ތެލެސީމިއާ ސެންޓަރގެ ޚިދުމަތްތަކާއި މެދު ހުރި ކަންބޮޑުވުންތައް ބޮޑުވެ، އާއްމުންގެ ފާޑުކިޔުން އަމާޒުވެފައި ވަނިކޮށް ތެލެސީމިއާ ސެންޓަރުގެ ބައެއް އިސްވެރިން މަގާމުން ވަކިކޮށްފިއެވެ.

މަޤާމުން ވަކިކޮށްފައިވަނީ ތެލެސީމިއާ ސެންޓަރުގެ ޑިރެކްޓަރ އަހްސަން ހުސައިން އާއި، ބްލަޑް ބޭންކުގެ ޕަބްލިކް ހެލްތު ކޯޑިނޭޓަރ ފައިޞަލް އިބްރާހީމެވެ. އެނގިފައިވާ ގޮތުން އެ ދެ ބޭފުޅުން މަޤާމުން ވަކިކޮށްފައި ވަނީ ހޯމަ ދުވަހުއެވެ. އެހެންނަމަވެސް އެ ބޭފުޅުން ވަކިކުރިކަން ކަމާއި ގުޅުން ހުރި އިދާރާއަކުން ރަސްމީކޮށް ހާމަކޮށްފައެއް ނުވެއެވެ.

މޯލްޑިވްސް ބްލަޑް ސަރވިސްއަށް ލިބިފައިހުރި ފިލްޓަރތަކުގެ މައްސަލައެއް ދިމާވެ، ލޭ އަޅާ މީހުންގެ ލޭތައް އުކާލަން ޖެހޭ މައްސަލަ ބޮޑުވެ ހޮނިހިރު ދުވަހުގެ ރޭ އާއްމުން ވަނީ އެކަމާއި މެދު އަޑު އުފުލާ އިހުތިޖާޖުކޮށްފައެވެ.

އޭގެ ފަހުން ރައީސް މުއިއްޒު އާދިއްތަ ދުވަހުގެ މެންދުރުގެ ވަގުތެއްގައި ތެލަސީމިއާ ސެންޓަރުގެ ހާލަތު ބައްލަވާލެއްވުމަށް ކަމަށް ވިދާޅުވެ އެސެންޓަރަށް ޒިޔާރަތްކުރެއްވުމަށް ފަހު ވިދާޅުވީ އެތަނުގެ ހާލަތު އެނގިވަޑައި ނުގަންނަވާ ކަމަށެވެ.

ރާއްޖެއެމްވީއަށް ތެލަސީމިއާގެ ބައެއް ޕޭޝަންޓުން ބުނީ ތެލަސީމިއާ ސެންޓަރަށް ރަމަޟާން މަހުގެ ދުވާލު ވަގުތު ރައީސް މުއިއްޒު ޒިޔާރަތް ކުރެއްވި ނަމަވެސް ހާލަތު އެނގިވަޑައިނުގަންނަވާނެ ކަމަށާއި، ރޯދަ މަހުގެ ދުވާލުގެ ވަގުތު ލޭ އަޅާނީ 12 އަހަރުން ދަށުގެ ކުދިންނަށް ކަމަށެވެ. ބޮޑެތި ހުރިހާ އެންމެން ވެސް ލޭ އަޅަމުންދާނީ ރޭގަނޑުގެ ވަގުތު ކަމަށާއި، ކަންބޮޑުވުންތައް ކުޑަ ކުދިންނަށް ކިޔައިދޭން ނޭނގޭނެ ކަމަށް ޕޭޝަންޓުން ބުނެއެވެ.

ނެޝަނަލް ތެލަސީމިއާ ސެންޓަރުގެ މިހާރުގެ މެނޭޖްމަންޓާއި ބައްދަލުކޮށްގެން ހައްލު ނުލިބޭނެ ކަމަށާއި، ހާލަތު މިހައި ބޮޑަށް ދަށްވެގެން ދިޔައީ ވެސް އެމެނޭޖްމަންޓުގެ އިހުމާލުން ކަމަށް ވެސް ލޭ އަޅާ ޕޭޝަންޓުން ބުނެއެވެ.