އަހަރަށް 1 ލައްކަ ޑޮލަރު ދައްކައިގެން ރިޒޯޓުތަކުގެ މުއްދަތު 99 އަހަރަށް އިތުރުކުރެވޭގޮތަށް ޓޫރިޒަމް ޤާނޫނަށް ކުއްލި އިސްލާހެއް

ކޮންމެ އަހަރަކަށް އެންމެ 1 ލައްކަ ޑޮލަރުގެ ރޭޓުން ސަރުކާރަށް ފައިސާ ދައްކައިގެން ރިޒޯޓުތަކުގެ މުއްދަތު 99 އަހަރަށް އިތުރުކުރެވޭގޮތަށް ހެދުމަށް ޓޫރިޒަމާބެހޭ ޤާނޫނަށް އިސްލާހެއް ގެނައުމަށް ސަރުކާރުން ކުއްލި ގޮތަކަށް ރައްޔިތުންގެ މަޖިލީހަށް ބިލެއް ހުށަހަޅައިފި އެވެ.

ޤާނޫނު ނަންބަރު 2/99 (ދިވެހިރާއްޖޭގެ ޓޫރިޒަމާބެހޭ ޤާނޫނު) އަށް މި އިސްލާހު ހުށަހަޅައިފައިވަނީ، ސަރުކާރުގެ ފަރާތުން ހުށަހަޅާ ބިލެއްގެ ގޮތުގައި، ތިމަރަފުށީ ދާއިރާގެ މެންބަރު އަޙްމަދު ރިޔާޒެވެ. މައުލޫމާތު ލިބިފައިވާ ގޮތުގައި އަންގާރަ ދުވަހުގެ ޖަލްސާ އަށް މި ބިލު ވަނީ އެޖެންޑާ ކޮށްފައެވެ.

ރިޒޯޓްތަކުގެ މުއްދަތު އިތުރުކުރުމަށް ފައިސާދެއްކުމަށް ދޭ ލުއިތަކުގެ އިތުރުން، ކްރޮސް ސަބްސިޑީގެ ގޮތުގައި، ޓޫރިސްޓް ރިޒޯޓެއް ނުވަތަ އިންޓަގްރޭޓަޑް ޓޫރިސްޓް ރިޒޯޓެއް ތަރައްޤީކުރުމަށް ރަށް ނުވަތަ ބިން ނުވަތަ ފަޅު، ސަރުކާރުން ކަނޑައަޅާ ކޮންމެ ޕްރޮޖެޓަކާ ގުޅިގެންވެސް ދޫކުރެވޭ ގޮތަށް ޤާނޫނު ބަދަލުކުރުމަށް ވެސް ހުށަހަޅައިފައިވެއެވެ.

މީހާރު ޤާނޫނުގެ 5 ވަނަ މާއްދާގައި އޮތީ، ދައުލަތުގެ ޢާންމު މަންފާއަކަށްޓަކައި ހާސިލުކުރަން ބޭނުންވާ އިޤްތިޞާދީ ސިޔާސަތެއްގެ ދަށުން ނުވަތަ އިޖްތިމާޢީ ސިޔާސަތެއްގެ ދަށުން، ދުރާލާ އިޢުލާންކޮށްފައިވާ އުސޫލުތަކަކާ އެތްގޮތްވާ ގޮތުގެމަތިން ސަރުކާރުން ކަނޑައަޅާ މުހިންމު މަޝްރޫޢެއް ޙަވާލުކުރެވޭ ފަރާތަކަށް، ނުވަތަ އެފަދަ މަޝްރޫޢަކަށް ޚަރަދުކުރާ ފަރާތަކަށް ކްރޮސް ސަބްސިޑީގެ ގޮތުގައި، ޓޫރިސްޓް ރިޒޯޓެއް ނުވަތަ އިންޓަގްރޭޓަޑް ޓޫރިސްޓް ރިޒޯޓެއް ތަރައްޤީކުރުމަށް ރަށް ނުވަތަ ބިން ނުވަތަ ފަޅު ދޫކުރެވިދާނެ ކަމަށެވެ.

ނަމަވެސް މިހާރު ހުށަހަޅައިފައިވާ އިސްލާހުގައިވާގޮތުން، ދައުލަތުގެ ޢާންމު މަންފާއަކަށްޓަކައި ހާސިލުކުރަން ބޭނުންވާ އިޤްތިޞާދީ ސިޔާސަތެއްގެ ދަށުން ނުވަތަ އިޖްތިމާޢީ ސިޔާސަތެއްގެ ދަށުން، ނުވަތަ އެނޫންވެސް މުހިންމު ސިޔާސަތެއްގެ ދަށުން، ސަރުކާރުން ކަނޑައަޅާ މުހިންމު މަޝްރޫޢެއް ޙަވާލުކުރެވޭ ފަރާތަކަށް، ނުވަތަ އެފަދަ މަޝްރޫޢަކަށް ޚަރަދުކުރާ ފަރާތަކަށް ކްރޮސް ސަބްސިޑީގެ ގޮތުގައި، ޓޫރިސްޓް ރިޒޯޓެއް ނުވަތަ އިންޓަގްރޭޓަޑް ޓޫރިސްޓް ރިޒޯޓެއް ތަރައްޤީކުރުމަށް ރަށް ނުވަތަ ބިން ނުވަތަ ފަޅު ދޫކުރެވިދާނެ ކަމަށެވެ.

ވަކި ސިޔާސަތެއް ބަޔާންކުރުމެއްނެތި، "އެނޫންވެސް މުހިންމު ސިޔާސަތެއްގެ ދަށުން"، ސަރުކާރުން ކަނޑައަޅާ މަޝްރޫޢަކާ ގުޅިގެން ޓޫރިޒަމް ތަރައްޤީކުރުމަށް ރަށް ނުވަތަ ބިން ނުވަތަ ފަޅު ދޫކުރެވިދާނެ ކަމަށް ޤާނޫނުގައި ހިމެނުމަށް ހުށަހަޅައިފައި މިވަނީ، ކޮންމެ މަޝްރޫއަކާ ގުޅިގެން ވެސް ރަށްތަކާއި ފަޅުތަކާއި ބިންތައް ސީދާ ރައީސް މުއިއްޒު ބޭނުންވާ ބަޔަކަށް ދެވޭގޮތް ހެދުމުގެ ބޭނުމުގައިކަން ފާހަގަކުރެވެއެވެ.

މިއީ ރައީސް މުއިއްޒުގެ ވެރިކަމުގައި ދިވެހިރާއްޖޭގެ ޓޫރިޒަމާބެހޭ ޤާނޫނަށް އިސްލާހު ހުށަހެޅި 3 ވަނަ ފަހަރެވެ. މީގެ ކުރިން 2 ފަހަރެއްގެ މަތިން ވަނީ އެ ޤާނޫނަށް ބަދަލުތަށް ގެނެސްފައެވެ.

އެއްވެސް އުސޫލެއް ނުވަތަ ޕްލޭނެއް ނެތި، އަވަސްއަވަހަށް އެ ޤާނޫނަށް އެކި އެކި ބަދަލުތަށް ގެންނަމުން ދިއުމަކީ، ރައީސް މުއިއްޒުގެ ސަރުކާރުގައި ޓޫރިޒަމްގެ ހަރުދަނާ ސިޔާސަތެއް ނެތްކަން އެނގިގެންދާ ކަމެއްގެ ގޮތުގައި އެ ދާއިރާގެ ތަޖުރިބާކާރުން ދަނީ ސިފަކުރަމުންނެވެ.