އިހުތިޖާޖު ކުރަމުންދަނިކޮށް، 33 ވޯޓުން ގަވަރުނަރު ކަމަށް ނަސީރަށް ރުހުންދީފި
ސިފައިންގެ ސަފުތައް މަޖިލިސް ތެރޭގައި ރުކުރުވާލާފައި
އެމްއެމްއޭގެ ގަވަރަނަރު ކަމަށް އަހުމަދު ނަސީރު އައްޔަން ކުރެއްވުމަށް ރުހުން ދީފައި ވަނީ 33 މެންބަރުން
ސިފައިންގެ ފައުޖުތަކާއެކު ޖަލްސާ ބާއްވައިގެން މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރަނަރު ކަމަށް އަހުމަދު ނަސީރު އައްޔަން ކުރެއްވުމަށް މަޖިލީހުން ރުހުން ދިން ކަމަށް ކަނޑައަޅައިފި އެވެ.
މިނިވަން މުއައްސަސާތަކާބެހޭ ކޮމެޓީންގެ ބައްދަލުވުމަށް ނަސީރު ހާޒިރުކުރައްވާ އިންޓަވިއު ކުރުމަށްފަހު، ކޮމެޓީގެ މެމްބަރުން ވަނީ ނަސީރަށް 94 މާކްސް ދެއްވާފައެވެ. ކޮމެޓީން ރުހުން އޮތް ކަމަށް ފާސްވަނީ 75 މާކްސްއަށްވުރެ މަތިން މާކްސް ލިބޭނަމައެވެ. އަދި އެކޮމެޓީގައި ބައިވެރިވެވަޑައިގެންނެވި މެމްބަރުންގެ އަޣުލަބިއްޔަތުން ނަސީރަށް ރުހުން އޮތް ކަމަށް ވަނީ ފާސްކޮށްފައެވެ.
އިދިކޮޅު މެންބަރުން އިޖުތިޖާޖު ކުރަމުންދަނިކޮށް، ކޮމެޓީޣެ ރިޕޯޓް އިއްވައި، ނަސީރަށް ރުހުން އޮތް ކަމަށް ކަމަށް ވަނީ ކަނޑައަޅާފަ އެވެ. ވޯޓުގައި ބައިވެރިވެވަޑައިގެންނެވީ 33 މެންބަރުންނެވެ. ޕީޕީއެމް- އެމްޑީއޭ ކޯލިޝަންގެ އެ މެންބަރުން ވޯޓް ދެއްވީ ނަސީރަށް ރުހުން އޮތް ކަމަށެވެ.
މިއީ މި ދައުރުގެ ފަހު ޖަލްސާއަށް ވުމުން، މި ޖަލްސާއަށް ފަހު މަޖިލިސް ޗުއްޓީއަށްދާކަން މަސީހު ވަނީ އިއުލާނު ކުރައްވާފަ އެވެ. ބެލެވޭ ގޮތުގައި ތން ވަނަ ދައުރުގެ ޖަލްސާތައް ފެށޭނީ އޮކްޓޯބަރު މަހު އެވެ. ދެވަނަ ދައުރުގެ ތިން މަސް ތެރޭގައި 39 ޖަލްސާ ބާއްވަން ޖެހޭއިރު. ބޭއްވީ މިއަދުގެ ޖަލްސާ ހިމެނޭ ގޮތަށް އެންމެ 11 ޖަލްސާ އެވެ.
އެމްއެމްއޭގެ ގަވަރުނަރުގެ މަގާމަށް އަހުމަދު ނަސީރު އައްޔަން ކުރެއްވުމަށް، ރުހުން ހޯދުމަށް މަޖިލީހަށް ފޮނުވާފައި ވަނީ އާދިއްތަ ދުވަހުއެވެ.
ގަވަރުނަރުގެ މަގާމަށް އަަހުމަދު ނަސީރު އައްޔަން ކުރެއްވުމަށް ނިންމެވުމުގެ ކުރިން، އެސިސްޓެންޓް ގަވަރުނަރުގެ މަގާމުގައި ހުންނެވި ނީޒާ އިމާދު އެ މަގާމަށް އައްޔަން ކުރެއްވުމަށް ރައީސް ޔާމީން ނިންމެވިއެވެ. ނަމަވެސް، ނީޒާގެ ނަން ނެގުމަށް ފަހު ނަސީރު އެ މަގާމަށް އައްޔަން ކުރެއްވުމަށް ނިންމެވުމާއެކު ނީޒާ ވަނީ މަގާމުން އިސްތިއުފާ ދެއްވާފައެވެ.
ގަވަރުނަރުގެ މަގާމު ހުސްވީ، 2014 ވަނަ އަހަރުން ފެށިގެން އެމަގާމުގައި ހުންނެވި ޑރ. އަޒީމާ އާދަމް އިސްތިއުފާ ދެއްވުމުންނެވެ. އަޒީމާ އިސްތިއުފާ ދެއްވީ ފިރިކަލުން އަލީ ނަސީރު (އަލިނީ) އަކީ މިހާރު އދ. ގައި ހުންނަވާ ރާއްޖޭގެ މަންދޫބު ކަމަށް ވުމާ އެކު ދިރިއުޅުއްވުން ނިއު ޔޯކަށް ބަދަލު ކުރެއްވުމަށެވެ.
ގަވަރުނަރުގެ މަގާމަށް އައްޔަން ކުރެއްވުމަށް ނިންމަވާފައިވާ ނަސީރަކީ ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) ގިނަ ދުވަސްތަކެއް ވަންދެން މަސައްކަތް ކުރެއްވި ބޭފުޅެކެވެ.
ނަސީރަކީ އިކޮނޮމިކްސް އެންޑް މާކެޓިންގެ ދާއިރާއިން ބެޗްލާސް އޮފް ކޮމާސް އަދި ޕޮލިސީ އެކޮނޮމިކްސްގެ ދާއިރާއިން މާސްޓާސް ހާސިލް ކުރައްވާފައިވާ ބޭފުޅެކެވެ.
އެމްއެމްއޭގެ އިސް މަގާމްތަކެއް ވެސް ފުރުއްވާފައިވާ ނަސީރަކީ ފިނޭންސް މިނިސްޓްރީގެ ސްޓޭޓް މިނިސްޓަރުކަންވެސް ކުރައްވާފައިވާ ބޭފުޅެކެވެ. އަދި މިހާރު ނަސީރަކީ ކ. އަތޮޅު އިންވެސްޓްމަންޓް ޕްރައިވެޓް ލިމިޓެޑް ނަމަކަށް ކިޔާ ކުންފުންޏެއްގެ މެނޭޖިން ޑިރެކްޓަރެވެ.
