ދިރާގު ޓީވީ އާއި ފައިބަރ ބްރޯޑްބޭންޑްގެ ހިދުމަތް އައްޑޫ ސިޓީއަށް
ދިރާގު ޓީވީއަކީ ރާއްޖޭގައި އެންމެ ފުޅާދާއިރާއެއްގައި ފޯރުކޮށްދޭ އައިޕީޓީވީގެ ހިދުމަތް
ދިރާގުގެ ހައިސްޕީޑް ފައިބަރ ބްރޯޑްބޭންޑުގެ ހިދުމަތް އައްޑޫ ސިޓީގައި އިފްތިތާހުކުރުން
ދިރާގުން ފޯރުކޮށްދޭ ޑިޖިޓަލް ހިދުމަތްތައް ފުޅާކޮށް ތަރައްގީކުރުމުގެ ގޮތުން ދިރާގު ޓީވީގެ ހިދުމަތާ އެކު ދިރާގުގެ ހައިސްޕީޑް ފައިބަރ ބްރޯޑްބޭންޑުގެ ހިދުމަތް އައްޑޫ ސިޓީއަށް ރަސްމީކޮށް އިފްތިތާހްކޮށްފިއެވެ.
މި ދެ ހިދުމަތް ތައާރަފްކުރުމުގެ ގޮތުން ދިރާގުން ހިތަދޫގައި އާދިއްތަ ދުވަހު ވަނީ ކުލަގަދަ ހަފްލާއެއް ބާއްވާފައެވެ. އެކުންފުނީގެ ބްރޭންޑް އެމްބެސެޑަރ ޝަލަބީ އިބްރާހިމް އާއި މޯލްޑިވިއަން އައިޑޮލްގެ ސީޒަން 3 ގެ ގަދަ ފަހެއްގައި ހިމެނުނު ހުސެއިން ޝަހުދާންއާ އެކު ހޮނިހިރު ދުވަހުގެ ރޭ ބާއްވަން ނިންމި ރަސްމިއްޔާތު މޫސުމް ގޯސްވެގެން ވަނީ އިއްޔެ ހަވީރަށް ފަސްކޮށްފައެވެ. އައްޑޫއަށް ރަސްމީކޮށް ދިރާގު ޓީވީ އާއި ފައިބަރ ބްރޯޑްބޭންޑްގެ ހިދްމަތް އިފްތިތާހުކޮށް ދެއްވީ އައްޑޫގެ މޭޔަރ އަބްދުﷲ ސޯދިގު (ސޯބެ)އެވެ.
ދިރާގު ޓީވީއަކީ ރާއްޖޭގައި އެންމެ ފުޅާދާއިރާއެއްގައި ފޯރުކޮށްދޭ އައިޕީޓީވީގެ ހިދުމަތެވެ. ދިރާގުޓީވީގެ އިންޓްރޮޑަކްޓަރީ ޕެކޭޖްގައި 80 އަށް ވުރެ ގިނަ ޗެނަލް ހިމެނޭއިރު އެ ޕެކޭޖުގެ އަގަކީ 300ރ. އެވެ.
ފައިބަރ ބްރޯޑްބޭންޑަކީ ބްރޯޑްބޭންޑް ޚިދުމަތް ފޯރުކޮށްދިނުމަށް ބޭނުންކުރެވޭ އެންމެ ފަހުގެ ޓެކްނޮލޮޖީއެވެ. އަދި އެ ހިދުމަތަކީ ރާއްޖޭގައި މިހާރު ފޯރުކޮށްދެމުންދާ އެންމެ ހަލުއި ސްޕީޑު، 100 އެމްބީޕީއެސް އަދި އެންމެ ބޮޑު އެލަވަންސްކަމުގައިވާ އެއް ޓީބީގެ ޕެކޭޖް އެކުލެވޭ ޚިދުމަތެކެވެ.
