އީރާނުން ކަރަންޓު ގަތުމަށް، އިރާގަށް ދީފައިވާ ހުއްދަ އައު ނުކުރަން އެމެރިކާ އިން ނިންމައިފި
އީރާނަކީ އިތުބާރު ހުރި ހަކަތައިގެ މަސްދަރެއް ނޫންކަމަށާއި، އެ ގައުމަށް އަމިއްލަ ރައްޔިތުންނަށް ބޭނުންވާ ވަރަށް ކަރަންޓު އުފައްދައި ނުދެވޭ ކަމަށް ހިވިޓް ވިދާޅުވި.
އީރާނާއި އެމެރިކާގެ ދިދަތައް ކަރުދާހުގައި ޗާޕްކޮށްފައިވާ މަންޒަރު ފެންނަ ތަސްވީރެއް
އެމެރިކާގެ ސަރުކާރުން އިރާގަށް އީރާނުން ކަރަންޓު ގަތުމަށް ދީފައިވާ ހުއްދަ އިތުރަށް އައު ނުކުރުމަށް ނިންމައިިފި އެވެ.
އީރާނުގެ ނިއުކްލިއަރ ހަތިޔާރު އުފެއްދުމުގެ މަސައްކަތްތައް ހުއްޓާލުމަށް އެމެރިކާގެ ރައީސް ޑޮނަލްޓް ޓްރަމްޕް ގޮވާލައްވާފައިވާ ކަމަށާއި، އެހެން ނޫންނަމަ އެ ޤައުމާ މެދު ގަދަ ފަދަ ފިޔަވަޅުތަކެއް އަޅާނެ ކަމަށް ނެޝަނަލް ސެކިއުރިޓީ ކައުންސިލްގެ ތަރުޖަމާނު ޖޭމްސް ހިވިޓް ވަނީ، އަލް ޢަރަބިއްޔާ އަށް ވިދާޅުވެފަ އެވެ.
މިއީ ނެޝަނަލް ސެކިއުރިޓީ ޕްރެސިޑެންޝަލް މެމޮރަންޑަމް ދޭކާ އެއްގޮތްވާ ގޮތުގެ މަތިން ނިންމި ނިންމުމެކެވެ. އީރާނަކީ އިތުބާރު ހުރި ހަކަތައިގެ މަސްދަރެއް ނޫންކަމަށާއި، އެ ގައުމަށް އަމިއްލަ ރައްޔިތުންނަށް ބޭނުންވާ ވަރަށް ކަރަންޓު އުފައްދައި ނުދެވޭ ކަމަށް ހިވިޓް ވިދާޅުވި އެވެ.
އިރާގުގެ ބޮޑުވަޒީރު ވަނީ އެ ގައުމުގެ ހަކަތައިގެ މިނިވަންކަން ހޯދުމަށް މަސައްކަތް ކުރައްވާނެ ކަމަށް ވިދާޅުވެފަ އެވެ. އިރާގުގެ ހަކަތައިގެ ދާއިރާ ތަރައްޤީ ކުރުމަށް އެމެރިކާގެ ކުންފުނިތަކަށް ގިނަ ފުރުސަތުތަކެއް އޮތްކަމަށާއި، އެމެރިކާގެ ކުންފުނިތަކަކީ ކަރަންޓު އުފެއްދުމާއި، ހަކަތައިގެ ވިއުގަ ގާއިމުކުރުމުގައި ދުނިޔޭގެ އެންމެ ކުރިއަރާފައިވާ ކުންފުނިތައް ކަމަށް ހިވިޓް ފާހަގަ ކުރައްވާފައިވެ އެވެ.
