާއްޖޭގެ ރައްޔިތުން ބުނަމުން އެ ގެންދަނީ އެހެން ވެ ކަމަށެވެ. ރައްޔިތުން ބުނާހެން މި ސަރުކާރުގައި ހަލާލު ސްޓިކާ ހަމަ ހަގީގަތުގައި ވެސް ނެތް ކަން މިއަދު އެނގިހާމަވެއްޖެ ކަމަށް ބޮންޑާ ވިދާޅުވި އެވެ.

ބޮންޑާ ވިދާޅުވީ ވެރިކަމެއްގައި ހަލާލު އިންޓިކާއެއް އިންނަން ޖެހޭނޭ ކަމަށާއި ހަލާލު ސްޓިކާ އިންނަން ޖެހޭނީ ހަމަ އެކަނި އިސްލާމިކް މިނިސްޓްރީގައި އެކަނި ނޫން ކަމަށެވެ. އަދި އިސްލާމީ ގައުމެއްގައި އޮންނަ އިސްލާމީ ދައުލަތެއް ގައި އޮންނަ އުސޫލުގެ މަތިން ހަލާލު ކޮށްގެން ނޫން ގޮތަކަށް ވެރިކަން ނުކުރެވޭނޭ ކަމަށާއި ވެރިކަން ކުރެވޭނީ ހަލާލު ކޮށްގެން ކަމަށް އޭނާ ވިދާޅުވި އެވެ.