ދައުލަތުގެ ޚަރަދުގަ ރައީސްގެ ބޭފުޅުންގެ ރައްޓެހިން އާރަަށަަަށް ގެންދާ މައްސަލަ އޭސީސީ އިން ނުބެލި
22 މާރިޗު 2025 | ހޮނިހިރު 23:46ރައީސުލްޖުމްހޫރިއްޔާ އާއި ރައީސްގެ އަނބިކަނބަލުން، އެފަރާތްތަކުގެ ރަސްމީ ހައިސިއްޔަތު ނުވަތަ ހައިސިއްޔަތުގެ ނުފޫޒު ނަހަމަގޮތުގައި ބޭނުންކުރި ކަމަށް ބެލެވޭނެ ކަމެއް ފާހަގަ ނުކުރެވޭ ކަމަަށް އޭސީސީ އިން ބުނެފައިވޭ
އެންޓި-ކޮރަޕްޝަން ދުވަސް ފާހަގަކުރުމަށް ބޭއްވި ޖަލްސާގައި ތެރެއިން
ދައުލަތުގެ ހަރަދުގައި ރައީސް މުހައްމަދު މުއިއްޒުގެ ބޭފުޅުންގެ ރައްޓެހިން ކ. އާރަށަށް ގެންދަވާ މައްސަލަ ނުބެލުމަަށް އޭސީސީން ނިންމައިފި އެވެ.
މި މަހުގެ 16 ވަނަ ދުވަހު އޭސީސީ އަށް އެ މައްސަލަ ހުށަހެޅީ އަމިއްލަ ފަރާތަކުންނެވެ. މި މައްސަލައިގައި ބުނެފައިވަނީ ރައީސްގެ ބޭފުޅުން ރައްޓެހިންނާއެކު ފުޓުބޯޅަ ކުޅުމަށް އާރަށަށް ވަޑައިގަންނަވާ ކަމަށެވެ.
ހަމައެހެންމެ އެ ކަމުގެ ހުރިހާ ޚަރަދެއް ކުރަނީ ދައުލަތުގެ ފައިސާއިން ކަމަށް އެ މައްސަލައިގައި ބުނެފައިވެއެވެ. އެހެންކަމުން މިއީ ދައުލަތުގެ ފައިސާ ނަހަމަ ގޮތުގައި ބޭނުން ކުރުން ކަމަށް ވާތީ މައްސަލަ ބާލާ ދިނުމަށް އޭސީސީގައި އެދިފައިވެއެވެ.
ނަމަވެސް އެ މައްސަލަ ރެޖިސްޓްރީ ނުކުރަން ނިންމާ މަައްސަލަ ހުށަހެޅި ފަރާތައް އޭސީސީ އިން ވަނީ އެކަން އަންގާފައެވެ.
އެގޮތުން އާރަށަކީ ރައީސުލްކުމްހޫރިއްޔާއަށް ހާސަކުރެވިފައިވާ ރަށެއް ކަމަށް ވުމުން އެ ރަށާއި ގުޅޭ ހުރިހާ ކަމެއް ކުރަމުން ދާނީ ޑިފެންސް މިނިސްޓްރީން ކަމަށް ގާނޫނުގައި ބަޔާން ކޮށްފައިވާ ކަމަށް އޭސީސިން ބުނެފައިވެއެވެ.
އެހެންކަމުން ރައީސުލްޖުމްހޫރިއްޔާ އާއި ރައީސްގެ އަނބިކަނބަލުން، އެފަރާތްތަކުގެ ރަސްމީ ހައިސިއްޔަތު ނުވަތަ ހައިސިއްޔަތުގެ ނުފޫޒު ނަހަމަގޮތުގައި ބޭނުންކުރި ކަމަށް ބެލެވޭނެ ކަމެއް ފާހަގަ ނުކުރެވޭ ކަމަަށް އޭސީސީ އިން ބުނެފައިވެ އެވެ.
