ރަޝިޔާ އާއި ޔުކްރެއިންއާ ދެމެދު ކުރިއަށްދާ ހަނގުރާމަ ހުއްޓާލުމާ ގުޅޭ ގޮތުން، އަންގާރަ ދުވަހު ރަޝިޔާގެ ރައީސް ވްލަޑިމިއާ ޕުޓިންއާ މަޝްވަރާ ކުރައްވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

މިއީ ރަޝިޔާގެ ވެރި ރަށް މޮސްކޯ ގައި އެމެރިކާ އަދި ރަޝިޔާގެ އިސް ވެރިންގެ ދެމެދުގައި ކުރިއަށް ގެންދިޔަ ކާމިޔާބު މަޝްވަރާތަކަށް ފަހު، ޓްރަމްޕް ނިންމެވި ނިންމުމެކެވެ.

އެމެރިކާގެ ފްލޮރިޑާ އިން ވޮޝިންގްޓަން އަށް ކުރެއްވި ދަތުރުފުޅެއްގައި އެއާ ފޯސް ވަން ގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ވޭތުވެ ދިޔަ ހަފުތާ ބަންދުގައި ގިނަ މަސައްކަތްތަކެއް ކުރެވިފައިވާ ކަމަށެވެ.

ދެ ޤައުމުގެ ދެ މެދުގައި ތިން އަހަރުގެ މުއްދަތަކަށް ކުރިއަށްދާ ހަނގުރާމަ 30 ދުވަހަށް ހުއްޓާލުމަށް ޔުކްރެއިން އިން ވަނީ އެއްބަސްވެފަ އެވެ.

އެހެން ނަމަވެސް، ދެ ފަރާތުން ވައިގެ މަގުން ހަމަލާތައް ދެމުންދާ އިރު، ރަޝިޔާ އިން އަންނަނީ ކާސްކް ސަރަހައްދުން ޔުކްރެއިންގެ ބާރުތައް ފޮނުވާލުމަށް މަސައްކަތް ކުރަމުންނެވެ.

ހަނގުރާމަ ހުއްޓުމާ ބެހޭ މަޝްވަރާ ތަކުގައި ބިމާއި، ހަކަތައިގެ މަރުކަޒުތަކާ ބެހޭ ގޮތުން ވާހަކަ ދެކެވޭނެ ކަމަށް ޓްރަމްޕް ވިދާޅުވި އެވެ. އަދި ދެ ފަރާތުން ވަރަށް ގިނަ ކަންކަމާ ބެހޭ ގޮތުން މިހާރު ވެސް މަޝްވަރާ ކުރެވެމުންދާ ކަމަށް ފާހަގަކުރެއްވި އެވެ.

މީގެ އިތުރުން މިއީ ލިބިފައިވާ ވަރަށް ރަނގަޅު ފުރުސަތެއް ކަމަށް ޓްރަމްޕް ވަނީ ވިދާޅުވެފަ އެވެ. އަދި ވިދާޅުވީ، ފަހަރުގައި ހަނގުރާމަ ނިމުމަކަށް ގެނެވިދާނެ ކަމަށާއި، ފަހަރުގައި އެކަން ކާމިޔާބު ނުވެދާނެ ކަމަށެވެ.

ޔުކްރެއިންގެ ރައީސް ވޮލޮޑްމިރް ޒެލެންސްކީއާ އެކު ބޭއްވުނު އެންމެ ފަހުން ޓްރަމްޕް ބޭއްވެވި ބައްދަލުވުން ނުތަނަވަސްކަމާ އެކު ނިމުނު ނަމަވެސް، ހަނގުރާމަ ހުއްޓާލުމަށް ޔުކްރެއިން އެއްބަސްވުމާ އެކު، މިހާރު ވަނީ ގުޅުން ކޮންމެ ވެސް ވަރަކަށް ރަނގަޅުވެފަ އެވެ.