ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫން ދޫކޮށްލުމުގެ ވަގުތީ އަމުރަކަށް އެދިފައިވާ މައްސަލާގައި އަވަހަށް ގޮތެއް ނިންމަދޭން ހައި ކޯޓުގައި އެދިއްޖެ އެވެ.
ފާރިސްގެ ގާނޫނީ ވަކީލް މައުމޫނު ހަމީދުގެ ހައި ކޯޓަށް ހުށަހެޅި ސިޓީގައި ވަނީ ފާރިސްގެ މައްޗަށް ތުހްމަތުކުރާ ރިޝްވަތު ދިނުމުގެ ދައުވާގެ ޝަރީއަތް ނިމެންދެން ބަންދުގައި ބަހައްޓަން ކުރި އަމުރުގެ އިސްތިއުނާފު ނުނިމިވާތީ ކަންބޮޑުވުން ފާޅު ކުރައްވާފަ އެވެ. އެ މައްސަލާގެ އިސްތިއުނާފުގެ އަޑުއެޑުއެހުންތައް ހައި ކޯޓުން ނިންމާލައި ހުކުމާއި ހަމައަށް ގޮސްފައިވާކަން އެ ސިޓީގައި މައުމޫނު ހަމީދު ވަނީ ފާހަގަ ކުރައްވާފަ އެވެ. އެ މައްސަލާގެ އަޑުއެހުންތައް މި މަހުގެ ހަ ވަނަ ދުވަހާއި ނުވަނަ ދުވަހު ބޭއްވުމަށް ފަހު އަޑުއެހުންތައް ނިމިފައިވާކަން ފަނޑިޔާރުން ވަނީ އިއުލާން ކުރައްވާފަ އެވެ. އަދި އެ މައްސަލާގެ އަޑުއެހުމެއް މި މަހުގެ 20 ވަނަ ދުވަހަށް ތާވަލުކުރުމަށް ފަހު ވަނީ ކެންސަލް ކޮށްފަ އެވެ.
މައުމޫނު ހަމީދުގެ ސިޓީގައި، ފާރިސް ބަންދުގައި ބަހައްޓަން ކްރިމިނަލް ކޯޓުން ކޮށްފައިވާ އަމުރު ބާތިލް ކުރުމަށް ހުށަހަޅައި، މައްސަލަ ނިމެންދެން ވެސް އޭނާ ދޫކޮށްލުމުގެ އަމުރަކަށް ހައި ކޯޓުގައި އެދުނީ އެ އަމުރަކީ ޝަރުއީ އަދި ގާނޫނީ ހަމަތަކާއި ހިލާފަށް ނެރިފައިވާ އަމުރެއްކަން ފާޅުކަން ބޮޑުގޮތެއްގައި އެނގޭނެ ހަގީގަތްތައް ހުރުމުން ކަމަށް ބުނެފައިވެ އެވެ.
އަދި އެ ވަގުތީ އަމުރަށް އެދުނީ ކްރިމިނަލް ކޯޓުގެ އެ އަމުރުގެ ދަށުން ހައްޔަރު ކުރުމުންނާއި ބަންދުގައި ހުންނައިރު އަމަލު ކުރަމުންދާ ގޮތުން ފާރިސްގެ އަސާސީ ހައްގުތަކަށް އުނިކަން އަންނާތީ ކަމަށް ވެސް ވިދާޅުވި އެވެ.
ފާރިސްގެ މައްޗަށް ރިޝްވަތުގެ ކުށުގެ ތުހްމަތު ކޮށްފއިވާއިރު އޭނާ ބަންދުގައި ބަހައްޓަން ކްރިމިނަލް ކޯޓުން ނިންމާފައިވާ ސަބަބުތަކުގެ ތެރޭގައި ތުހްމަތު ކުރެވެނީ "ޖިނާއީ ބޮޑު ކުށަކަށް ކަމަށް ވާތީ" ކަމަށް ބުނެފައިވީ ނަމަވެސް ފާރިސްއާއެކު ރިޝްވަތުގެ ދިނުމުގައި ބައިވެރިވި ކަމަށް ތުހްމަތު ކުރި އަހްމަދު ޝާފިއު ދޫކޮށްލަން ހައި ކޯޓުން ކުރި ހުކުމުގައި ރިޝްވަތުގެ ކުށަކީ "ޖިނާއީ ބޮޑު ކުށެއްގެ ތުހްމަތު ނޫން" ކަމަށް ނިންމާފައިވާކަން އެ ސިޓީގައި ވަނީ ފާހަގަ ކުރައްވާފަ އެވެ.
އެހެން ކަމުން ފާރިސް ބަންދުގައި ބަހައްޓަން ކޮށްފައިވާ އަމުރަކީ ޖިނާއީ އިޖްރާއަތުގެ ގާނޫނާ ހިލާފަށް ކޮށްފައިވާ އަމުރެއްކަން އިތުރަށް ހާމަވާކަމަށް ވެސް ހައި ކޯޓުގެ އިސް ފަނޑިޔާރަށް މައުމޫނު ހަމީދު ފޮނުއްވި ސިޓީގައި ވިދާޅުވެފައިވެއެވެ.
ފުލުހުން ތަހުގީގު ކުރަމުންދާ ރިޝްވަތު ދިނުމުގެ ކުށުގެ ތުހުމަތަކާއި ގުޅިގެން ޝަރީއަތް ނިމެންދެން ބަންދުގައި ބަހައްޓަން ކްރިމިނަލް ކޯޓުން އަމުރުކުރިއިރު ފާރިސްގެ މައްޗަށް ތުހުމަތު ކުރެވޭ ރިޝްވަތު ދިނުމުގެ ކުށުގެ ތަހުގީގު ނުނިމެ އެވެ. އަދި އެމައްސަލައިގައި ދައުވާ ކުރުމަށް ޕްރޮސެކިއުޓަރ ޖެނަރަލްގެ އޮފީހަށް ވެސް އޭރު ނުފޮނުވަ އެވެ.
