ރޮނާލްޑޯ އަކީ އަދިވެސް ޕޯޗުގަލް ޓީމަށް މުހިންމު ކުޅުންތެރިއެއް: ރޮބާޓޯ މާޓިނޭޒް

ޕޯޗުގަލް އާއި އަލް ނަޞްރުގެ ކެޕްޓަން ކްރިސްޓިއާނޯ ރޮނާލް އަކީ އަދިވެސް ޕޯޗުގަލް ގައުމީ ފުޓުބޯޅަ ޓީމަށް ވަރަށް މުހިންމު ކުޅުންތެރިއެއް ކަމަށް ޕޯޗުގަލް ގައުމީ ޓީމުގެ ކޯޗު ރޮބާޓޯ މާޓިނޭޒް ބުނެފި އެވެ.

ޕޯޗުގަލް ގައުމީ ފުޓުބޯޅަ ޓީމަށް މިހާތަނަށް އެންމެ ގިނަ ލަނޑު ޖަހައިދީފައިވާ ކެޕްޓަން ކްރިސްޓިއާނޯ ރޮނާލްޑޯ އާއި ގުޅުވައި ގިނަ މީޑިއާތަކަކުންނާއި ބައެއް ފަރާތްތަކުން އަންނަނީ ރޮނާލްޑޯގެ ކުޅުންދައްވާކަން ފާހަގަކޮށް އޭނާ އަށް ޕޯޗުގަލް ގައުމީ ޓީމުގެ ސްކޮޑުން ފުރުސަތު ނުދިނުމަށް ގޮވާލަމުންނެވެ.

އެގޮތުން ބައެއް ފަރާތްތަކުން ފާހަގަކޮށްފައިވާ ގޮތުގައި ޕޯޗުގަލް ގައުމީ ފުޓުބޯޅަ ޓީމުގައި މިހާރު ރޮނާލްޑޯއަށް ވުރެ، ފެންވަރުގެ ގޮތުން މާ ރަނގަޅު ޒުވާން ކުޅުންތެރިން އެބަ ތިއްބެވެ. އެހެން ކަމުން ރޮނާލްޑޯ ގެ ބޭނުމެއް މިހާރު ޕޯޗުގަލް ގައުމީޓީމަަށް ނެތް ކަމަށް އެ ފަރާތްތަކުން ބުނެއެވެ.

މިކަމަށް ރައްދު ދެއްވާ ކޯޗު މާޓިނޭޒް ބުނީ ރޮނާލްޑޯގެ އަސްލުފެންވަރު މިހާރު ނުދެއްކޭ ކަމަށް ޤަބޫލުކުރާ ކަމަށާއި ނަމަވެސް އަދިވެސް އޭނާ އަކީ ގައުމީ ޓީމަށް މުހިންމު ކުޅުންތެރިއެއް ކަމަށެވެ. އަދި ކޮންމެ ބަޔަކު ކޮންމެ ގޮތަކަށް ވާހަކަ ދެއްކި ކަމުގައި ވީ ނަމަވެސް ރޮނާލްޑޯ އަކީ ލަނޑު ޖެހުމުގެ ހުނަރު ހުރި މޮޅު ކުޅުންތެރިއެއް ކަމަށް އޭނާ ބުންޏެވެ.

އޭގެ ހެއްކެއްގެ ގޮތުގައި މާޓިނޭޒް ފާހަގަކުރީ އެންމެ ފަހުން ނޭޝަންސް ލީގުގައި ޑެންމާކް އާއި ދެކޮޅަށް ޕޯޗުގަލް ކުޅުނު މެޗުގައި ރޮނާލްޑޯ ޖެހި ގޯލާއި ދެއްކި މޮޅު ކުޅުމެވެ.

ގަބޫލުކުރަން، ރޮނާލްޑޯގެ ޒުވާން އުމުރުގައި ކުޅުނު މޮޅު ކުޅުން ނުކުޅެވޭކަން. އެހެން ނަމަވެސް ރޮނާލްޑޯ އަކީ އަދިވެސް ލަނޑު ޖެހުމުގެ ހުނަރު ހުރި މޮޅު ކުޅުންތެރިއެއް. އޭނާ އަކީ ޕޯޗުގަލް ގައުމީ ޓީމަށް ވެސް މުހިންމު ކުޅުންތެރިއެއް

ރޮބާޓޯ މާޓިނޭޒް

ރޮނާލްޑޯ ބައެއް ފަރާތްތަކުން ފާޑުކިޔަމުން ގެނދިއަ ނަމަވެސް، އޭނާ އަކީ ވެސް ދުނިޔޭގެ ފެންވަރުގައި މޮޅު ކުޅުންތެރިއެއް ކަމަށް މާޓިނޭޒް ބުންޏެވެ. އޭނާ ބުނީ ރޮނާލްޑޯ ޕޯޗުގަލް ގައުމީ ޓީމުގައި ކުޅެން ބޭނުންވާހާ ދުވަހަކު އެ ފުރުސަތު ރޮނާލްޑޯ އަށް އޮންނާނޭ ކަމަށެވެ.

މާޓިނޭޒް ބުނީ ރޮނާލްޑޯ އަކީ ދުނިޔޭގެ އެހެން ކުޅުންތެރިންނާއި ޚިލާފަށް އާދަޔާއި ޚިލާފު ހުނަރުތަކެއް ލިބިފައިވާ ކުޅުންތެރިއެއް ކަމަށެވެ. އެހެން ކަމުން ރޮނާލްޑޯގެ ބޭނުން އަދިވެސް ޕޯޗުގަލް ޓީމަށް ހިފޭނެ ކަމާއި މެދު ޝައްކުނުކުރާ ކަމަށް މާޓިނޭޒް ވަނީ ބުނެފަ އެވެ.