ރަޝިޔާ އާއި ޔުކްރެއިންއާ ދެމެދު ކުރިއަށްދާ ހަނގުރާމަ ހުއްޓާލުމުން، ޔުކްރެއިން އަށް އެހީތެރިކަން ފޯރުކޮށްދޭން 30 އަށް ވުރެ ގިނަ ޤައުމަކުން އެއްބަސްވެފައިވާ ކަމަށް އިނގިރޭސިވިލާތުން ބުނެފި އެވެ.

އިނގިރޭސިވިލާތުން ބުނެފައިވާ ގޮތުގައި ހަނގުރާމަ ހުއްޓާލުމުގެ ޙާލަތަކަށް އަތުވެއްޖެ ނަމަ، އެ ހުއްޓުން ދެމެހެއްޓުމަށް ޓަކައި "ގިނަ އަދަދެއްގެ" ޤައުމު ތަކުން ޔުކްރެއިން އަށް ސިފައިން ފޮނުވައި، އެހީތެރިކަން ފޯރު ކޮށްދޭނެ އެވެ.

އިނގިރޭސި ބޮޑު ވަޒީރު ކިއާ ސްޓާމާގެ ތަރުޖަމާނު ވިދާޅުވި ގޮތުގައި، މި އެހީތެރި ކަމުގައި "30 އަށްވުރެ ގިނަ" ޤައުމަކުން ބައިވެރިވާނެ އެވެ. ބައެއް ޤައުމު ތަކުން ސީދާ ސިފައިން ފޮނުވާއިރު، އެހެން ޤައުމު ތަކުން އެކި ގޮތް ގޮތުން އެހީތެރިކަން ފޯރުކޮށްދޭނެ ކަމަށް އޭނާ ވިދާޅުވި އެވެ.

އެމެރިކާގެ ރައީސް ޑޮނަލްޑް ޓްރަމްޕް، ރަޝިޔާ އާއެކު ސީދާ މަޝްވަރާތައް ފެށުމަށް ނިންމުމާ އެކު، މި އިއްތިހާދު އުފެއްދުމަށް ސްޓާމާ އާއި ފްރާންސްގެ ރައީސް އިމަނުއެލް މެކްރޮން ވަނީ މަސައްކަތް ކުރައްވަން ފައްޓަވައިފަ އެވެ. 

ފްރާންސް އާއި އިނގިރޭސިވިލާތުގެ ސިފައިން ޔޫކްރެއިން ގައި ބޭތިއްބުމަށް އެ ދެ ޤައުމުން ވަނީ އެއްބަސްވެފަ އެވެ.

މި ހަފުތާގެ ބުރާސްފަތި ދުވަހު، އިނގިރޭސިވިލާތުގައި ގިނަ އަދަދެއްގެ އަސްކަރީ އިސްވެރިން ބައްދަލުކޮށް، މި މަޝްރޫޢުގެ އޮޕަރޭޝަނަލް ކަންކަމާ މެދު މަޝްވަރާކުރުމަށް ވަނީ ހަމަޖެހިފަ އެވެ.

ސިފައިން ފޮނުވުމުގެ އިތުރުން، އިންޖިނިއަރިންގެ އެހީތެރިކަމާއި، ވައިގެ ބަނދަރުތައް ބޭނުން ކުރުމުގެ ހުއްދަ އާއި، ސިފައިންގެ ދިރިއުޅުމުގެ އިންތިޒާމުތައް ހަމަޖެއްސުމުގައި ވެސް ބައެއް ޤައުމު ތަކުން އެހީތެރި ވެދޭނެ ކަމަށް ބެލެވެ އެވެ.