ސުލްޙަ ހޯދުމަށް އެމެރިކާއާ އަށް ފުރިހަމަ އެއްބާރުލުން ދީގެން މަސައްކަތް ކުރާނަން: ޒެލެންސްކީ
އެކަމާ ގުޅުން ހުރި އަސްލު ހުށަހެޅުންތަކެއް މިހާރު ވެސް ކުރިމަތީގައި އޮތް ކަމަށާއި، އެންމެ މުހިންމު ކަމަކީ ވީ އެންމެ އަވަހަށް އަދި ފުރިހަމަ އަށް އެކަން ކުރިއަށް ގެންދިޔުމަށް ކަމަށް ވެސް ޒެލެންސްކީ ވިދާޅުވިއެވެ.
ޔޫކްރޭންގެ ރައީސް ވޮލޮޑިމިއާ ޒެލެންސްކީ (ފައިލް ފޮޓޯ: އޭޕީ)
ރަޝިޔާ ހަނގުރާމަ ނިންމުމާ ގުޅޭގޮތުން, އަންނަ ހަފްތާގައި ސައުދީ ޢަރަބިއްޔާ ގައި އެމެރިކާގެ ބައިވެރިންނާއެކު "ފުރިހަމަ އެއްބާރުލުމާއެކު" މަޝްވަރާކުރުމަށް ތައްޔާރަށް ތިއްބެވި ކަމަށް، ޔުކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
މިއަހަރުގެ ޖަނަވަރީ މަހި އެމެރިކާގެ ރައީސްކަމާ ޙަވާލުވެ ވަޑައިގެންނެވި ޑޮނަލްޑް ޓްރަމްޕް ވަނީ ޔުކްރެއިނަށް ދެމުން އައި އަސްކަރީ އެހީތެރިކަމާއި، އިންޓެލިޖެންސް މަޢުލޫމާތު ހިއްސާކުރުން މެދު ކަނޑާލައިފަ އެވެ.
އޭގެ ފަހުން ޒެލެންސްކީ އެމެރިކާ އަށް ކުރެއްވި ދަތުރުފުޅުގެ ތެރޭގައި ވަނީ ޓްރަމްޕާ ކުރެއްވި ބައްދަލުވުން ވެސް ހޫނުވި އެވެ. އެ ބައްދަލުވުމުގައި ޓްރަމްޕާއި ޒެލެންސްކީގެ އިތުރުން، އެމެރިކާގެ ނައިބު ރައީސް ޖޭޑީ ވޭންސް ވަނީ ބަހުގެ ހަމަލާތަކެއް ބަދަލު ކޮށްފަ އެވެ.
ރަޝިޔާ ހަނގުމަ ނިންމުމަށް ޔުކްރެއިން ސީރިއަސްކޮށް މަސައްކަތް ނުކުރާކަމަށް ވެސް ޓްރަމްޕް ވަނީ ތުހުމަތު ކުރައްވައިފަ އެވެ. ޒެލެންސްކީ އޭނާގެ ރަސްމީ އެކްސް އެކައުންގައި ކުރެއްވި ޕޯސްޓެއްގައި ވިދާޅުވީ، ހަނގުރާމަ ފެށުނު ފުރަތަމަ ސިކުންތުން ފެށިގެން ޔުކްރެއިން އިން އަންނަނީ ސުލްޙަ ހޯދުމަށް މަސައްކަތް ކުރަމުން ކަމަށެވެ.
އެކަމާ ގުޅުން ހުރި އަސްލު ހުށަހެޅުންތަކެއް މިހާރު ވެސް ކުރިމަތީގައި އޮތް ކަމަށާއި، އެންމެ މުހިންމު ކަމަކީ ވީ އެންމެ އަވަހަށް އަދި ފުރިހަމަ އަށް އެކަން ކުރިއަށް ގެންދިޔުމަށް ކަމަށް ވެސް ޒެލެންސްކީ ވިދާޅުވެފައިވެ އެވެ.
އަންނަ ހަފުތާގައި ސައުދީ ޢަރަބިއްޔާ އަށް ޒިޔާރަތް ކުރައްވާނެ ކަމަށް ވިދާޅުވެ، ހޯމަ ދުވަހު ސައުދީ ވަލީއަހުދު މުޙައްމަދު ބިން ސަލްމާނާ ބައްދަލުކުރެއްވުމަށްފަހު، އަންގާރަ ދުވަހު ޔުކްރެއިންގެ ޑިޕްލޮމެޓިކް އަދި އަސްކަރީ ވަފުދެއް އެމެރިކާގެ ޓީމާ ބައްދަލު ކުރައްވާނެ ކަމަށް ވެސް ވިދާޅުވި އެވެ.
ޔުކްރެއިންގެ ވަފުދުގައި ހިމެނި ވަޑައިގަންނަވާނީ ޚާރިޖީ ވަޒީރު އަންޑްރީ ސިބިހާ، ޒެލެންސްކީގެ ޗީފް އޮފް ސްޓާފް އަންޑްރީ ޔެރްމަކް އަދި ދިފާޢީ ވަޒީރު ރުސްތަމް އުމެރޮވް އެވެ.
ތިން އަހަރު ކުރިން ރަޝިޔާގެ ސިފައިން ޔުކްރެއިނަށް އަރައި، އެޤައުމުގެ 20 އިންސައްތަ ސަރަޙައްދު ހިފާފައިވާއިރު، ޓްރަމްޕްގެ ޚާއްޞަ މަންދޫބު ސްޓީވް ވިޓްކޮފް ވިދާޅުވެފައި ވަނީ ހަނގުރާމަ ނިންމުމަށް އޮނިގަނޑެއް އެކުލަވާލުމަށް ޔުކްރެއިނާއެކު މަޝްވަރާތައް ކުރިއަށްދާ ކަމަށެވެ.
