ޔުކްރެއިންގެ ހުށަހެޅުމާ ގުޅޭ ގޮތުން ރަޝިޔާއާ މަޝްވަރާ ކުރާނަން: ރޫބިއޯ 

ރަޝިޔާ-ޔުކްރެއިން ހަނގުރާމަ ހުއްޓާލުމާ ގުޅޭ ގޮތުން ޔުކްްރެއިން އިން ހުށަހަޅާފައިވާ ހުށަހެޅުމާ ގުޅޭ ގޮތުން، ރަޝިޔާ އާއި އެކު މަޝްވަރާ ކުރާނެ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ.

ސައުދީ އަރަބިއްޔާގެ ޖިއްދާގައި އެމެރިކާ އާއި ޔުކްރެއިންއާ ދެމެދު ކުރިއަށް ގެންދިޔަ މަޝްވަރާތަކުގައި ޔުކްރެއިން އިން ވަނީ 30 ދުވަހުގެ މުއްދަތަކަށް ހަނގުރާމަ ހުއްޓާލުމުގެ ހުށަހެޅުމެއް ހުށަހަޅައިފަ އެވެ.

ގާތްގަނޑަކަށް އަށް ގަޑިއިރުގެ ދިގު މިނަށް ދެމިގެން ދިޔަ އެއް މަޝްވަރާ ބައްދަލުވުމާ ގުޅޭ ގޮތުން ރަޝިޔާ އިން މިހާތަނަށް ރަސްމީ އެއްޗެއް ބުނެފައެއް ނުވެ އެވެ.  

މި އެއްބަސްވުމުގެ ދަށުން ޔުކްރެއިން އަށް އަސްކަރީ އެހީތެރިކަމާއި، އިންޓެލިޖެންސް މައުލޫމާތު ހިއްސާ ކުރަން އަލުން ފެށުމަށް އެމެރިކާ އިން ވަނީ އެއްބަސްވެފަ އެވެ.

އެމެރިކާ އަށް ވަޑައިގެންނެވުމުގެ ކުރިން އަޔަލެންޑުގައި މަޑު ކުރެއްވުމަށް ފަހު މީޑިއާ ތަކާ ވާހަކަ ދައްކަވަމުން ރޫބިއޯ ވިދާޅުވީ، އެންމެން ވެސް މިވަގުތު އިންތިޒާރު ކުރަމުން އަންނަނީ ރަޝިޔާގެ ޖަވާބަކަށް ކަމަށެވެ. އަދި ހަނގުރާމަ ހުއްޓާލުމާ މެދު ވިސްނުމަށް ރަޝިޔާ އަށް ގޮވާލައްވާ ކަމަށް ވެސް ރޫބިއޯ ވިދާޅުވި އެވެ.

ރޫބިއޯ އިތުރަށް ވިދާޅުވީ، ދެ ފަރާތުން އެއްބަސްވުމާ އެއްގޮތަށް އަމަލުކުރޭތޯ ބެލުމަށް މޮނިޓަރ ކުރެވިދާނެ ކަމަށެވެ. އަދި މުސްތަގުބަލުގައި ޔުކްރެއިންގެ ސަލާމަތާއި ރައްކާތެރިކަން ކަށަވަރު ކުރުމުގެ މައްސަލަ މަޝްވަރާތަކުގައި ހިމެނެން ޖެހޭނެ ކަމަށް ވެސް އޭނާ ވިދާޅުވި އެވެ.

މި މަޝްވަރާތައް ކުރިއަށްދާ ނަމަ، ރަޝިއާއިން ބޭނުން ވާނީ ޔޫރަޕިއަން ޔޫނިއަންގެ ދަށުން އެޅިފައިވާ ފިޔަވަޅުތައް ނައްތާލުމަށް ކަމަށްވާތީ، ޔޫރަޕުގެ ގައުމުތައް ވެސް މި މަޝްވަރާ ތަކުގައި ބައިވެރިވާން ޖެހޭނެ ކަމަށް ރޫބިއޯ ވަނީ ފާހަގަ ކުރައްވައިފަ އެވެ.