ގޯތީގެ ވައްކަމުގެ ވާހަކަވެސް މަޑުމަޑުން ހަނދާން ނައްތާލަންވީތޯއެވެ؟
26 މާރިޗު 2025 | ބުދަ 11:52ބިންވެރިޔާ ސްކީމް ގޯތީގެ ވައްކަމާއި ގުޅިގެން ޕާސްޕޯޓު ހިފެހެއްޓި ހުރިހާ އެންމެންގެ ޕާސްޕޯޓުތައް ދޫކޮށްލައިފި. ގޯތީގެ ވައްކަމުގެ ވާހަކަވެސް މަޑުމަޑުން ހަނދާން ނައްތާލަންވީތޯއެވެ؟ އާއްމު މީހާ އަށް ހައްގު މިންވަރަކީ މިއީތޯ؟
އެޗްޑީސީގެ އެމްޑީ ފަޒުލް ރަޝީދު
މިއަދު ހޭލައިގެން ނޫސްތައް ބަލާލި އިރު ފެނުނީ ބިންވެރިޔާ ސްކީމް ގޯތީގެ ވައްކަމާއި ގުޅިގެން ޕާސްޕޯޓު ހިފެހެއްޓި ހުރިހާ އެންމެންގެ ޕާސްޕޯޓުތައް ދޫކޮށްލި ވާހަކައެވެ. ހިތަށް އެރިއެވެ. މި ވާހަކަ ވެސް ދެން މި ނިމެނީތާއެވެ.
ވައްކަމާއި ކޮރަޕްޝަނާއި ޚިޔާނާތުގެ ވާހަކަ ދެކެވުނީމަ މަށަކަށްވާ ނޭނގެއޭ ބުނެފަ ނިންމާލަންވީއެވެ. ގޯތީގެ ވައްކަމާއި ގުޅިގެން ކޯޓު އަމުރެއްގެ ދަށުން 20 މީހެއްގެ ޕާސްޕޯޓު ހިފަހައްޓާފައިވަނީ މިދިޔަ ޑިސެންބަރު މަހުގެ ތެރޭގައެވެ. އޭރު އެ ވެރިން ފިލާފާނެ ވާހަކަ އާއި އެ ވެރިންގެ ވައްކަމުގެ ފުންމިން ނޭނގޭ ވާހަކަ ނިކަން އަޑު ހަރުކޮށް ދައްކަމުން އައެވެ.
އެގޮތުން އޭރު ޕާސްޕޯޓު ހިފެހެއްޓި މީހުންގެ ތެރޭގައި އެޗްޑީސީގެ އޭރުގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު އަދި އޭނާގެ ބޭބެ މޯލްޑިވްސް ވޯޓާ އެންޑް ސްވަރޭޖް (އެމްޑަބްލިޔުއެސްސީ)ގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެއެވެ. މިހާރު ފުލުހުން ބުނީ މި މައްސަލާގެ ތުހުމަތުގައި ހިފެހެއްޓި ހުރިހާ އެންމެންގެ ޕާސްޕޯޓު ދޫކޮށްލާފައިވާ ކަމަށެވެ. ނަމަވެސް މި މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ބުނެއެވެ.
ސުވާލަކީ ކުރިން ފިލާފާނެ ކަމަށް ހީވި ބިރު މިހާރު ނެތުނީތޯއެވެ؟ ނޫނީ ކުރި ވައްކަމުގެ ތުހުމަތުގެ ނިސްބަތް ކުޑަވީތޯއެވެ. ތަހުގީގު ކުރިއަށް ގޮސްފައިވާ ހިސާބާއި ގުޅޭގޮތުން މައުލޫމާތެއް ނުދެއްވައެވެ. އަދި މިމައްސަލާއާ ގުޅޭ އިތުރު ތަފްސީލެއް ފުލުހުން ހާމަކޮށްފައިނުވެ އެވެ. އާޢްމުން ކުރާ ސުވާލުތަކަށް ދެއްވަނީ ބީރު ކަންފަތެކެވެ.
މިކަހަލަ ކޮންމެ ތުހުމަތެއްގެ ވާހަކަ ދައްކަނީ އާއްމުންގެ ކަންބޮޑުވުން ހިނދެންދެންނެވެ. ދެން އަނެއްކާވެސް ދައްކަންވީ އާ ވައްކަމެއް އާ ތުހުމަތެއް، އާ ޚިޔާނާތެއްގެ ވާހަކަ އެވެ. މިހާ އަވަހަށް ކަންކަން ހަނދާންނައްތާލާ ނަމަ ސީރިއަސްކަމާއި އެމު މައްސަލަ ބަލާނެ ކަމަށް އެ ބުނާ ބުނުމަށް އާއްމުން އިތުބާރު ކުރާނީ ކިހިނެތްތޯއެވެ.
އާއްމުންގެ ގޯއްޗާއި ފްލެޓްތައް ނުލިބިގެން އެ އާއްމުން ހަނާވަނީ އެވެ. އެކަމަކު ތުހުމަތުތައް ކުރެވޭ މީހުން ޖަވާބުދާރީ ކުރުވޭނެ ގޮތެއް ނެތި މަޑުމަޑުން މަޑުމަޑުން އެ ވާހަކަތައް އޮބެނީ އެވެ. ވެރިމީހާ ތިމަން މަނިކުފާނަށް އެކަންކަން ނޭނގެއޭ ބުނެފަ ފަރުޖައްސާލީމަ ނިމުނީ އެވެ. ގޯތީގެ ވައްކަމުގެ ވާހަކަވެސް މަޑުމަޑުން ހަނދާން ނައްތާލަންވީތޯ އެވެ؟ އާއްމު މީހާ އަށް ހައްގު މިންވަރަކީ މިއީތޯ އެވެ.
