"ހަންކެޑޭ ޕްރޮޖެކްޓް ފައިނޭންސިން އެމްޑީޕީން ހަމަޖެއްސި، އެކަން ފެއިލްވީ ސަރުކާރުގެ ނާޤާބިލުކަމުގެ ސަބަބުން"

އެމްޑީޕީ ސަރުކާރުގެ ދުވަސްވަރު ހަންކެޑޭ ޕްރޮޖެކްޓް ފައިނޭންސިން ހަމަޖެއްސި ނަމަވެސް މި ސަރުކާރުގެ ނާޤާބިލުކަމުގެ ސަބަބުން މަޝްރޫޢުގެ މެދުތެރެއިން އެކަން ފެއިލްވެފައިވާ ކަމަށް އެމްޑީޕީގެ ޤާނޫނީ ޓީމްގަ ހިމެނިވަޑައިގަންނަވާ ޤާނޫނީ ވަކީލް އަހުމަދު މައުރޫފް ވިދާޅުވެއްޖެއެވެ.

އޭނާ އެފަދައިން ވިދާޅުވީ ހަންކެޑެ ޕްރޮޖެކްޓް ހުއްޓިފައި އޮންނާތީ އެކަމާއި މެދު ކަންބޮޑުވުން ފާޅުކުރައްވާ އެކްސް ގައި ހިއްސާކުރެއްވި ޕޯސްޓެއްގައެވެ.

މައުރޫފް ވިދާޅުވީ، މި ސަރުކާރުން ޗައިނާ އިން ނަގާފައިވާ ލޯނުތަކުގެ މައްޗަށް، ޚާއްޞަކޮށް އެޗްޑީސީއަށް ނަގާފައިވާ ލޯނުތަކުގެ ދަރަނި ރީސްޓްރަކްޗަރ ކުރުމަށް ވާހަކަ ކުރިން ފަށާފައިވާ ކަމަށެވެ. އެއީ ވަރަށް ޒިންމާދާރުކަން ކުޑަ ފިޔަވަޅެއް ކަމަށާއި އެ ފިޔަވަޅަކީ ސަރުކާރުން ޓެކްނިކަލް ޑިފޯލްޓެއް އޮތް ކަމަށް އިއުލާންކުރުން ކަމަށް ވެސް އޭނާ ވިދާޅުވިއެވެ.

އެ ފިޔަވަޅުގެ ނަތީޖާއެއްގެ ގޮތުން ޗައިނާގެ ބޭންކުތަކުން މޯލްޑިވިއަން ސަރުކާރާއި އެ ސަރުކާރުގެ އެސްއޯއީތަކަށް ލޯނު ދިނުން ހުއްޓާލިކަމަށް މައުރޫފް ވަނީ ވިދާޅުވެފައެވެ.

މައުރޫފް އެފަދައިން ވިދާޅުވެފައި ވާއިރު އައްޑޫ ހަންކެޑެ އިންޓަގްރޭޓެޑް ޓޫރިޒަމް ކޮންސެޕްޓަށް ތަރައްގީ ކުރަން ޗައިނާގެ ކުންފުންޏަކާ ހަވާލު ކުރި ނަމަވެސް އެ މަސައްކަތް ކުރިއަށް ގެންދެވިފައެއް ނުވެއެވެ. އެގޮތުން އެ މަސައްކަތް ކުރުމަށް ހަވާލުކުރި ބިން ސާފުކުރުން ނޫން އެހެން އެއްވެސް މަސައްކަތެއް ކުރިއަށް ގޮސްފަ އެއް ނުވެއެވެ. އެ މަސައްކަތް ކުރިއަށް ނުގޮސް ވަނީ އެ މަޝްރޫޢު އަށް ބޭނުންވާ ފައިސާ ހަމަނުޖެހޭތީ ކަމަށް ވަނީ އަޑު ފެތުރިފައެވެ.

މިދިޔަ މަހު ސަރުކާރުން ވަނީ އެ މަޝްރޫޢުގެ އަމަލީ މަސައްކަތް އިފުތިތާހު ކުރުމަށްޓަކާ ޚާއްސަ ރަސްމިއްޔާތެއް ވެސް ބާއްވާފަ އެވެ. ހަންކެޑެ މަޝްރޫއުގެ ދަށުން ހަންކެޑެގައި 2082 ޓޫރިސްޓު އެކި ފަންތީގެ ޓޫރިސްޓު އެކޮމޮޑޭޝަން ފެސިލިޓީތަކެއް ޤާއިމްކުރުމަށް ވަނީ ހަމަޖެހިފައެވެ.