ފޭދޫގައި ސިޓީ ހޮޓަލެއް ތަރައްޤީކުރުމަށް އިންވެސްޓަރުންނަށް ފުރުސަތު ހުޅުވާލައިފި 

އައްޑޫ ސިޓީގައި ފަތުރުވެރިކަން ތަރައްޤީ ކުރުމަށް ކުރަމުންދާ މަސައްކަތުގެ ދަށުން، ފޭދޫގެ ދިގިހެރަ ޓޫރިޒަމް ޒޯން ގައި 45 ކޮޓަރީގެ ސިޓީ ހޮޓަލެއް ތަރައްޤީކުރުމަށް އައްޑޫ ސިޓީ ކައުންސިލުން ހުޅުވާލައިފިއެވެ. 

މި ހޮޓަލް އެޅުމަށް ހަމަޖެހިފައިވަނީ ސަވާހެލި ރަށާ ދިމާލުގައި، ފޭދޫގެ ހުޅަނގު ފަރާތުން އަލަށް ހިއްކި ބިމުގައެވެ. އައްޑޫ އިންޓަނޭޝަނަލް އެއަރޕޯޓާ 2 ކިލޯމީޓަރުގެ ދުރުމިނުގައި އޮންނަ މި ސަރަހައްދަކީ އެއަރޕޯޓުން އަންނަ ބޭރުގެ ފަތުރުވެރިންނަށާއި ސިޓީގެ ޚިދުމަތްތަކާ ގާތުން ބޭނުންވާ ފަތުރުވެރިންނަށް ފަސޭހަ ތަނަކަށް ވެގެންދާނެއެވެ. 

މި މަޝްރޫޢުގައި އިންވެސްޓްކުރުމަށް ޝައުޤުވެރިވާ ފަރާތްތަކަށް ހެނދުނު 9:00ން މެންދުރު 1:00ށް ބިޑިންގ މަޢުލޫމާތު ސިޓީ ކައުންސިލުން ލިބެން ހުންނާނެ ކަމަށް ވަނީ ބުނެއެވެ. 

މި މަޝްރޫޢުގެ މަޤްޞަދަކީ އައްޑޫ ސިޓީގެ ފަތުރުވެރިކަން ފުޅާކުރުމާއެކު، ވަޒީފާގެ މައްސަލަ ހައްލުކުރުމަށް މަގުފަހިކޮށް، އަމިއްލަ ވިޔަފާރިތަކުގެ އިންވެސްޓްމަންޓް އިތުރުކޮށް އައްޑޫގެ އިޤްތިޞާދު ކުރިއެރުމަށް ކަމަށްވެސް ސިޓީ ކައުންސިލުން މައުލޫމާތުދެވެ. 

މިހާރު އައްޑޫގައި ހިންގަމުންދާ 3 ރިސޯޓުގެ އިތުރުން، ޓޫރިޒަމް ޒޯންތަކާއި އަލަށް ހިއްކާ ރަށްތަކުގައި އިތުރު ފަތުރުވެރިކަމުގެ މަޝްރޫޢުތައް ރޭވިފައިވެއެވެ. 

މީގެ އިތުރުން ސަރުކާރުން ހަންކެޑެ އިންޓެގްރޭޓެޑް ޓޫރިޒަމް ޕްރޮޖެކްޓާއި ކޯސްޓަލް ޓޫރިޒަމް މަޝްރޫޢު ވެސް ކުރިއަށްދާއިރު، އައްޑޫ ސިޓީ ވަނީ ސަރަޙައްދީ ފަތުރުވެރިކަމުގެ މަރުކަޒަކަށް ވުމުގެ އަމާޒު ހިފާފައެވެ.