ރާއްޖެ އިސްލާހުގެ މަގަށް ޖަހައިފިކަން ވޯޓުން ސާބިތު ވެއްޖެ: މަވޯޓާ ޝަރީފް
11 މެއި 2017 | ބުރާސްފަތި 04:01އިންތިޚާބުގައި ކާމިޔާބު ލިބުނީ ބިރަށް ފަސްނުޖެހި މަސައްކަތް ކުރީތީ
މަރަދޫ ދާއިރާގެ މެންބަރ ޝަރީފް، އޭނާ ވިދާޅުވިގޮތުގައި އިސްލާހީ މަސައްކަތް ކާމިޔާބުކުރެވޭނެ ކަމަށް
ރާއްޖެ އިސްލާހުގެ މަގަށް ޖަހާފައިވާކަން ނިމިދިޔަ ލޯކަލް ކައުންސިލް އިންތިޚާބުގައި އިދިކޮޅު ފަރާތްތަކަށް ލިބުނު ވޯޓުން ސާބިތުވެގެން ހިނގައްޖެ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް ވިދާޅުވެއްޖެ އެވެ.
ޝަރީފް މިހެން ވިދާޅުވީ ގުޅިފައިވާ ޕާޓީތަކުން އެމްޑީޕީ ހަރުގޭގައި ބުދަދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުންނެވެ.
މިޖަލްސާގައި ވާހަކަ ދައްކަވަމުން ޝަރީފް ވިދާޅުވީ ނިމިގެންދިޔަ ލޯކަލް ކައުންސިލް އިންތިޚާބުގައި އެމްޑީޕީއަށާއި ގުޅިފައިވާ ޕާޓީތަކަށް ބޮޑު ކާމިޔާބީއެއް ލިބިފައި ވަނީ ބަޔަކު ދައްކަފާނެ ބިރަކަށް ފަހަށް ނުޖެހި ކުރަމުންދިޔަ މަސައްކަތުގެ ފޮނި ނޭވާއެއްގެ ގޮތުގައި ކަމަށެވެ. ޝަރީފް ވިދާޅުވީ އިސްލާހަށް މަސައްކަތް ކުރުމަށް ގުޅިފައިވާ ޕާޓީތަކުގެ ލީޑަރުން މަސައްކަތް ކުރައްވަނީ އަމިއްލަ ފައިދާއަކަށް ނޫން ކަމަށާއި ޤައުމަށްޓަކއި ކަމަށެވެ.
"ލޯކަލް ކައުންސިލް އިންތިޚާބުގައި އެމްޑީޕީއާ ގުޅިފައިވާ ޕާޓީތަކަށް މިވަރުގެ މަސައްކަތައް ލިބުނު ކާމިޔާބީއަކީ ދަތި އުނދަގޫތަކާއި ދައްކަފާނެ ބިރަކަށްޓަކައި ފަސް ނުޖެހި ކުރި މަސައްކަތުގެ ފޮނި މޭވޭ" ޝަރީފް ވިދާޅުވިއެވެ.
ޝަރީފް ވިދާޅުވީ ގުޅިފައިވާ ޕާޓީތަކުގެ ލީޑަރުންނާމެދު ފަޚުރުވެރިވެވަޑައިގަންނަވާ ކަމަށާއި އެބޭފުޅުންނަށް ޕާޓީތަކުން ކޮށްދޭނީ ކޮންކަމެއްތޯ ނާއްސަވާ އަބަދުވެސް ޤައުމަށްޓަކައި މަސައްކަތް ކުރައްވާ ކަމަށެވެ. އެކަމުގެ ނަތީޖާ ވަރަށް ފޮނި ކަމަށާއި އިސްލާހުގެ މަގަށް ރާއްޖެ ޖަހާފައިވާކަން މިހާރު ސާބިތުވާކަމަށެވެ. ނިމިދިޔަ ލޯކަލް ކައުންސިލް އިންތިޚާބުގައި ލިބުނު ކާމިޔާބަށް އިޝާރާތް ކުރައްވާ ޝަރީފް ވިދާޅުވީ އެ އިންތިޚާބުން އެނގިގެންދިޔަ ކަމަކީ ގުޅިފައިވާ ޕާޓީތަކަށް ކާމިޔާބުވެއްޖެކަން ކަމަށާއި އަދި ކުރިއަށް އޮތް ރިޔާސީ އިންތިޚާބުގައިވެސް ކާމިޔާބު ހޯދޭނެކަން ކަމަށެވެ.
"އެެބޭފުޅުން ނާއްސަވާ ޕާޓީތަކުން ކޮށްދޭނީ ކޮންކަމެއްތޯ. އެބޭފުޅުން އަބަދުވެސް ބުނަމުން ދިޔައީ ޤައުމަށްޓަކއި ކުރަން ޖެހުނު ކޮންމެކަމެއް ވާންޖެހުނު ކޮންމެ ޤުރުބާނީއެއް ވާން ތައްޔާރަށް ތިބިކަމަށް ކަމަށް. ހިތްތައް އުފަލުން ފޮޅިއްޖެ. ހިތްތައް ފިނިވެއްޖެ. ރާއްޖޭގެ ސިޔާސީ މިސްރާބު އިސްލާހީ މަގަށް ޖައިހައިފިކަން އެނގިއްޖެ. ރާއްޖޭގެ ގިނަ ބަޔަކީ އިސްލާހީ މަސައްކަތައް ތާއީދު ކުރާ ބައެއްކަން ނިމިގެންދިޔަ އިންތިޚާބުން ސާބިތުވެއްޖެ" ޝަރީފް ވިދާޅުވިއެވެ.
