ފުލުހުންގެ ކޮމާންޑް ސެންޓަރގެ ލެވެލް މަތިކޮށްފައިވާ ކަމަށާ، އެގޮތަށް އެކަން ކުރުމަކީ ޖޯކެއް ކަމަށް، ފުލުހުންގެ އިންޓެލިޖެންސްގެ ކުރީގެ ވެރިޔާ މުޙައްމަދު ހަމީދު (އެމްސީ ހަމީދު) ވިދާޅުވެއްޖެއެވެ.
ހޯމަ ދުވަހު އެމްސީ ހަމީދު ކުރެއްވި ޓްވީޓެއްގައި ވިދާޅުވީ، ދާދި ފަހުން، ފުލުހުންގެ ކޮމާންޑް ސެންޓަރުގެ އިސްވެރިޔާގެ މަޤާމަށް ބަދަލުކުރެއްވި އެސިސްޓަންޓް ކޮމިޝަނަރ އޮފް ޕޮލިސް ޢަބްދުﷲ ނަވާޒްގެ ރޭންކާއި އެކަށޭނަ ޕޯޓްފޯލިއޯއެއް އެބޭފުޅާއަށް ދިނުމަށް ފުލުހުންގެ ކޮމާންޑް ސެންޓަރު ކޮމާންޑް/ޑައިރެކްޓްރޭޓް ގެ ލެވެލްއަށް މަތިކޮށްފައިވާ ކަމަށެވެ.
އެމްސީ ހަމީދު ވިދާޅުވީ މިފަދަ ބޭނުމަކަށް، މިގޮތަށް ކަންކުރުމަކީ ޖޯކެއް ކަމަށެވެ.
In order to give ACP Nawaz a portfolio appropriate to his rank, MPS elevates the Command Centre to Command/Directorate level. What a joke!
— Mohamed Hameed (@M_Hameedh) June 5, 2017
ފުލުހުންގެ އޮނިގަނޑަށް ގެނައި ބަދަލަކާއި ގުޅިގެން އެމްސީ ހަމީދު ފާޑު ވިދާޅުވެފައިވާއިރު މީގެ ކުރިންވެސް ހަމީދު ވަނީ ފުލުހުންގެ ކަންކަމާއި ގުޅިގެން ފާޑު ވިދާޅުވެފައެވެ. އެގޮތުން ހަމީދު ވަނީ ފުލުހުންގެ ޚިދުމަތް ދިނުމުގައި ގެންގުލޭ ބައެއް އުސޫލުތަކަށް ފާޑުވިދާޅުވެފައެވެ.
ދާދިފަހުން، ރާއްޖެޓީވީގެ "60 މިނިޓަށް" ދެއްވި ހާއްސަ އިންޓަވިއުއެއްގައި އެމްސީ ހަމީދު ވިދާޅުވީ ފުލުހުން މިހާރު ވަރަށް ބޮޑަށް ފެއިލްވެފައިވާ ކަމަށާއި، ޑިމޮކްރެޓިކް ވެއްޓެއްގައި ފުލުހުންގެ މުއައްސަސާ މަސައްކަތްތައް ބިނާކުރަން ޖެހޭނީ ރައްޔިތުންނަށް ހިދުމަތް ކުރުމުގެ މައްޗަށް ކަމަށެވެ. ނަމަވެސް އޭގެ ބަދަލުގައި މިއަދު ފުލުހުންގެ މުއައްސަސާއިން ފެންނަމުންދާ މަންޒަރަކީ ރައްޔިތުންނަށް ހިދުމަތް ކުރުމުގެ ރޫހާ ހިލާފް އަދި ރައްޔިތުންނަށް ހިދުމަތް ކުރުމުގައި ގެންގުޅެން ޖެހޭ އަސާސްތަކާ ހިލާފް ކަންތައްތަކެއް ކުރަމުންދާ މަންޒަރުކަމަށް އެމްސީ ހަމީދު ވިދާޅުވިއެވެ.
އޭނާ ވިދާޅުވީ ފުލުހުންގެ މުއައްސަސާއިން ރައްޔިތުންނަށް ހިދުމަތް ކުރުމުގައި ގެންގުޅެން ޖެހޭނެ އެންމެ މުހިންމު އެއް އަސާސަކީ މުޖުތަމަޢު ތެރޭގައި ހިންގާ ކުށްތަށް ރައްޔިތުންނާ ހަމައަށް ރިޕޯޓްކޮށް ކުށްތަކަށް އަރައިގަންނަ ފަރާތްތަށް ހޯދައި އެ ފަރާތްތަށް ޝަރީޢަތުގެ ކުރިމަށްޗަށް ގެންގޮސް ކުށްވެރިންނަށް ހައްގު އަދަބު ދިނުން ކަމަށެވެ. ނަމަވެސް އެ ވާޖީބްތައް އަދާކުރުމުގައި ވެސް މިއަދު ފުލުހުން ފަހަތު ފަޔަށް ބަރުވެފައިވާ ކަމަށާއި އެގޮތުން ފުލުހުން މުއައްސަސާ މަސައްކަތް ކުރަނީ ރައްޔިތުންނަށް ހިދުމަތް ދިނުމުގެ ރޫހާ ހިލާފަށް ކަމަށް އޭނާ ވިދާޅުވިއެވެ.
އެގޮތުން ފަހަކަށް އައިސް ފުލުހުންގެ ހަރަކާތްތަކާއި ބަސްތަކާއި ފުލުހުންގެ ފަރާތުން އިވޭ އަޑުތައް މުޅިން ހުންނަނީ ރައްޔިތުންނަށް ހިދުމަތް ކުރުމުގެ ރޫހާ ހިލާފަށް ކަމަށް ހަމިދު ވަނީ ތުޙުމަތުކުރައްވާފައެވެ.
