އައްޑޫ ބިޔުރޯ

ދުނިޔޭގެ ޓޫރިޒަމް ދުވަހާ ގުޅުވައިގެން ބ އަތޮޅުގައި ވޯލްޑް ރެކޯޑެއް ހެދުމުގެ ގޮތުން، ފްރީޑައިވް މޯލްޑިވްސްއާ އެކު ބ އަތޮޅު ކައުންސިލުން އެއްބަސްވުމެއްގައި ރޭ ސޮއިކޮށްފިއެވެ.

މި އެއްބަސްވުމުގައި ފްރީޑައިވް މޯލްޑިވްސްގެ ފަރާތުން ސޮއިކުރެއްވި ފަހުދު ފާއިޒްއެވެ. ބ. އަތޮޅު ކައުސިލުން ސޮއިކުރެއްވީ އަތޮޅު ކައުންސިލްގެ ރައީސް އަޙްމަދު އަފްރާހް އެވެ.

ރާއްޖެއެމްވީއާއި ވާހަކަ ދައްކަވަމުން އަފްރާހް ވިދާޅުވީ، ދުނިޔޭގެ ރެކޯޑެއް ހެދުމަށް މަސައްކަތް ކުރަމުންދަނީ ދުނިޔޭގެ ޓޫރިޒަމް ދުވަހާ ގުޅުވައިގެން، ފަތުރުވެރިކަމުގެ މަންޒިލެއްގެ ގޮތުގައި ބ. އަތޮޅު ޑެސްޓިނޭޝަން ޕްރޮމޯޝަންއާއި ތިމާވެއްޓަށް މީހުން ހޭލުންތެރިކަން އިތުރުކުރުމުގެ ގޮތުން ކަމަށެވެ.

"ބާނި" ނަމުގައި ކުރިއަށްގެންދާ މި ހަރަކާތަކީ، މިއީ މުޅި ރާއްޖެއަށް ހުޅުވާލައިގެން ބާއްވާ އިވެންޓަކަށްވާއިރު، މި ހަރަކާތް ކުރިއަށްދާނީ ބ. އަތޮޅުގެ ރަށްތަކުގެ އިތުރުން ރިސޯޓްތަކާއި، ގެސްޓް ހައުސްތަކަށްވެސް ހުޅުވާލައިގެންނެ އެވެ.

މި ހަރަކާތް ކުރިއަށްގެންދިއުމަށް ނިންމާފައިވަނީ މި އަތޮޅު އަނގަފަރު ސަރަހައްދަށް އެއްފަހަރާ ހާހެއްހާ މީހުން ޖަމާވެ ފީނައިގެންނެވެ. މި އިވެންޓް އޮންނާނީ މިއަހަރުގެ އޮކްޓޯބަރުމަހު 3 ވަނަ ދުވަހު އެވެ.

ދުނިޔޭގެ ރެކޯޑް ހެދުމަށް މި އަހަރު ބާއްވާ މި ހަރަކާތަކީ އަތޮޅު ތެރޭގައި ފުރަތަމަ ފަހަރަށް ބާއްވާ މިފަދަ އެންމެ ބޮޑު ހަރަކާތެވެ.

މިހަރަކާތް ބާއްވާ އަނގަފަރު ސަރަހައްދަކީ ބ. އަތޮޅު ބަޔޮސްފިއާ ރިޒާވްގައި ހިމެނޭ ސަހަރައްދެކެވެ. ކަނޑުގެ ދިރުމުގެ މުއްސަނދި އަތޮޅެއްގޮތުގައި ބެލެވޭ ބ. އަތޮޅުގައި އޮންނަ، އަނގަފަރު ސަރަހައްދު މަޝްހޫރުވެފައިވަނީ ޅަ މިޔަރު ވިހާ އާލާވާ ތަނެއްގެ ގޮތުގަ އެވެ.