ބިދޭސީންގެ އަތުން ފައިސާ ނެގިކަމުގެ ތުހުމަތު ކުރެވޭ އިމިގްރޭޝަންގެ މުވައްޒަފުންގެ ބަންދަށް 10 ދުވަސް
ބިދޭސީމީހާ ދޫކޮށްލުމަށް ފަހު އޭނާގެ އަތުން ފެނުނު 530،000ރ. ހިފައިގެން އިމިގްރޭޝަންގެ އޮފިސަރުން ގޮސްފައި ވަނީ އޭރު އިމިގްރޭޝަން ކޮންޓްރޯލަރ ޝަމްއާންގެ ގެއަށް ކަމަށް ފުލުހުން ބުނޭ
މީގެ ކުރިން އިމިގްރޭޝަނުން ހިންގި އޮޕަރޭޝަނެއްގެ ތެރެއިން
މޯލްޑިވްސް އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ނަހަމަ ގޮތުގައި ބޭނުންކޮށް ބިދޭސީ މަސައްކަތްތެރިންގެ އަތުން ނާޖާއިޒް މަންފާ ހޯދަމުންދާ ކަމަށް ތުހުމަތު ކުރެވޭ މައްސަލައާ ގުޅިގެން ހައްޔަރުކުރި ތިން މީހުންނަށް ބަންދު މުއްދަތު ޖަހައިފި އެވެ.
ފުލުހުން ބުނެފައިވާ ގޮތުގައި އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ނަހަމަ ގޮތުގައި ބޭނުންކުރާ މައްސަލައިގެ ތަހުގީގު ފަށާފައި ވަނީ މިދިޔަ ބުރާސްފަތި ދުވަހުއެވެ. އަދި މާރޗް 20 ވީ ބުރާސްފަތި ދުވަހުގެ ރޭ ހިންގި އޮޕަރޭޝަންގެ ތެރެއިން ގެ އެއް ބަލާ ފާސްކޮށް 3 މީހުން ހައްޔަރުކޮށްފައިވާ ކަމަށް ފުލުހުން ވަނީ ބުނެފައެވެ. ނަމަވެސް އެކަމުގެ ތަފްސީލެއް ފުލުހުން ހާމަ އެއް ނުކުރެއެވެ.
ފުލުހުން ވަނީ އެ ތިން މީހުންގެ ބަންދަށް 10 ދުވަސް ކްރިމިނަލް ކޯޓުން ޖަހާފައިވާ ކަމަށް ހޮނިހިރު ދުވަހުގެ ރޭ ބުނެފަ އެވެ.
މި މައްސަލަ އާއި ގުޅިގެން ކުރީގެ އިމިގްރޭޝަން ކޮންޓްރޯލަރ މުހައްމަދު ޝަމްއާން ވަހީދު ހުކުރު ދުވަހު ހައްޔަރުކޮށްފައިވާ އިރު އޭނާގެ ބަންދަށް ހޮނިހިރު ދުވަހުގެ ރޭ ވަނީ 15 ދުވަސް ކްރިމިނަލް ކޯޓުން ޖަހާފައެވެ.
ފުލުހުން ބުނީ އިމިގްރޭޝަންގެ ޑިޓެންޝަނަށް ގެންދިޔަ ބިދޭސީމީހާ ދޫކޮށްލުމަށް ފަހު އޭނާގެ އަތުން ފެނުނު 530،000ރ. ހިފައިގެން އިމިގްރޭޝަންގެ އޮފިސަރުން ގޮސްފައި ވަނީ އޭރު އިމިގްރޭޝަން ކޮންޓްރޯލަރ ޝަމްއާންގެ ގެއަށް ކަމަށެވެ. ޝައްމާން މަޤާމުން ވަކި ކުރީ މި މައްސަލައިގައެވެ.
