ޔުކްރެއިން ހަނގުރާމަ އަދި ސީރިއާގެ މައްސަލައާ މެދު ޓްރަމްޕް އަދި އުރުދުޣާން މަޝްވަރާ ކުރައްވައިފި

ރަޝިޔާ އާއި ޔުކްރެއިންއާ ދެމެދު ކުރިއަށްދާ ހަނގުރާމަ އަދި ސީރިއާގައި ހަމަޖެހުން ޤާއިމު ކުރުމާ ގުޅޭ ގޮތުން އެމެރިކާގެ ރައީސް ޑޮނަލްޑް ޓްރަމްޕް އަދި ތުރުކީގެ ރައީސް ރަޖަބް ޠައްޔިބް އުރުދުޣާން މަޝްވަރާ ކުރައްވައިފި އެވެ. 

ތުރުކީގެ ރައީސް އުރުދުޣާންގެ އޮފީހުން ނެރުނު ބަޔާނެއް ގައި ބުނެފައި ވަނީ، ޔުކްރެއިންގެ ހަނގުރާމަ ނިންމުމަށް ޓްރަމްޕް ގެންގުޅުއްވާ "ސީދާ އަދި ޚަރުދަނާ" ސިޔާސަތާއި، އެކަމުގައި ޓްރަމްޕްގެ އިސް ނެގުންތަކަށް ތުރުކީން ތާއީދު ކުރާ ކަމަށެވެ.

އަދުލުވެރި އަދި ދެމެހެއްޓެނިވި ސުލްހައެއް ޤާއިމު ކުރުމަށް ތުރުކީން މަސައްކަތް ކުރާނެ ކަމަށް ވެސް އެ ބަޔާނުގައި ވަނީ ބުނެފަ އެވެ.

ސީރިއާގެ މައްސަލައިގައި، އެޤައުމުގެ މައްޗަށް އަޅާފައިވާ ދަތި ކުރުންތައް ނައްތާލުމާއި، އައު ސަރުކާރު ޚަރުދަނާކޮށް، ސީރިއާ އާންމު ހާލަތަށް އަނބުރާ ގެނައުމުގެ މުހިންމުކަން އުރުދުޣާން ވަނީ ފާހަގަ ކުރައްވައިފަ އެވެ. މިކަމުން ސީރިއާގެ ރައްޔިތުންނަށް އެމީހުންގެ ޤައުމަށް އެނބުރި ދިއުމުގެ ފުރުސަތު ލިބިގެންދާނެ އެވެ.

މީގެ އިތުރުން ޓެރަރިޒަމާ ދެކޮޅަށް ކުރެވޭ މަސައްކަތުގައި، އެމެރިކާ އިން ސީރިއާގެ ކުރްދިޝް އާއެކު އެކުވެރިކަން ބާއްވަން ނިންމާފައިވާއިރު، އެކަމަކީ ތުރުކީން ކަންބޮޑުވާ ކަމެއް ކަމަށް ފާހަގަ ކޮށްފައިވެ އެވެ.

ނޭޓޯ އެކުވެރިއެއްގެ ހައިސިއްޔަތުން، އެއީ އެމެރިކާ އިން ތުރުކީ އަށް ކުރާ ވަރަށް ބޮޑު ޚިޔާނާތެއް ކަމަށް އެ ޤައުމުން ދެކެ އެވެ.

އުރުދުޣާން އިތުރަށް ފާހަގަ ކުރެއްވި ގޮތުގައި، ދެ ޤައުމުގެ ދިފާއީ ގުޅުން ހަރުދަނާ ކުރުމަށްޓަކައި، ކާޓްސާގެ ދަށުން ތުރުކީގެ މައްޗަށް އަޅާފައިވާ ފިޔަވަޅުތައް ނައްތާލައި، އެފް-16 ވިއްކުމުގެ މައްސަލަ ނިންމައި، އެފް-35 ޕްރޮގްރާމްގައި އަލުން ބައިވެރިވުމުގެ ފުރުސަތު ދިނުމަކީ ވަރަށް މުހިންމު ކަމެކެވެ.

ތުރުކީން ރަޝިއާގެ އެސް-400 މިސައިލްގެ ދިފާއީ ނިޒާމު ގަތުމާ ގުޅިގެން، 2019 ވަނަ އަހަރު އެމެރިކާ އިން ތުރުކީގެ މައްޗަށް ދަތި ކުރުމުގެ ފިޔަވަޅުތަކެއް އަޅައި، އެފް-35 ޕްރޮގްރާމުން ވަކިކޮށްފައިވެ އެވެ.