ރައީސް ޑރ.މުއިއްޒު ގެންދަވަނީ ޤާނޫނާއި ޚިލާފު އަމުރުތައް ދިވެހި ފުލުހުންނަށް ކުރަމުން - ނިޝާން
9 މާރިޗު 2025 | އާދީއްތަ 08:38އިހުތިޖާޖުކުރުމުގެ ހައްގަކީ ކޮންމެ މީހަކަށް ވެސް ލިބޭ ހައްގެއް ކަމަށާއި އެ ހައްގު ނިގުޅައި ނުގަނެވޭނެ ކަމަށް އޭނާ ވިދާޅުވި
ޤާނޫނީ ވަކީލް މުހައްމަދު ނިޝާން އިބްރާހިމް އެމްޑީޕީގެ މުޒާހަރާގައި ވާހަކަދައްކަވަނީ - 08.03.2025
ރައީސް ޑރ.މުއިއްޒު ގެންދަވަނީ ޤާނޫނާއި ޚިލާފު އަމުރުތައް ދިވެހި ފުލުހުންނަށް ކުރަމުން ކަމަށް ޤާނޫނީ ވަކީލް މުހައްމަދު ނިޝާން އިބްރާހިމް ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީން ހޮނިހިރު ދުވަހުގެ ރޭ ކުރި އިހުތިޖާޖުގައި ވާހަކަދައްކަވަމުންނެވެ.
ޤާނޫނީ ހަމަތަކުގެ މަސައްކަތް ކުރަން ފުލުހުން ދަސްކުރަން ޖެހޭ ކަމަށް ނިޝާން ވިދާޅުވިއެވެ. 2023 ވަނަ އަހަރުގެ ނޮވެމްބަރު މަހު ރައީސް ޑރ.މުއިއްޒު އާއި ވެރިކަން ހަވާލުކޮށްފައި ވަނީ ވަރަށް އުންމީދާއި އެކުގައި ކަމަށް އޭނާ ވިދާޅުވިއެވެ. އަދި ޤާނޫނުއަސާސީ ނެގެހެއްޓެވުމަކީ ރައީސްގެ ހައިސިއްޔަތުން މުއިއްޒުގެ ވާޖިބެއް ކަމަށާއި އެ އުސޫލުން އަމަލުކުރަމުންދާ މަންޒަރު ނުފެންނަ ކަމަށް އޭނާ ވިދާޅުވިއެވެ.
ރައީސުލްޖުމްހޫރިއްޔާ އާއި ޤައުމު ހަވާލުކުރީ ޤާނޫނާއި އެއްގޮތަށް ޤައުމު ހިންގަން. އެ ޤާނޫނުއަސާސީ އަށް ގައްދާރުވުމަކަށް ވެސް ނޫން. ދިވެހި ފުލުހުންނަށް ހަނދާންކޮށްގެން ޤާނޫނަށް ރުޖޫއަވާން. ދުސްތޫރީ ބާރުތަކާއި އެއްގޮތަށް އަމުރު ކުރެވޭނީ. އެ ނޫން ގޮތަކަށް ކުރާ އަމުރާ ތަބާވެވަޑައި ނުގަންނަވާށޭ.ޤާނޫނީ ވަކީލް ޤާނޫނީ ވަކީލް މުހައްމަދު ނިޝާން އިބްރާހިމް
އިހުތިޖާޖުކުރުމުގެ ހައްގަކީ ކޮންމެ މީހަކަށް ވެސް ލިބޭ ހައްގެއް ކަމަށާއި އެ ހައްގު ނިގުޅައި ނުގަނެވޭނެ ކަމަށް އޭނާ ވިދާޅުވިއެވެ. އަދި ފުލުހުން މެދުވެރިކޮށް ޚިޔާލުފާޅުކުރުމުގެ ހައްގަށް އަރައިގަތުމަކީ ލަދުވެތި ކަމެއް ކަމަށް އޭނާ ވަނީ ވިދާޅުވެފައެވެ. ނިޝާން ވަނީ ޢައިރު ޤާނޫނީ އަމުރަށް ކިޔަމަން ނުވެގެން ފުލުހަކު ވަކިކޮށްފި ނަމަ އެ ފުލުހުންނަށް ބޭނުންވާ ޤާނޫނީ އެހީތެރިކަން ފޯރުކޮށްދޭނެ ކަމަށް ވިދާޅުވެފައެވެ.
