" ރައީސަކު ގުޅާފައި އާއްމު މީހުންނަށް އިންޒާރު ދިނީމަ ދެން އެތަނެއްގައި ޤާނޫނު އަސާސީއެއް އޮތުމުގެ ބޭނުމެއް ނެތް "
އެމްޑީޕީން ކުރަމުންދާ މުޒާހަރާތަކުގެ ނަތީޖާ ރަނގަޅު ކަމަށާއި ދުވަހަކަށް ވުރެ ދުވަހެއް އެއްވުންތައް ވާނީ ވަރުގަދަ ކަމަށް އޭނާ ވިދާޅުވި
ޤާނޫނީ ވަކީލް އަދި އަދަދު ނޫހުގެ ޑިރެކްޓަރ މަހްފޫޒް ސައީދު ހޮނިހިރު ދުވަހު އެމްޑީޕީން ބޭއވްި މުޒާހަރާގައި ވާހަކަދައްކަވަނީ - 15.03.2025
ގައުމެއްގެ ރައީސަކު ގުޅާފައި އާއްމު މީހުންނަށް އިންޒާރު ދޭ ހިސާބަށް ކަންކަން ދިއުމުން ދެން، ގައުމުގައި ޤާނޫނު އަސާސީ އެއް ޤާނޫނެއް އޮތުމުގެ ބޭނުމެއް ނެތް ކަމަށް ޤާނޫނީ ވަކީލް އަދި އަދަދު ނޫހުގެ ޑިރެކްޓަރ މަހްފޫޒް ސައީދު ވިދާޅުވެއްޖެއެވެ.
އޭނާ އެފަދައިން ވިދާޅުވި ހޮނިހިރު ދުވަހުގެ ރޭ ކުރިއަށް ދިޔަ އެމްޑީޕީގެ މުޒާހަރާގައި ވާހަކަދައްކަވަމުންނެވެ.
ހުކުރު ދުވަހުގެ ރޭ އެމްޑީޕީން ކުރި މުޒާހަރާގައި މަހްފޫޒު، މަކުނުދޫ ދާއިރާގެ ކުރީގެ މެމްބަރު މުހައްމަދު ރާއީ އަތުން މައިކު ހޯދާ ވާހަކަދައްކަން މަސައްކަތް ކުރާ މަންޒަރު ފެންނަ ވީޑިއޯ އެއް ޕީއެންސީގެ އެކްޓިވިސްޓުން ދަނީ ހަގީގަތް އޮޅޭ ގޮތަށް ފަތުރަމުންނެވެ. އެގޮތުން އެއީ ރާއީ އާއި މަހްފޫޒު އާއި ދެމެދު މައްސަލަ ޖެހިގެން ހިނގި ކަމެއް ކަމަށް ދެއްކުމަށް އެފަދަ ފަރާތްތަކުން ދަނީ މަސައްކަތްކުރަމުންނެވެ.
އެހެންނަމަވެސް އެފަދަ ކަމެއް ހިނގާފައި ނުވާ ކަމަށާއި ޖަޒުބާތުގައި މައިކު އަތުލައިގެން ވާހަކަދައްކަން ޖެހުނީ އޭނާގެ މަސްލަހަތު ހިމެނޭ ކަމެއްގައި، ރައީސް ޑރ.މުހައްމަދު މުއިއްޒު އާއްމު މީހަކަށް ގުޅާފައި އިންޒާރު ދިނުމުން ކަމަށް އޭނާ ވިދާޅުވިއެވެ.
މަހްފޫޒުގެ ވާހަކައިގައި އިޝާރާތްކުރައްވާފައި ވަނީ އަދަދު ނޫހުގެ ސީއީއޯ އަދި މަޝްހޫރު ނޫސްވެރިޔާ ހުސެއިން ފިޔާޒަށް ގުޅާ ރައީސް މުއިއްޒު އިންޒާރު ދެއްވި މައްސަލަ އަށެވެ.
އެކަމާއި ގުޅޭ ގޮތުން ހޮނިހިރު ދުވަހުގެ ރޭގެ މުޒާހަރާގައި މަހްފޫޒް ވަނީ ވާހަކަދައްކަވާފައެވެ. އެގޮތުން އާއްމު މީހަކު ރުޅި އައުމުން އަމަލުކުރާ ގޮތާއި ރައީސަކު އަމަލުކުރައްވާ ގޮތާއި ތަފާތެއް ހުންނަން ވާނެ ކަމަށް ޤަބޫލުކުރައްވާ ކަމަށް އޭނާ ވިދާޅުވިއެވެ.
"ތިބޭފުޅުން ވިސްނަންވީ އެކަން. ރައީސްގެ ކަންކަން ހުރިގޮތަކީ ފުލުހުންނާއި ވެސް ގާނޫނު ތަންފީޒުކުރަން ހަވާލު ނުކޮށް އަމިއްލައަށް އެކަން ކުރައްވަނީ." އޭނާ ވިދާޅުވިއެވެ.
މަހްފޫޒް ވިދާޅުވީ އެފަދަ އިންޒާރެއް ގޭންގެއްގެ ކިބައިން ލިބުނު ނަމަ ހައިރާން ވެވަޑައިނުގަންނަވާނެ ކަމަށެވެ. ނަމަވެސް ރައީސަކު އެކަން ކުރެއްވުމަކީ ކަންބޮޑުވެވަޑައިގަންނަވާ ކަމެއް ކަމަށް އޭނާ ވިދާޅުވިއެވެ.
މީގެ އިތުރުން އެމްޑީޕީން ކުރަމުންދާ މުޒާހަރާތަކުގެ ނަތީޖާ ރަނގަޅު ކަމަށާއި ދުވަހަކަށް ވުރެ ދުވަހެއް އެއްވުންތައް ވާނީ ވަރުގަދަ ކަމަށް އޭނާ ވިދާޅުވިއެވެ.
