ޢައްޒާ އާރާސްތު ކުރުމަށް ޢަރަބި ޤައުމުތަކުގެ ޕްލޭނަށް ޔޫރަޕުގެ ހަތަރު ޤައުމުން ތާއީދު ކޮށްފި
ހަތަރު ޤައުމުން ބުނެފައި ވަނީ ޢަރަބި ޤައުމުތަކުގެ އިސްނެގުމާއެކު މަސައްކަތްކުރުމަށް ތައްޔާރަށް ތިބިކަމަށާއި، އަރަބި ޤައުމުތަކުން މި މަޝްރޫޢު އެކުލަވާލުމަކީ މުހިންމު ސިގްނަލެއް ކަމަށް.
އިސްރާއީލުގެ ހަނގުރާމައިގެ ސަބަބުން ޣައްޒާގައި ހަލާކުވެފައިވާ އިމާރާތްތައް ހުރި ސަރަހައްގައި އާންމު ރައްޔިތުން ޙަރަކާތްތެރި ވަނީ
ހަނގުރާމައިގެ ސަބަބުން ވީރާނާވެފައިވާ ޣައްޒާ އަލުން އާރާސްތު ކުރުމަށް، ޢަރަބި ޤައުމުތަކުގެ ޕްލޭނަށް ޔޫރަޕުގެ ހަތަރު ޤައުމަކުން ތާއީދު ކޮށްފި އެވެ.
ޣައްޒާ އަލުން އާރާސްތު ކުރުމަށް ޢަރަބި ޤައުމުތަކުން ވަނީ 53 ބިލިއަން އެމެރިކާ ޑޮލަރުގެ ޕްލޭނެއް ތައްޔާރު ކޮށްފަ އެވެ. ޔޫރަޕުގެ ހަތަރު ޤައުމު ކަމަށްވާ ފްރާންސް، ޖަރުމަނު، އިޓަލީ އަދި ބްރިޓެއިންގެ ފޮރިން މިނިސްޓަރުން ވަނީ ޣައްޒާ އަލުން އާރާސްތު ކުރުމަށް ޢަރަބި ޤައުމުތަކުން ހުށަހަޅާފައިވާ މަޝްރޫޢު އަށް ތާއީދު ކުރައްވާފައި އެވެ.
މި މަޝްރޫޢުގެ ދަށުން ޣައްޒާ ގައި ދިރިއުޅޭ ފަލަސްޠީނު ރައްޔިތުން އެހެން ތަނަކަށް ބަދަލުކުރުމެއް ނެތި ކުރިއަށް ގެންދިއުމަށް ރޭވިފައިވެ އެވެ. އިއްތިހާދުގެ ހަތަރު ޤައުމުގެ ވަޒީރުން ނެރުއްވި ބަޔާނުގައި ވިދާޅުވެފައި ވަނީ، މި މަޝްރޫޢަކީ ޣައްޒާ އަލުން އާރާސްތު ކުރުމަށް ޢަމަލީ ގޮތުން ކުރެވޭނެ މަޝްރޫޢެއް ކަމަށާއި، މިކަމުގެ ސަބަބުން ޣައްޒާ ގައި މިހާރު ދިރިއުޅޭ ފަލަސްޠީނުގެ ރައްޔިތުންގެ ނިކަމެތި ދިރިއުޅުމަށް އަވަސް އަދި ދެމެހެއްޓެނިވި ހައްލެއް ލިބިގެންދާނެ ކަމަށެވެ.
މިޞްރުގެ އިސްނެގުމުގެ ދަށުން އެކުލަވާލައި، ޢަރަބި ލީޑަރުން އަންގާރަ ދުވަހު ފާސްކުރި މި މަޝްރޫޢު އަށް އިސްރާއީލް އަދި އެމެރިކާގެ ރައީސް ޑޮނަލްޑް ޓްރަމްޕް ވަނީ ދެކޮޅު ހަދައިފަ އެވެ. ޓްރަމްޕް ވަނީ ޣައްޒާ ސަރަޙައްދު "މެދުއިރުމަތީގެ ރިވިއެރާ" އަކަށް ބަދަލުކުރުމުގެ އަމިއްލަ ވިޝަނެއް ހުށަހަޅުއްވާފައި އެވެ.
މިޞްރުގެ ޕްލޭން ގައި ހިމެނެނީ ހަމާސް އާއި އިސްރާއީލާ ދެމެދު ހިނގަމުންދާ ހަނގުރާމަ ނިންމުމަށްފަހު، ޢައްޒާގެ ވެރިކަން ހިންގުމަށް މިނިވަން، ޕްރޮފެޝަނަލް ފަލަސްޠީނު ޓެކްނޮކްރެޓުންގެ އިދާރީ ކޮމިޓީއެއް އުފެއްދުމެވެ. މިކޮމިޓީން އިންސާނީ އެހީތައް ބެލެހެއްޓުމާއި، ފަލަސްޠީނު އޮތޯރިޓީގެ ބެލުމުގެ ދަށުން ވަގުތީ ގޮތުން ޣައްޒާ ހިންގުމުގެ މަސްއޫލިއްޔަތު އަދާކުރާނެ އެވެ.
ހަތަރު ޤައުމުން ބުނެފައި ވަނީ ޢަރަބި ޤައުމުތަކުގެ އިސްނެގުމާއެކު މަސައްކަތްކުރުމަށް ތައްޔާރަށް ތިބިކަމަށާއި، އަރަބި ޤައުމުތަކުން މި މަޝްރޫޢު އެކުލަވާލުމަކީ މުހިންމު ސިގްނަލެއް ކަމަށެވެ.
އަދި ހަމާސް އަށް ޢައްޒާ ގައި ވެރިކަމެއް ނުކުރެވޭނެ ކަމަށާއި، އިސްރާއީލަށް ނުރައްކަލަކަށް ވެސް ވެގެން ނުވާނެކަމަށް އެ ޤައުމުތަކުން ވަނީ ބުނެފަ އެވެ. އަދި ފަލަސްޠީނު އޮތޯރިޓީގެ މައި ދައުރާއި، އިސްލާހީ އެޖެންޑާ ތަންފީޒުކުރުމަށް އެ ޤައުމުތަކުން ތާއީދުކުރާ ކަމަށް ވެސް ވަނީ ބުނެފަ އެވެ.
