އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓާލުމަށް ވެފައިވާ އެއްބަސްވުމާ ޚިލާފަށް، އަލުން ހަނގުރާމަ ފެށުމުގެ ޒިންމާ އެމެރިކާ އިން ނަގަން ޖެހޭނެ ކަމަށް، ފަލަސްޠީނުގެ މިނިވަންކަމަށް މަސައްކަތް ކުރާ ހަމާސް ޖަމާއަތުން ބުނެފި އެވެ.

އިސްރާއީލް އިން އަލުން ހަނގުރާމަ ފަށާފައިވާއިރު، އެކަމާ ގުޅިގެން އެމެރިކާ އިން ބުނެފައި ވަނީ އަލުން ހަނގުރާމަ ފަށަން ޖެހުނީ ހަމާސް ޖަމާއަތުން ރަހީނު ކޮށްފައި ތިބި އިސްރާއީލްގެ ރަހީނުން ދޫކޮށް ނުލުމުގެ ސަބަބުން ކަމަށެވެ. 

އެ ވާހަކަތަކަށް ރައްދު ދެމުން ހަމާސް އިން ބުނެފައި ވަނީ، އެމެރިކާގެ އެ ވާހަކަ ތަކަކީ ހަގީގަތް އޮޅޭ ގޮތަށް ދައްކާފައިވާ ވާހަކަތަކެއް ކަމަށެވެ. 

އެމެރިކާގެ ނެޝަނަލް ސެކިއުރިޓީ ކައުންސިލްގެ ބްރަޔަން ހިއުސް ދެއްކި ވާހަކަތަކަށް ރައްދު ދެމުން ހަމާސް އިން ނެރުނު ބަޔާނެއްގައި ބުނެފައި ވަނީ، އިސްރާއީލުން ހިންގަމުން އަންނަ ހަނގުރާމައިގެ ޒިންމާ ނަގަން ޖެހޭނީ އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ކަމަށެވެ.

މިއަހަރުގެ ޖެނުއަރީ 19 ގައި ހަނގުރާމަ ހުއްޓުމަށް ފަހު، އަންގާރަ ދުވަހު އިސްރާއީލުން ވަނީ އަލުން ހަނގުރާމަ ފަށާފައި އެވެ. މިއީ ހަމާސް އާއެކު ހުއްޓުން އިތުރަށް ދެމެހެއްޓުމާ މެދު ދެފަރާތުން ހަފްތާތަކެއް ވަންދެން ޚިޔާލު ތަފާތުވުންތަކެއް ގެންގުޅުމަށް ފަހު އެވެ.

އިސްރާއީލް އިން ބުނާ ގޮތުގައި އިތުރު ރަހީނުން ދޫކުރުމަށް ބާރު އެޅުމަށް އަސްކަރީ ޙަރަކާތް ކުރިއަށް ގެންދިއުމަކީ މުހިންމު ކަމެކެވެ. ނަމަވެސް، ގިނަ ރަހީނުންގެ އާއިލާ ތަކުން ގޮވާލަނީ އަލުން ހުއްޓުމެއް ގެނައުމަށެވެ.

އެއީ ގިނަ ރަހީނުން ދޫވެފައި ވަނީ ހުއްޓުންތަކުގެ ތެރޭގައި ކަމަށްވާތީ އެވެ. ހަމާސް އިން ބުނެފައިވާ ގޮތުގައި، އެމެރިކާ އިން މިހާރު ދައްކާ ވާހަކަ ތަކުން ސާފު ވަނީ އެ ގައުމުން، ޣައްޒާގެ ދެ މިލިއަނަށްވުރެ ގިނަ ރައްޔިތުންނާ ދެކޮޅަށް ހިންގާ އަނިޔާވެރި ޢަމަލުތަކުގައި އިސްރާއީލަށް އެހީތެރި ވަމުންދާ ކަމެވެ.