ސްޓެލްކޯ އިން ދަ ގްރާންޑޭ ބަލިކޮށްފި

މިހާރު ކުރިއަށްދާ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ވެޓަރަންސް ލީގުގައި ދަ ގްރާންޑޭއާ ދެކޮޅަށް ކުޅުނު މެޗުން ސްޓެލްކޯ މޮޅުވެއްޖެ އެވެ.

ހުކުރު ދުވަހުގެ ހަވީރު މާފަންނު ޓާފު ދަނޑުގައި ކުޅުނު މެޗު ސްޓެލްކޯ އިން ކާމިޔާބު ކުރީ 4-2 އިންނެވެ. މެޗުގެ ފުރަތަމަ ހާފު ނިމުނީ ދެ ޓީމު 1-1 އިން އެއްވަރުވެގެންނެވެ. ނަމަވެސް ދެ ވަނަ ހާފުގައި ތިން ލަނޑު ޖަހައިގެން ސްޓެލްކޯ ވަނީ މެޗުން މޮޅުވެފަ އެވެ.

މެޗުގެ 16 ވަނަ މިނެޓުގައި ޢަބްދުﷲ ހަފީޒު ޖެހި ލަނޑުން ދަ ގްރާންޑޭ އިން ލީޑު ނެގި އެވެ. އޭގެ ފަހުން މެޗުގެ 28 ވަނަ މިނެޓުގައި އަޙުމަދު ޝިޔާމް މުޙައްމަދު އާދަމް ވަނީ ލަނޑު ޖަހައި ސްޓެލްކޯ އަށް މެޗުގެ ނަތީޖާ ހަމަހަމަ ކޮށްދީފަ އެވެ.

މެޗުގައި ފުރަތަމަ ފަހަރަށް ސްޓެލްކޯ އަށް ލީޑު ނަގައިދިނީ 42 ވަނަ މިނެޓުގައި މުޙައްމަދު ވަޙީދު އެވެ. އޭގެ ފަހުން 53 ވަނަ މިނެޓުގައި އެ ޓީމުގެ ތިން ވަނަ ލަނޑު ޖެހީ އިއްޒަތު ޢަބްދުލް ބާރީ އެވެ.

އޭގެ ހަތަރު މިނެޓު ފަހުން ބާރީ ވަނީ ސްޓެލްކޯގެ ހަތަރު ވަނަ ލަނޑު ޖަހައިފަ އެވެ. މެޗުގައި ދަ ގްރާންޑޭގެ ދެ ވަނަ ލަނޑު 59 ވަނަ މިނެޓުގައި ޖެހީ ހަފީޒް އެވެ.

މިއީ ވެޓަރަންސް މުބާރާތުގައި ސްޓެލްކޯ އިން ކުޅުނު ތިން ވަނަ މެޗެވެ. މިހާތަނަށް ކުޅުނު ތިން މެޗުގެ ތެރެއިން ދެ މެޗުން މޮޅުވެފައިވާއިރު، އެއް މެޗުން ވަނީ ބަލިވެފަ އެވެ.

މިއަހަރުގެ ވެޓަރަންސް ލީގު ކުރިއަށް ދާނީ މި މަހުގެ 27 ވަނަ ދުވަހުގެ ނިޔަލަށެވެ. މިއަހަރުގެ މުބާރާތުގައި ޖުމުލަ 10 ޓީމަކުން ބައިވެރިވެ އެވެ.

މުބާރާތް ކުރިއަށް ގެންދަނީ ދެ ގުރޫޕަކަށް ބަހާލައިގެންނެވެ. އެގޮތުން ގުރޫޕު އޭގައި އޮތީ ދިވެހި ސިފައިންގެ ކުލަބު، ވިލިމާލެ ޔުނައިޓެޑު، ހުޅުމާލޭ ވެޓަރަންސް ކުލަބު، ޒެލޮޓް އަދި ހުއްރިއްޔާ އެވެ. ގުރޫޕު ބީ ގައި ހިމެނެނީ ޕޮލިސް ކުލަބު، ސްޓެލްކޯ، ކުލަބު އީގަލްސް، މުއިވެޔޮ އަދި ދަ ގްރާންޑޭ އެވެ.