ބްރޯޑްކާސްޓިން ކޮމިޝަންގެ މެމްބަރު މުހައްމަދު ފަޒީން މަޤާމުން އިސްތިއުފާދެއްވައިފި
އޭނާ އިސްތިއުފާދެއްވާފައި ވަނީ މޯލްޑިވްސް ބްރޯޑްކާސްޓިން ކޮމިޝަންގެ މެމްބަރެއްގެ ޒިންމާތައް ވަކި ފަރާތަކަށް ނުޖެހި މިނިވަންކަމާއި އެކު މި ވަގުތު މަސައްކަތް ކުރެވެން ނެތުމުން ކަމަށް ފަޒީން ވިދާޅުވި
ބްރޯޑްކޮމްގެ ކުރީގެ މެމްބަރު ފަޒީން ބްރޯޑްކޮމްގެ ބައްދަލުވުމެއްގައި ބައިވެރިވެވަޑައިގަންަނަވަނީ
މޯލްޑިވްސް ބްރޯޑްކާސްޓިންގ ކޮމިޝަންގެ މެމްބަރު މުހައްމަދު ފަޒީން މަޤާމުން އިސްތިއުފާދެއްވައިފިއެވެ.
17 ވަނަ ދުވަހު އޭނާ ރައީސް ޑރ.މުހައްމަދު މުއިއްޒު އަށް ފޮނުއްވި އިސްތިއުފާގެ ސިޓީގައި ވިދާޅުވެފައި ވަނީ އޭނާ އިސްތިއުފާދެއްވާފައި ވަނީ މޯލްޑިވްސް ބްރޯޑްކާސްޓިންގ ކޮމިޝަންގެ މެމްބަރެއްގެ ޒިންމާތައް ވަކި ފަރާތަކަށް ނުޖެހި މިނިވަންކަމާއި އެކު މި ވަގުތު މަސައްކަތް ކުރެވެން ނެތުމުން ކަމަށެވެ.
މީގެ އިތުރުން ހޯމަ ދުވަހު ފަޒީންގެ ޤާނޫނީ ވަކީލުންގެ ފަރާތުން ނެރުނު ބަޔާނެއްގައި ބުނެފައި ވަނީ ބްރޯޑްކޮމްގެ މެމްބަރަކަށް ފަޒީން ޖިންސީ ފުރައްސާރަ ކުރި ކަމަށް ބުނެ ކުރާ ތުހުމަތުތަކަކީ އެއްވެސް ހަގީގަތެއް ނެތް ދޮގު ތުހުމަތުތަކެއް ކަމަށެވެ.
މި މައްސަލަ އެ ކޮމިޝަންގެ ކަމާއި ބެހޭ ކޮމިޓީ އާއި، ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީ އާއި، ފުލުހުން ތަހުގީގުކުރުމުން ވެސް "ބުނި ބުނުން" ފިޔަވާ މި މައްސަލަ އާއި ފަޒީން އާއި ގުޅުވާލެވޭނެ ހެއްކެއް އަދި ގަރީނާ އެއް ދެއްކިފައި ނުވާ ކަމަށް އެ ބަޔާނުގައި ވަނީ ބުނެފައެވެ. އެ ތުހުމަތުތަކަކީ މަސްނޫއީ ބުހުތާންކަމުގައި ފާހަގަކޮށް އެ ބަޔާނުގައި ބުނެފައި ވަނީ، ފަޒީން އޭނާގެ މަސައްކަތް ކުރީ ހީވާގި ކަމާއި އެކުގައި ކަމަށެވެ.
މެމްބަރު ކަމަށް އައްޔަން ކުރެވުނީއްސުރެ ފަޒީން އަށް ބިރުދެއްކުމުގެ ހާދިސާތައް ދިމާވި ކަމަށް އެ ބަޔާނުގައި ފާހަގަކޮށްފައިވެއެވެ. ބާރުގަދަ ނުފޫޒު ހުރި ފަރާތްތަކުން އެދޭހާ ގޮތަކަށް ތަންފީޒީ ފިޔަވަޅުތައް އަޅާ ދިނުމަކީ އަދުލުވެރި ގޮތެއް ކަމަށް ނުދެކޭތީ އެ ފަދަ ނިންމުންތަކުގެ ސަބަބުން މިނިވަން ނޫސްވެރިކަމަށް ހުރަސް އެޅިދާނެތީ، ކޮމިޝަންގެ ނިންމުންތައް ހަމަ މިސްރާބުގައި ހިފަހައްޓަން ފަޒީން މަސައްކަތް ކުރެއްވި ކަމަށް އެ ބަޔާނުގައިވެއެވެ. އޭނާ މަސައްކަތް ކުރީ ނުފޫޒެއް ނެތި ކަމަށް ވެސް އެ ބަޔާނުގައިވެއެވެ.
އެ ބަޔާނުގައި އިތުރަށް ބުނެފައި ވަނީ ފަޒީން އާއި ދެކޮޅަށް ބަލާ ޖިންސީ ގޯނާގެ މައްސަލަ އަކީ އޭނާގެ އަގު ވައްޓާލުމަށް ބަލަމުންދާ މައްސަލަ އެއް ކަމަށެވެ. ޤާނޫނީ އިޖުރާއަތުތަކާއި ޚިލާފަށް އެ މައްސަލަ ބަލަނީ ވަކި މަގްސަދެއް ހާސިލްކުރުމަށް އާދަޔާއި ޚިލާފު ބާރެއްގައި ކަމަށް ވެސް ވަނީ ތުހުމަތުކޮށްފައެވެ.
