ޔުއެފާ ޗެެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި އެތުލެޓިކޯ މެޑްރިޑު ބަލިކޮށް، އެންމެ ފަހުގެ ޗެމްޕިއަން ރެއާލް މެޑްރިޑުން މުބާރާތުގެ ކުއާޓަރ ފައިނަލްގެ ޖާގަ ހޯދައިފި އެވެ.

ރެއާލްގެ އަމިއްލަ ދަނޑުގައި މިދިޔަ ހަފުތާގައި މި ދެ ޓީމު ބައްދަލު ކުރި މެޗު އެ ޓީމުން ކާމިޔާބު ކުރީ 2-1 އިންނެވެ. އެހެންކަމުން ދެ ވަނަ ލެގުގެ މެޗަށް ނިކުތްއިރު ރެއާލަށް ފައިދާ އޮތެވެ.

ބުދަ ދުވަހުގެ ރޭ އެތުލެޓިކޯގެ އަމިއްލަ ދަނޑުގައި ކުޅުނު ދެ ވަނަ ލެގުގައި އެ ޓީމުން ވަނީ ލަނޑު ޖަހައި އެގްރިގޭޓް ނަތީޖާ ހަމަހަމަ ކޮށްފަ އެވެ. މެޗުގެ ފުރިހަމަ ވަގުތު ހަމަވެ، އިތުރަށް ކުޅުނު ދެ ހާފުގައި ވެސް ދެ ޓީމު އެއްވަރުވެފައި އޮތުމުން ނަތީޖާ ނެރުމަށް ޖެހި ޕެނަލްޓީ ގައި ރެއާލް އިން ވަނީ ކުރި ހޯދައިފަ އެވެ.

މެޗު ފަށައިގެން ފުރަތަމަ މިނެޓުގައި އެތުލެޓިކޯ އަށް ކުރި ހޯދައިދިނީ ކޯނާ ގަލަގާ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ރޮޑްރިގޯ ޑި ޕައުލް އެވެ.

އޭގެ ފަހުން މެޗުގެ 70 ވަނަ މިނެޓުގައި ރެއާލަށް ލިބުނު ޕެނަލްޓީ ވިނީޝިއުސް ޖޫނިއާ ފޮނުވާލި ނަމަވެސް، އެ ބޯޅަ ދިޔައީ ގޯލުގެ ހުރަސް ދަނޑި މަތިން ބޭރަށެވެ.

މެޗުގެ ނަތީޖާ ނެރުމަށް ޖެހި ޕެނަލްޓީ ގައި ރެއާލް އިން ވަނީ ހަތަރު ޕެނަލްޓީ ކާމިޔާބު ކޮށްފަ އެވެ. އެއީ ކީލިއަން އެމްބާޕޭ، ޖޫޑް ބެލިންހަމް. ފެޑެރިކޯ ވަލްވާޑޭ އަދި އެންޓޯނިއޯ ރޫޑިގާގެ ޕެނަލްޓީ އެވެ. ރެއާލްގެ ލޫކަސް ވަޒްކުއޭޒްގެ ޕެނަލްޓީ ކާމިޔާބެއް ނުވި އެވެ.

އެތުލެޓިކޯ އަށް ކާމިޔާބު ކުރެވުނީ ދެ ޕެނަލްޓީ އެވެ. އެއީ އެލެގްޒެންޑާ ސޯލޮތު އަދި އެންހެލް ކޮރެއާގެ ޕެނަލްޓީ އެވެ. އެ ޓީމުގެ ހޫލިއަން އަލްވަރޭޒް އަދި މާކަސް ލޮރެންޓޭގެ ޕެނަލްޓީ ކާމިޔާބެއް ނުވި އެވެ. މީގެ ތެރެއިން އަލްވަރޭޒްގެ ޕެނަލްޓީ ބަލައި ނުގަންނަން ނިންމީ، ވީޑިއޯ އެސިސްޓެންޓް ރެފްރީ (ވީއޭއާރު) އިންނެވެ. އެއީ ބޯޅައިގައި އޭނާ ދެ ފަހަރު ޓަޗްވި ކަމަށް ނިންމައިގެންނެވެ.

މުބާރާތުގެ ކުއާޓާ ފައިނަލް ގައި ރެއާލް ނިކުންނާނީ އާސެނަލާ ދެކޮޅަށެވެ.