ޒެލެންސްކީ ވިދާޅުވީ، ހަކަތައިގެ ނިޒާމަށް ދޭ ހަމަލާތައް އަވަހަށް ހުއްޓޭނެ ކަމުގެ އުންމީދު އޮތް ކަމަށް

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަގައި، ޔުކްރެއިންގެ ހަކަތައިގެ ނިޒާމަށް އަމާޒުކޮަށް ރަޝިޔާ އިން ދެމުން އަންނަ ހަމަލާތައް ހުއްޓޭނެ ކަމުގެ އުންމީދު އޮތް ކަމަށް، ޔުކްރެއިންގެ ރައީސް ވުލެޑިމިއަރ ޒެލެންސްކީ ވިދާޅުވެއްޖެ އެވެ.

އެމެރިކާގެ ރައީސް ޑޮނަލްޑް ޓްރަމްޕާއި، ރަޝިޔާގެ ރައީސް ވްލަޑިމިއާ ޕުޓިން ކުރެއްވި ފޯނު ކޯލު މަޝްވަރާގައި، ޔުކްރެއިންގެ ހަކަތައިގެ ނިޒާމަށް ދެމުން އަންނަ ހަމަލާ ހުއްޓާލަން ޕުޓިސް އެއްބަސްވެ ވަޑައިގެންފައިވާ ކަމަށް، އެމެރިކާގެ ރިޔާސީ ގަނޑުވަރު ވައިޓް ހައުސް އިން ވަނީ ބުނެފަ އެވެ.

ޒެލެންސްކީ ވިދާޅުވީ، ހަމަލާތައް ހުއްޓާލުމުގެ އެއްބަސްވުމާ ޚިލާފަށް ރަޝިޔާ އިން ހަމަލާދީ، ޝަރުތުތަކާ ޚިލާފުވެއްޖެ ނަމަ، ޔުކްރެއިން އިން އެކަމަށް ޖަވާބު ދޭނެ ކަމަށެވެ. 

މީގެ އިތުރުން ޒެލެންސްކީ ވިދާޅުވީީީ، އެމެރިކާގެ ރައީސް ޓްރަމްޕާ އެކު ކުރެވުނު މަޝްވަރާތަކުގެ އަލީގައި، ހަނގުރާމަ ހުއްޓާލުމަށް އެއްބަސްވެވިދާނެ ތަންތަނުގެ ލިސްޓެއް ތައްޔާރު ކުރާނެ ކަމަށެވެ. އަދި އެ ލިސްޓުގައި ހަކަތައިގެ ވަސީލަތްތަކުގެ އިތުރުން، ރޭލު އަދި ބަނދަރުތައް ވެސް ހިމަނާނެ ކަމަށް އޭނާ ވިދާޅުވި އެވެ. 

ނޫސްވެރިންނާ ވާހަކަ ދައްކަވަމުން، ރަޝިޔާއާ އެކު އެއްބަސްވުމަކަށް ނާދެވެނީސް، "ހުރިހާ އެއްޗެއް ވެސް ދުއްވާނެ" ކަމަށް ޒެލެންސްކީ ވިދާޅުވި އެވެ. އޭގެ މާނައަކީ ޑްރޯންތަކާއި މިސައިލްތަކުގެ ހަމަލާތައް ކުރިއަށް ގެންދިޔުން ކަމަށް އޭނާ ވަނީ ވިދާޅުވެފަ އެވެ.

ޓްރަމްޕާ އެކު ބޭއްވުނު މަޝްވަރާއަކީ "އެންމެ އުފެއްދުންތެރި އަދި ރަނގަޅު" މަޝްވަރާ ކަމަށް ޒެލެންސްކީ ވަނީ ސިފަ ކުރައްވައިފަ އެވެ. މީގެ އިތުރުން، އެމެރިކާގެ ރައީސް ޔުކްރެއިން އަށް ވަޑައިގަތުމަކީ ހަނގުރާމަ ހުއްޓުވުމަށް އެހީތެރިވެވިދާނެ ކަމެއް ކަމަށް ވެސް ޒެލެންސްކީ ވަނީ ފާހަގަ ކުރައްވައިފަ އެވެ.

ދެ ރައީސުން، ޒަޕޮރިޒިއާ ނިއުކްލިއަރ ޕްލާންޓާ ބެހޭ ގޮތުން މަޝްވަރާ ކުރެއްވި ކަމަށާއި، އެތަން ޔުކްރެއިން އަށް އަނބުރާ ލިބިއްޖެ ނަމަ، އެމެރިކާގެ އިންވެސްޓުމަންޓާއި މޮޑަނައިޒޭޝަން މަޝްރޫޢުތަކަށް މަގު ފަހިވެގެން ދާނެ ކަމަށް ޒެލެންސްކީ ވިދާޅުވި އެވެ. 

މީގެ އިތުރުން ޔުކްރެއިނަށް އިތުރު އެފް-16 ހަނގުރާމަވެރި މަތިންދާ ބޯޓު ލިބިފައިވާ ކަމަށް ޒެލެންސްކީ ހާމަ ކުރެއްވި ނަމަވެސް، ވަކި އަދަދެއް ނުވަތަ ލިބުނު ތާރީޚެއް ހާމަ ކުރައްވާފައި ނުވެ އެވެ.