ޗެނަލް 13 ގެ "ނަނާހުވަފެނުން" ރައީސް މައުމޫނުގެ އަބުރު ނުގެއްލޭތަ؟ ބްރޯޑްކޮމް އަށް ފާޑުކިޔުން އޮއްސާލައިފި

ޗެނަލް 13 އިން ރޭ ދެއްކި "ނަނާހުވަފެން" ޕްރޮގްރާމުގައި ކުރީގެ ރައީސް މައުމޫނު އަބްދުލް ގައްޔޫމްގެ އަބުރުފުޅު ގެއްލޭފަދަ ކޮންޓެންޓްތައް ހިމަނާފައިވާތީ، ގިނަ ބައެއްގެ ފާޑުކިޔުން އެ ޗެނެލަށާއި، ބްރޯޑްކާސްޓިން ކޮމިޝަނަށް އޮއްސާލައިފި އެވެ.

ހޯމަ ދުވަހުގެ ރޭ ގެނެސްދިން މި ޕްރޮގްރާމް ބެލި ބައެއް މީހުން ޕްރޮގްރާމްގެ ސްކްރީން ޝޮޓްތައް ވަނީ ސޯޝަލް މީޑިއާގައި ހިއްސާކޮށްފައެވެ. އަދި ގިނަ ބަޔަކު އަންނަނީ އެކަމާއި ހިތްހަމަ ނުޖެހުން ފާޅުކޮށް ޝުއޫރުތައް ފާޅުކުރަމުންނެވެ. އަދި މީޑިއާތަކުގެ ބެލެނި ވެރި ފަރާތުގެ ގޮތުގައި އޮންނަ، މޯލްޑްވްސް ބްރޯޑްކާސްޓިން ކޮމިޝަނަށްވެސް ގިނަ ބަޔަކު ދަނީ ފާޑުކިޔަމުންނެވެ.

އެގޮތުން ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު މުހައްމަދު އަމީތު ކުރައްވާފައިވާ ޓްވީޓެއްގައި އެ މަންޒަރުތައް ދެއްކި ޗެނަލަށް ނިސްބަތްކޮށް ވިދާޅުވީ، މި ދަރަޖައަށް ޗެނަލްއެއްގެ ހާލަތު ދިޔައިރު، މީޑިއާ ރެގިއުލޭޓްކުރުމުގެ ޒިންމާ ހަވާލުކުރި ބްރޯޑްކާސްޓިން ކޮމިޝަން ކޮބައިތޯއެވެ؟

އެ ޗެނަލްގެ މި އަމަލާމެދު ރައްޔިތުންގެ މަޖިލީހުގެ ގިނަ މެންބަރުން ތަކެއް ވަނީ ވަރަށް ބޮޑަށް ހިތްހަމަނުޖެހުން ފާޅުކުރައްވާފައެވެ. އެގޮތުން ތިނަދޫ އުތުރު ދާއިރާގެ މެންބަރު ސައުދުއްﷲ ހިލްމީ ވިދާޅުވީ، "މީ އަޅުގަނޑުމެނގެ ހާލަތު. ދެން ފުކެއް ބޮޑުވަރު. އަބުރު އަދިވެސް އަބުރު ދެންވެސް އަބުރު. ބްރޯޑްކޮމްއަށް ވަރަށް ވެދުން" އެވެ.

ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވީ، " ކޮބާ އަބުރުގެ ގާނޫނު. ކޮބާ ބްރޯޑްކާސްޓިން ކޮމިޝަން. ކޮބާ މީޑިއާ ކައުންސިލް. ރާއްޖެޓީވީ ފަހާދުވުން ދޯ އަދިވެސް އޮތީ. ލަދެއް ނުގަނޭ" އެވެ.

ތުލުސްދޫ ދާއިރާގެ މެންބަރު އިބްރާހިމް ވަހީދު ވަނީ، ބްރޯޑްކާސްޓިން ކޮމިޝަނަށް މިފަދަ ކަންކަން ނުފެންނަމަ ފެންނަންވީ ރައްޔިތުންގެ މަޖިލީހަށް ތޯ ސުވާލުކުރައްވާފައެވެ. އަދި ފެންނަނީ ވަކި ބަޔަކު އެކަން ކުރުމުންތޯ ވައްޑެ ވަނީ ސުވާލުކުރައްވާފައެވެ.

ސަރުކާރުގެ މަދަދު ލިބިގެން ހިންގާ މި ޓީވީ ޗެނަލްއިން ކުރީގެ ރައީސް މައުމޫނަށް ހުތުރު އެއްޗެހި ގޮވާ، މަންޒަރުތައް ދެއްކުމުން ސޯޝަލް މީޑިއާގައި އެކަމާ ފާޑުކީ ބައެއް ފަރާތްތަކުން ބުނެފައިވަނީ، ބްރޯޑްކާސްޓިން ކޮމިޝަނަށް އެ މަންޒަރުތައް ނުފެންނާނެކަމަށާއި ފިޔަވަޅެއްވެސް ނާޅާނޭކަމަށެވެ. ފިޔަވަޅު އަޅަން އެނގެނީ ވަކި ޗެނަލްއަކާމެދު ކަމަށް އެފަރާތްތަކުން ވަނީ ބުނެފައެވެ. އަދި މި ކަމަކީ ދުވަހަކުވެސް ބަޔަކު ނުކުރާވަރުގެ ދަށު ދަރަޖައިގެ އަމލެއްގެ ގޮތުގައި ގިނަ ބަޔަކު ވަނީ މިކަން ސިފަކޮށްފައެވެ.