ޝަމްއާން ދިރިއުޅޭ ގެ، ކޯޓު އަމުރެއްގެ ދަށުން ބަލައި ފާސްކޮށްފި

މަގާމުގެ ނުފޫޒު ބޭނުންކޮށްގެން ބިދޭސީންގެ އަތުން ފައިސާ ނަގަމުންދިޔަކަމުގެ ތުހުމަތުގައި މަގާމުން ވަކިކުރި ޝަމްއާން ވަހީދު ދިރިއުޅޭ ގެ ބަލައި ފާސްކޮށްފި އެވެ.

ފަރީދީ މަގުގައި ހުންނަ ސްލިމްފިޓިންގ ފިހާރައާއި ޖެހިގެން އޮންނަ ގޯޅީގައި ޝަމްއާން ދިރިއުޅެމުންދާ މ. ސިލްވަރ ލައިން ގެ ބަލައި ފާސްކުރީ ބުރާސްފަތި ދުވަހުގެ ދަންވަރު 12:00 ޖަހާ އެހާކަންހާއިރުއެވެ. ޝަމްއާން ދިރިއުޅެމުންދާ ގޭގެ އިތުރުން ފުލުހުން އިތުރު ގެއެއް ބަލައި ފާސްކުރިކަމެއް ހާމައެއް ނުކުރެއެވެ.

ފުލުހުން ބުނެފައިވަނީ އިމިގްރޭޝަންގެ ބައެއް މުވައްޒަފުން، މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުންދާ ކަމުގެ މައުލޫމާތު ލިބުމާއި ގުޅިގެން، އެ މައްސަލަ ފުލުހުން ބަލަމުން އަންނަކަމަށް އެ އިދާރާއިން ބުރާސްފަތި ދުވަހުގެރޭ ވަނީ ހާމަކޮށްފަ އެވެ.

ފުލުހުން ބުނެފައިވަނީ މި މައްސަލައިގައި ބުރާސްފަތި ދުވަހުގެރޭ ހިންގި އޮޕަރޭޝަނެއްގައި ގެއެއް ބަލައި ފާސްކޮށް 3 މީހަކު ވަނީ ފުލުހުންގެ ބެލުމުގެ ދަށަށް ގެނެސްފަ އެެެވެ.

އިމިގްރޭޝަންގެ ބައެއް މުވައްޒަފުން، މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުންދާ މައްސަލައާއި ގުޅިގެން ޝަމްއާން މަގާމުން ވަކިކޮށްފައިވަނީ ވެސް ބުރާސްފަތި ދުވަހު އެވެ. ރައީސް އޮފީހުގެ ވެބްސައިޓް ގެ ދައުލަތް ގެ މަޤާމް ތަކުގެ ތިއްބަވާ ބޭފުޅުންގެ ފޯޓޯ ޖެހި ލިސްޓުން ޝައްމާން ވަނީ އުނި ކޮށްފަ އެވެ. ނަމަވެސް ސަރުކާރުން މިހާތަނަށް އެކަމާއި ގުޅުންހުރި އެއްވެސް މައުލޫމާތެއް ހާމަކޮށްފައި ނުވެ އެވެ.

ނަމަވެސް ބުރާސްފަތި ދުވަހުގެ ދަންވަރު 3:35 ހާއިރު، ޝަމްއާނުގެ ބަދަލުގައި އެ މަގާމަށް ކޮމިޝަނަރ އޮފް ޕޮލިސް (ރިޓަޔަރޑް) އަޙްމަދު ފަޞީޙް ވަނީ އައްޔަން ކުރައްވާފަ އެވެ.