މި ސަރުކާރުގައި މަގުމަތިން ނޫން ގޮތަކަށް އެއްވެސް ހައްގެއް ނުލިބޭނެ: މޭޔަރު އާޒިމް
26 މާރިޗު 2025 | ބުދަ 08:45އެއް އަހަރުން އަނެއް އަހަރަށް ބޯހިޔާވަހިކަމުގެ މައްސަލަ ދަނީ ބޮޑުވަމުން
ރާއްޖެޓީވީގެ ފަލަސުރުހީ ޕްރޮގްރާމްގައި މާލެ ސިތީ މޭޔަރ އާދަމް އާޒިމް ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގައި މަގުމަތިން ނޫން ގޮތަކަށް އެއްވެސް ހައްގެއް ނުލިބޭނެ ކަމަށާއި، ފްލެޓު ލިބޭނެ ކަމުގެ އުންމީދުގައި ތިބި މީހުން ވެސް ހައްގު ބޭނުންވާނަމަ މަގު މައްޗަށް ނުކުންނަން ޖެހޭ ކަމަށް މާލެސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
ރާއްޖެޓީވީގައި ވާހަކަދައްކަވަމުން މޭޔަރު އާޒިމް ވިދާޅުވީ ބޯހިޔާވަހިކަމުގެ މައްސަލައަކީ މާލެސިޓީއަށް ދިމާވެފައިވާ އެންމެ ބޮޑު އެއް މައްސަލަ ކަމަށާއި، މިތަނުގައި ރައްޔިތުން ދިރިއުޅެމުންދަނީ ވަރަށް ނިކަމެތި ދަތި ހާލުގައި ކަމަށެވެ. އެއްއަހަރުން އަނެއް އަހަރަށް ބޯހިޔާވަހިކަމުގެ މައްސަލަ ބޮޑުވަމުންދާ ކަމަށާއި، ނަމަވެސް މިސަރުކާރުން ފްލެޓުތައް ދޫނުކޮށް ލަސް ކުރަމުންދާ ކަމަށް އާޒިމް ވިދާޅުވިއެވެ.
މިސަރުކާރަށް އަހަރަކަށްވުރެ ގިނަ ދުވަސްވެގެން ދިޔައިރު ފްލެޓެއް އެޅުމަށް އެންމެ ގައު ކޮޅެއް ވެސް ނުބޭއްކަން ފާހަގަކުރައްވައި އާޒިމް ވިދާޅުވީ ކުރީ ސަރުކާރުގައި އަޅާ ނިންމާފައިވާ ފްލެޓުތައް ދޫނުކޮށް، ގަޑުބަޑުކޮށްފައިވާ ކަމަށާއި، ރައްޔިތުންނަށް ދެމުންދަނީ އަނިޔާ ކަމަށެވެ. އަދި މިސަރުކާރުން 3000ށް ވުރެ ގިނަ އާއިލާ ނިކަމެތިކޮށް ދެރަ ދީފައިވާ ކަމަށެވެ.
އާޒިމް ވިދާޅުވީ މިސަރުކާރުގައި އިންސާފެއް ނެތް ކަމަށާއި، މިއީ އަނިޔާވެރި ސަރުކާރެއް ކަމަށެވެ. މިސަރުކާރުގައި އެއްވެސް ރައްޔިތަކަށް މަގުމައްޗަށް ނުކުމެގެން ނޫނީ ހައްގު ނުލިބޭނެ ކަމަށާއި، ފްލެޓު ލިބިފައިވާ މީހުންނާއި، ފްލެޓު ލިބޭނެ ކަމަށް އުންމީދުގައި ތިބި މީހުން މަގު މައްޗަށް ނުކުންނަން ޖެހޭ ކަމަށް އޭނާ ވިދާޅުވިއެވެ.
މީގެ އިތުރުން އާޒިމް ވިދާޅުވީ ދޮގު ހަދައިގެން މި ގައުމުގައި ވެރިކަން ކުރަން ފަސޭހަނުވާނެ ކަމަށެވެ.
ރައީސުލްޖުމްހޫރިއްޔާ ވެރިކަމަށް ވަޑައިގެންނެވުމަށް ދެއްކެވި ވާހަކައަކީ ފްލެޓު އެލިބުނު ގޮތަކަށް އެލިބުނު ގޮތަކަށް ލިބުނު ތަނަކުން އެއްވެސް ބަދަލެއް ނުގެނެސް ދެއްވާނަމޭ ވިދާޅުވި. ރާއްޖޭގެ ރައީސުލްޖުމްހޫރިއްޔާ. މިގޮތަށް ދޮގު ހަދައިގެން މި ގައުމުގައި ވެރިކަން ކުރާކަށް ފަސޭހަ ކަމަކަށްނުވާނެ. ހީކޮށްގެން ނުވާނެ ރައްޔިތުންނަށް ދޮގު ހަދައިގެން ނޫޅެވޭނެ. ރައްޔިތުންނަށް ތެދު ހަދަންޖެހޭނީ. އެހެންވީމަ އަޅުގަނޑު ގަބޫލުކުރާ ގޮތުގައި ރައްޔިތުންނަށް ދޮގު ހަދައިގެން މިގޮތަށް މިކަންތައްތައް ކުރުމަކީ ވަރަށް ވަރަށް ގޯސްކަމެއް ކުރަމުން އެދަނީ. އެހެންވީމަ އަޅުގަނޑު ހަމަ އެދެން މިސަރުކާރުގައި ރައްޔިތުންނަށް ދޮގުހަދައި އޮޅުވާނުލާށޭ. ރައްޔިތުންނަށް އަނިޔާނުދޭށޭ. ރައްޔިތުންނަށް ހިތާމަ ނުޖައްސާށޭ. ރައްޔިތުން އެބޭފުޅުން ހޮވާފައި ތިބީ ރައްޔިތުންނަށް ހިތްހަމަޖެހުން ގެނެސްދިނުމަށް އުފާވެރިކަން ގެނެސްދޭން. އެމީހުންގެ ކަންތައްތައް ހަމަޖައްސަން. އެކަމަކު އެމީހުން ކުރާ ކަމަކީ ރައްޔިތުންނަށް އުދަނގޫ ކުރުން. ރައްޔިތުން ހިތާމާގަައި ޖެއްސުން، ރައްޔިތުން ނިކަމެތި ކުރުން. އެނޫން ކަމެއް ނުކުރޭ.މާލެސިޓީގެ މޭޔަރު އާދަމް އާޒިމް
އާޒިމް ވިދާޅުވީ މިސަރުކާރު ބޭފުޅުންގެ އެއްވެސް އަހުލާގީ މިންގަނޑެއް ނެތް ކަމަށާއި، ފާޅުގައި ދޮގުހަދައި އަނިޔާ ދިނުމަށްފަހު ވެސް ރައްޔިތުންގެ ކުރިމައްޗަށް ނުކުމެ އިތުރަށް އޮޅުވާލުމަށް މަސައްކަތް ކުރާ ކަމަށެވެ. އަދި އެ ފުރުސަތު ނުދިނުމަށް އާޒިމް ގޮވާލެއްވިއެވެ.
