ސައުތު އެފްރިކާ އިން އައްޑޫ ސިޓީ އާއި ދެމެދު ސީދާ ދަތުރުތައް ފަށައިފި

ސައުތު އެފްރިކާގެ ޖޮހަނަސްބާގުން އައްޑޫ ސިޓީގެ ގަމާއި ދެމެދު ސީދާ ދަތުރުތައް ފަށައިފިއެވެ.

އާދިއްތަ ދުވަހު ހެނދުނު ސައުތު އެފްރިކާގެ ފުރަތަމަ ފްލައިޓް ގަމަށް ޖައްސާފައިވާއިރު މިފްލައިޓުން ދަތުރުކުރި ފަތުރުވެރިންނަށް މަރުހަބާ ދެންނެނީ ޓްރާންސްޕޯޓް މިނިސްޓަރ ޢާއިޝަތު ނަހުލާ އާއި، އެކަމަނާގެ ފިރިކަލުން އަދި ރައްޔިތުންގެ މަޖިލީހުގެ ރައީސް ޤަސިމް އިބްރާހިމް އާއި، އައްޑޫ ސިޓީ ކައުންސިލްގެ މޭޔަރު އަބްދުﷲ ސޯދިގާއި އެމްއެމްޕީއާރްސީގެ މެނޭޖިން ޑިރެކްޓަރ ތޮއްޔިބު މުހައްމަދުގެ އިތުރުން ސަރުކާރުގެ އިސްވެރިންނެވެ.

ސައުތު އެފްރީކާ އިން ސީދާ ގަމަށް ދިޔަ ފަތުރުވެރިންނަށް ރަތް ދޫލައިގެ މަރުހާބާ އެއް ކިޔާފއިވާ އިރު މިއީ 300 މީހުންގެ ޖަގައިގެ މަތިންދާ ބޯޓެކެވެ. މި ފްލައިޓުން ހަފްތާއަކު އެއް ދަތުރު ކުރުމަށް ހަމަޖެހިފައިވެއެވެ.

މިދިޔަ އަހަރު ސައުތު އެފްރިކާ އިން ރާއްޖެ އަށް ފަސް ހާހަށް ވުރެ ގިނަ ފަތުރުވެރިން ޒިޔާރަތް ކޮށްފައި ވާއިރު ގަމާއި ސައުތު އެފްރިކާއި ދެމެދު ސީދާ ދަތުރުތައް ފެށުމުން ރާއްޖެ އަށް ޒިޔާރަތްކުރާ ސައުތު އެފްރިކާގެ ފަތުރުވެރިން އިތުރުވެގެންދާނެ އެވެ.