ޔަމަނުގެ ހޫޘީ ހަނގުރާމަވެރިން ސަޢޫދީގެ ވެރިރަށް ރިޔާޒަށް ދިން ހަމަލާގެ ފަހަތުގައި ވަނީ އީރާން ކަމަށް ސައޫދީ އަރަބިއްޔާއިން ތުހުމަތުކޮށްފިއެވެ.

ސައޫދީއިން ތުހުމަތުކުރާ ގޮތުގައި ހަނގުރާމަވެރިން ފޮނުވާލި މިސައިލަކީ އީރާނުގެ އުފެއްދުމެކެވެ. އަދި ހޫޘީންނަށް އިރާނުން މަދަދުވެރިކަމާ ކަމަށް ސައޫދީން ގެންދަނީ އަބަދު ވެސް ބުނަމުންނެވެ. ސައޫދީން ވަނީ އދ.ގެ ސަލާމަތީ މަޖިލީހުގެ 2216ވަނަ ޤަރާރާ އީރާނުން ޚިލާފްވެފައިވާ ކަމަށް ތުހުމަތުކޮށްފައެވެ. މި ޤަރާރަކީ ޔަމަނުގެ ހަތިޔާރު އެޅި ޖަމާޢަތްތަކަށް ހަތިޔާރު ފޯރުކޮށްދިނުން މަނާކުރުމަށް ނެރުނު ޤަރާރެކެވެ. ޔަމަނުގެ ހޫޘީ ހަނގުރާމަވެރިންނަކީ ޓެރަރިސްޓް ޖަމާޢަތްތަކެއްގެ ގޮތުގައި ގިނަ ޤައުމުތަކުން ބަލާ ބައެކެވެ. ސަޢޫދީން ބުނީ އީރާނުގެ މިއަމަލަކީ ސަރަހައްދުގެ ސަލާމަތާއި ރައްކާތެރި ކަމަށް ލޮޅުން އަރާ ކަމެއް ކަމަށާއި، މިއީ އީރާނުން ހިންގި ހަނގުރާމައިގެ އަމަލެއް ކަމަށެވެ.

ސައޫދީންވަނީ އީރާނުން މި މިސައިލް ޔަމަނަށް އެތެރެކުރި ގޮތެއް ހޯދުމަށް ޔަމަނުގެ ހުރިހާ ބަނދަރެއް ބަންދުކުރާނެކަން ހާމަކޮށްފައެވެ. މިއާ އެކު ޔަމަނުގެ ޤައުމީ އެއަރލައިނުން ވަނީ އީރާނަށް ކުރާ ދަތުރުތައް ވެސް މެދުކަނޑާލާފައެވެ.

މިހަމަލާގެ ފަހުން ސައޫދީން ވަނީ ހޫޘީ ހަނގުރާމަވެރިންގެ 40 ލީޑަރަކު ހައްޔަރުކުރުމަށް އެހީތެރިވި ފަރާތަކަށް އެތައް މިލިއަން ޑޮލަރެއްގެ އިނާމެއް ހުށަހަޅާފައެވެ. އަދި މި މިސައިލް ހަމަލާގެ މަދު ގަޑިއިރުތަކެއް ފަހުން ޔަމަނުގެ ސަންޢާގައި ހުރި ހަނގުރާމަވެރިންގެ ޖަގަހަތަކަށް އަމާޒުކޮށް ވަރުގަދަ ވައިގެ ޙަމަލާތަކެއް ދީފައި ވެއެވެ.

ސަޢޫދީ ޢަރަބިއްޔާގެ މި ތުހުމަތުތަކަށް އީރާނުގެ ސަރުކާރުންނާއި އެޤައުމުގެ އިންޤިލާބީ ގާޑުންގެ ލަޝްކަރުން ވަނީ ރައްދުދީ، އެތުހުމަތުތައް ދޮގުކޮށްފައެވެ.

ޤަތަރާ އެކު އޮންނަ ގުޅުން ސަޢޫދީ އިސްވެ އޮވެ އަރަބި ބައެއް ޤައުމުތަކުން ކަނޑާލި ފަހުން ގަލްފް ސަރަހައްދުގެ މަސްރަހު ވަނީ ވަރަށް ބޮޑަށް ހޫނުވެފައެވެ. އަދި މިހަފްތާ ބަންދުގައި ހިނގައިގެން ދިޔަ ކަންތައްތަކަށް ފަހު، މަސްރަހު އިތުރަށް ހޫނުވާނެ ކަމަށް ބެލެވެއެވެ. ހަފްތާ ބަންދުގައި އީރާނުން އެބޭފުޅާ އަވަހާރަކޮށްލަން އުޅޭ ކަމަށް ވިދާޅުވެ ލުބްނާނުގެ ބޮޑުވަޒީރު ސާދު ހަރީރީ ވަނީ ސައޫދީގައި ހުންނަވައިގެން މަޤާމުން އިސްތިއުފާ ދެއްވާފައެވެ. އަދި ހަފްތާ ބަންދުން ފެށިގެން ސައޫދީން ގެންދަނީ ކޮރަޕްޝަނާ ދެކޮޅަށް ފަށާފައިވާ މަސައްކަތުގެ ތެރެއިން އެޤައުމުގެ ޝާހީ ޢާއިލާގެ ބައެއް އަމީރުންނާއި ކުރީގެ ވަޒީރުން ހައްޔަރުކުރަމުންނެވެ.