ގޯއްޗާއި ފްލެޓުތަކަށް މިސަރުކާރުން ވަނީ ހިޔާނާތްތެރިވެފައި, ހައްގު ހޯދުމަށް އަޑު އުފުލާނަން: ނަސްރީނާ
ބުރާސްފަތި ދުވަހުގެ ހެނދުނު 10:00ގައި ހެންވޭރު ޕޮލިހަށް ހާޒިރު ކޮށްފައިވޭ
ފާތުމަތު ނަސްރީނާ ފުލުހަށް ހާޒިރު ކުރުން / 20.03.2025
ކުރީ ސަރުކާރުން ދޫކޮށްފައިވާ ގޯއްޗާއި ފްލެޓުތަކަށް މިސަރުކާރުން ހިޔާނާތްތެރިވެފައިވާ ކަމަށާއި، އެ ހައްގު ހޯދުމަށް އަޑު އުފުލާނެ ކަމަށް އެއްވުންތަކުގައި ބައިވެރިވާ ފާތުމަތު ނަސްރީނާ ބުނެފިއެވެ.
އާއްމު ރައްޔިތުންގެ ހައްގުތައް މިސަރުކާރުން ނިގުޅައިގަންނަމުންދާ ކަމަށް ބުނެ މިރަމަޟާން މަހުގެ ކުރީކޮޅު އެމްޑީޕީން ވަނީ ކުއްލި އެއްވުންތަކެއް މާލޭގައި ބާއްވާފައެވެ. މި އެއްވުންތަކުގައި ކޮންމެ ރެއަކު ވެސް ނަސްރީނާ ބައިވެރިވެ ސަރުކާރާ ދެކޮޅަށް އަޑު އުފުލައެވެ. އެކަމާއި ގުޅިގެން ބުރާސްފަތި ދުވަހުގެ ހެނދުނު 10:00ށް އޭނާ ވަނީ ހެންވޭރު ޕޮލިހަށް ހާޒިރު ކޮށްފައެވެ.
ފުލުހަށް ބަޔާން ދިނުމަށްފަހު ނުކުމެ ނަސްރީނާ ބުނީ ގަނޫނާ ގަވާއިދާ ހިލާފު އެއްވެސް ކަމެއް ނުކުރާ ކަމަށާއި، ފުލުހަކަށް އަނިޔާދީ ހަޑި ބަހުން ވާހަކަ ވެސް ދައްކާފައިނުވާނެ ކަމަށެވެ. ނަމަވެސް މަގު މައްޗަށް ނުކުންނަނީ ހައްގުތައް ހޯދުމަށް ކަމަށާއި، ގޯއްޗާއި، ފްލެޓު މައްސަލާގައި ބާއްވާ ހުރިހާ އެއްވުންތަކަށް ނުކުންނާނެ ކަމަށެވެ.
އަހަރެން ގާނޫނާ ގަވައިދާ ހިލާފު އެއްވެސް އަމަލެއް އަޅުގަނޑެއް މަގުމައްޗަކު ނުހިންގަމޭ. އަދި ފުލުހަކަށް އަނިޔާދީ ކަމެއްކޮށް ހަޑި ބަހުން ވާހަކަ ދައްކާ ހަދާފައި ނުވާނެ. އަޅުގަނޑު ދައްކަމުންދިޔައީ އެންމެ ވާހަކަ އެއް. އެއީ އަޅުގަނޑުމެންގެ ފްލެޓުތަކާއި ގޯތިތަކަށް ވީނުވީ ގޮތް ނޭނގި އެއްވެސް މީހަކަށް އެ ހައްގުތައް ނުދީގެން އަޅުގަނޑަކީ ވެސް ގޯއްޗެއް ލިބިފައި ހުންނަ މީހަކަށްވާތީ އަޅުގަނޑުމެން ގޯތީގެ ވާހަކަ ދައްކަމޭ. މި އެމްޑީޕީ މީހުންނާއެކު ނުކުމެ ނޫން ދައްކަނީ. އަޅުގަނޑުމެން ގޯތީ އިވެންޓް މީހުންނާއެކު ވެސް ދައްކަން އެއީ އަޅުގަނޑުމެން ގޯއްޗާއި ފްލެޓުތައް ނުލިބިގެން ރައްޔިތުން ވަރަށް ބޮޑަށް ކަންބޮޑުވެފައޭ ތިބީ. އެހެންވީމަ އެއަޑު އުފުލުމަށް ކޮންމެ ތަނެއްގައި ވެސް އެވާހަކަ ހަމަ ދައްކާނަން.ފާތުމަތު ނަސްރީނާ
އެމްޑީޕީން ބާއްވާ ކުއްލި އެއްވުންތަކާ ގުޅިގެން އެމްޑީޕީގައި އިސްކޮށް އުޅޭ ފަރާތްތަކުގެ އިތުރުން ގިނަ އާއްމު ރައްޔިތުން ދަނީ ފުލުހަށް ހާޒިރު ކުރަމުންނެވެ.
