ރާއްޖޭގައި މިހާރު މިނިވަން މުސްތަގިއްލު ސެންޓަރަލް ބޭންކެއް ނެތް، އެމްއެމްއޭ ކޮންޓްރޯލް ކުރަނީ ސަރުކާރުން : އަމީރު
10 މާރިޗު 2025 | ހޯމަ 14:10މިއީ ސަރުކާރުގެ ސިޔާސީ ބޭނުމަށް އެމްއެމްއޭއިން ފައިނޭންސް ކޮށްދިނުން
މޯލްޑިވްސް މަނިޓަރީ އޮތޯރިޓީ
މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ މިނިވަންކަން ގެއްލިފައިވާ ކަމަށާއި، ރާއްޖޭގައި މިހާރު މިނިވަން މުސްތަގިއްލު ސެންޓަރަލް ބޭންކެއް ނެތް ކަމަށާއި، އެމްއެމްއޭ ކޮންޓްރޯލް ކުރަނީ ސަރުކާރުން ކަމުގަ ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ސަރުކާރުން ވަނީ އެމްއެމްއޭ މެދުވެރިކޮށް އިގްތިސާދުގެ ތެރެއަށް ފައިސާ ނެރުމަށް ނިންމާފައެވެ. އެކަން ކުރުމަށް ހަމަޖެހިފައި ވަނީ އެޗްޑީސީގެ މިލްކިއްޔާތުގައި ހުރި ބިންތަކުގެ ތެރެއިން 22 ހެކްޓަރުގެ ބިން އެމްއެމްއޭ އަށް ގަތުމުގެ މުއާމަލާތެއް ހިންގައިގެންނެވެ. މިކަމާއި ގުޅިގެން ހޯމަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އަމީރު ވިދާޅުވިއެވެ.
އަމީރު ވިދާޅުވީ މިވަގުތު އެމްއެމްއޭއިން ހިންގަންޖެހިފައި އޮތީ ކޮންޓްރެކްޝަނަރީ މަނިޓަރީ ޕޮލިސީ އެއް ކަމަށާއި، އެއީ ފައިސާގެ ސަޕްލައި މަޑުމަޑުން ދަށް ކުރަމުން ދިއުން ކަމަށެވެ. ނަމަވެސް މި މުއާމަލާތުން މިސިޔާސަތު ހިންގަނީ އޭގެ އިދިކޮޅަށް ކަމަށާއި، މިއީ ރާއްޖޭގެ އިގްތިސާދީ ހާލަތާ ނުބައްދަލު މިވަގުތު މަރުކަޒީ ބޭންކުން ކޮށްގެން ނުވާނެ ކަމެއް ކަމަށް އޭނާ ވިދާޅުވިއެވެ.
އެމްއެމްއޭއިން ސަރުކާރުގެ ސިޔާސީ ބޭނުމަށް ފައިނޭންސް ކޮށްދޭކަން ފާހަގަކުރައްވައި އަމީރު ވިދާޅުވީ ފައިނޭންސް ކުރަނީ ރިޔާސީ މެނިފެސްޓޯގެ ކަންކަން ތަންފީޒު ކުރުމަށް ކަމަށާއި، މާލީ ދާއިރާގެ ހަމަޖެހުން ގެއްލިގެންދާނެ ކަމަށެވެ. މިއީ އެމްއެމްއޭގެ މަގުސަދުތަކާއި ހިލާފުވުން ކަމަށް އަމީރު ވިދާޅުވިއެވެ.
މީގެ އިތުރުން މިނިވަންކަމާއެކު މަސައްކަތް ނުކުރެވޭތީ އަދި މަގުސަދުތަކާ ހިލާފު ކަންކަން ކުރަން ޖެހޭތީ އެމްއެމްއޭގެ ޑިރެކްޓަރުންގެ ބޯޑު އިސްތިއުފާ ދޭންޖެހޭ ކަމަށް އޭނާ ވިދާޅުވިއެވެ.
އެމްއެމްއޭގެ މާލީ މިނިވަންކަމެއް ނެތުނީމަ އަޅުގަނޑު މިހާރު ވެސް ގޮވާލަން މިނިވަންކަމާއެކު އެމްއެމްއޭގެ ބޯޑުގައި ތިބި ބޭފުޅުންނަށް ވެސް އަދި އެހެނިހެން މެނޭޖްމަންޓުގައި ތިއްބަވާ ބޭފުޅުން ވެސް މަސައްކަތް ނުކުރެވޭ ކަމަށްވާނަމަ މިހާރުން މިހާރަށް އެބަ ދޭންޖެހޭ. އެހެންނޫނިއްޔާ ކުރިއަށް އޮތް މުސްތަގުބަލުގައި ވެސް ރާއްޖޭގެ އިގްތިސާދު ބޮޑު ނުރައްކަލަކަށް ހުށަހެޅުނުއިރު، މިބޭފުޅުން ބޯޑުގައި ތިއްބަވައިގެން މިގޮތަށް މި ޑިސިޝަން ނެގި މިކަންތައްތައް ކުރެވިގެން މިދިޔައީ މިބޭފުޅުން ތިބެގެންކަން އަޅުގަނޑުމެން ފާހަގަކުރާނަން އަބަދުވެސް. އަޅުގަނޑު މިހާރު ވެސް ގޮވާލަން މިނިވަންކަމާއެކު މަސައްކަތް ނުކުރެވޭނަމަ އެމްއެމްއޭގެ ބޯޑުގައި ތިއްބެވި ބޭފުޅުން އިސްތިއުފާ ދޭން.ކުރީގެ ފިނޭންސް މިނިސްޓަރު އިބްރާހިމް އަމީރު
އަމީރު ވިދާޅުވީ މި އުސޫލުގެ ތެރެއިން އެމްއެމްއޭއިން މަސައްކަތް ކުރާނަމަ، ފުށިދިއްގަރުފަޅު ތަރައްގީ ކުރުމަށާއި، އައްޑޫ ބްރިޖު އަދި ރައީސް ޑރ.މުހައްމަދު މުއިއްޒު އަޅުއްވަން ވިދާޅުވި ޓަނަލް އެޅުމަށް ވެސް އިންވެސްޓް ކުރެވިދާނެ ކަމަށެވެ.
އަމީރު ވިދާޅުވީ ގާނޫނު އަަސާސީގައި އެމްއެމްއޭއިން ކުރުމަށް އޮތީ ދެ މަސައްކަތެއް ކަމަށާއި، އެއީ ޕްރައިސް ސްޓެބިލިޓީއާއި އަދި އިކޮނޮމިކަލީ ސްޓެބިލިޓީ ހިފަހައްޓަންކުރަންޖެހޭ ކަންކަން ކުރުން ކަމަށެވެ. ނަމަވެސް މިސިޔާސަތު ނަގާލާފައިވާ ކަމަށް އޭނާ ވިދާޅުވިއެވެ.
