ޖުޑީޝަލް ސާވިސް ކޮމިޝަން (ޖޭއެސްސީ) ގައި ސުޕްރީމް ކޯޓު ތަމްސީލު ކުރައްވާނެ ފަނޑިޔާރަކަށް ހުސައިން ޝަހީދު ހަމަޖައްސަވައިފިއެވެ.

ނަމަވެސް ރަސްމީކޮށް ފަނޑިޔާރު ޝަހީދު ޖޭއެސްސީއަށް އައްޔަނެއް ނުކުރެއެވެ.

އިތުބާރުހުރި ފަރާތަކުން ރާއްޖެއެމްވީއަށް ވިދާޅުވީ ޖޭއެސްސީގައި ސުޕްރީމް ކޯޓު ތަމްސީލު ކުރައްވާނެ ބޭފުޅަކާ މެދު މަޝްވަރާތައް ކުރިއަށް ގެންދިޔަ ކަމަށާއި، ސުޕްރީމް ކޯޓު ތަމްސީލު ކުރައްވާނެ ފަނޑިޔާރަކަށް ހުސައިން ޝަހީދު ހަމަޖައްސަވާފައިވާ ކަމަށެވެ. މި ގޮތަށް ނިންމުން ނިންމާފައިވަނީ ބުދަ ދުވަހު ކަމަށް އޭނާ ވިދާޅުވިއެވެ.

ސުޕްރީމް ކޯޓު ފަނޑިޔާރުންގެ ތެރެއިން ޖޭއެސްސީގެ މެންބަރެއްގެ ގޮތުގައި ކުރިން ހުންނެވީ ހުސްނުއްސޫއޫދެވެ. ނަމަވެސް 4 މާރޗް 2025 ވަނަ ދުވަހު ރައީސް ޑރ.މުހައްމަދު މުއިއްޒު ގާނޫނު އަސާސީ އާ ޚިލާފުވެފައިވާ ކަމަށް ވިދާޅުވެ، ސުޕްރީމް ކޯޓުގެ ފަނޑިޔާރު ހުސްނުއްސުއޫދު ވަނީ އިސްތިއުފާ ދެއްވާފައެވެ.

ސުޕްރީމް ކޯޓުގެ ފަނޑިޔާރުކަމުގެ މަގާމަށް، ހައި ކޯޓުގެ އިސް ފަނޑިޔާރު ހުސައިން ޝަހީދު އައްޔަން ކޮށްފައިވަނީ 19 މާރޗް 2025 ގައެވެ.